بسم الله الرحمن الرحيم
السلام عليكم ورحمة وبركاته
ـــــــــــــــــــــ
(( القهوه العربيه ))
من حيث الصحه ..
تعتبر القهوة العربية هي الأفضل صحياً من انواع القهوة الاخرى
من حيث التحميص ، وعدم استخدام السكر ،
كما انها تحتوي على مادة ( الكربون )
التي تساعد على الهضم وتنشيط الجسم .
شجرة البن ..
يذكر ان شجرة البن دائمة الخضرة
تنمو طبيعيا في المناخ (( الاستوائي ))
" الذي يكون حارا رطبا في موسم النمو وحارا جافا في موسم القطاف "
ويبلغ ارتفاعها 6 امتار أو اكثر لكنها تقلم كي لا ترتفع اكثر من نحو 4 امتار،
وازهار البن بيضاء ، وثمراتها حمراء ، وتلقيحها ذاتي ، ويتم نموها من 6 الى 8 اعوام
وتحصد حبوب البن بـاللآت او بطريقة الهز ،
وتجمع وتنقع في مغطس او في سيل ماء لتزول مرارتها .
ويقال أن افضل أنواع القهوة (
الخولاني ) نسبة الى بلاد في اليمن أسمها ((
خولان )) .
الوان القهوه ...
تختلف درجات ألوان القهوة العربية بحسب اختلاف البلاد
فـفي
السّعوديّة و
الكويت و
قطر و
البحرين - يحبّونها صفراء لونها فاتح ، مع تكثير الهيل .
و أمّا في
الإمارات - فتتراوح بين صهباء داكنة إلى قريب السّواد .
و أمّا في
عمان - فيحبونها قريبة إلى السّواد إن لم تكن خالصة السّواد .
الادوات المستخدمه في صنع القهوه ..
أما الأدوات المخصصة للقهوة واسمها الدارج (
المعاميل )
فقد اختفت في زمننا هذا واستبدلت بأواني حديثة
ويقول الشاعر في هذا ..
يا عَاملِينْ البنّ وَسْطَ التَرَامِيـسْ = لا تَقْطَعُونِهْ من حَشَا مِرْضعَاتِـهْ
رُدُّوه لأمَّات الخْشُـوم المِقَابِيـسْ = صُفْر الدلال اللي عَلِيهَـا حَلاتِـهْ
مَا عَاد شِفْنَا البن وَسْط المَحَامِيسْ = يَحْمِسْ وصَوْت النِّجْر طَوَّلْ سكَاتِهْ
فالمعاميل التي أذكرها تتكون من :
الدلة : وهي إناء من النحاس يهتمون بنظافنها وتلميعها في المناسبات
المحماس : وهو عبارة عن إناء من النحاس أو الحديد الصلب له يد بطول 30 سم تقريبا
يحمصون فيه القهوة على النار
المصفاة : وهو إناء يضعون به الماء والقهوة لتغلي ثم يسكبونها في الدلة
بعد إظافة البهار ات( الهيل ) ( الزعفران ) ( العويدي - المسمار - القرنفل )
النجر (منادى): وهو إناء من النحاس أو البرونز وهو خليط من القصدير والنحاس
له شكل وصوت جميل عندما تدق فيه القهوة
المبرادة : وهي إناء من الخوص تترك فيه القهوة بعد الحمس لتبرد قبل دقها في النجر
الملقاط : قطعة من حديد لها رجلين لتحريك النار
البيز أو (اللطوة) : وهو أداة مصنوعة من قماش لإمساك الاواني الحارة
المركـّب أو المنصب : وهو أداة من الحديد بثلاثة أرجل
لحمل الاواني على النار
(وان لم تكن متوفرة فيضعون ثلاث أحجار بدلا منها وتسمى في اللغة الاثافي ) .
فناجيل القهوه ..
1) الفنجـال الأول ( الهـيف ) :
وهو الفنجال الذي يحتسيه المعزب أو المضيف قبل مايمد القهـوة لضيوفه .
وذلك لـ الاسباب التاليه ..
قديما : كانت تسري هذه العادة عند العرب ليأمن ضيفهم من أن تكون القهوة مسمومة .
حديثا : جرت هذه العادة ليختبر المعزب جودة وصلاحية القهوة قبل تقديمها إلى الضيوف
خوفا من أن تكون بارده او انها عملت بطريقة غير صحيحه .
2) الفنجـال الثاني ( الضـيف ) :
وهو الفنجـال الأول الذي يقدم للضيف وهو واجب الضيافـة
وقد كان الضيف قديما في البادية مجـبرا على شربه
إلا في حالـة العداوة أوأن يكون للضيف طلب صعب وقوي عند المضيف
فكان لايشربه إلا بعد وعـد من المضيف أو المعزب بالتلبية
وقد كان من عظائم الأمـور أن يأتي إنسان إلى بيتك ولايشرب فنجالك إلا بعد تلبية طلبه
فأنت حتما مجـبر على التلبيـة وإلا لحق بك العـار عند النـاس .
3) الفنجـال الثالث ( الكـيف ) :
وهو الفنجـال الثاني الذي يقدم للضيف ،
وهو ليس مجـبر على شربه ولايضير المضيف إن لم يشربه الضيف
إنما هو مجـرد تعديل كيف ومزاج الضيف فقط .
وهو أقل فناجيل القهـوة قـوة في سلوم (عادات) العرب
4) الفنجـال الرابـع ( السـيف ) :
وهو الفنجـال الثالث الذي يقدم للضيف
وهذا الفنجـال غالبـاً ما يتركـه الضيف ولايحتسـيه ؟؟
لأنه أقـوى فنجـال قهـوة لدى عرب الباديـة !!
إذا أنه يعـني أن من يحتسـيه فهـو مع المضيف في السـراء والضـراء
ومجـبر على الدفـاع عنه بحـد السـيف ، وشريكه في الحـرب والسلم
يعادي من يعاديه ويتحالف مع حلفـاؤه
حتى وإن كان من بين حلفائه من هم أعداء له في الأصل ( أعداء للضيف )
فقد كان هذا الفنجـال عبارة عن عقد تحـالف عسكري ومدني وميثاق أمني
مابين الضيف والمضيف ،
وقد كان هذا الوضـع يحمل النـاس أمورا شداد ويواجهون الموت والدمـار بسببه ،
فلذلك كانوا يتحاشـونه ويحترصون منه أشـد الحـرص
أما شرب أكثر من 3 فناجـيل فعادة يعملها أهل وذوي صاحب القهوة وأفراد قبيلته
وأنسبائه وذوو الدم .
5) الفنجال الخامس ( الفارس ) :
حيث يكون هناك من يطلب شخص ما بدم أو ثأر أو ماشابه
إن كان شيخ القبيلة أو كبير في السن أو إمرأة
يجمع شباب القبيلة وفرسانها ويصب القهوة في الفنجال ويرفعه عاليا على رؤوس الأشهاد
وأمام الجميع ويقـول :
هــذا فنجـال فـلان بن فـلان من يشربـه ؟
أي من يأخذ حقنا أو ثأرنا أو دمنا منه؟ فيقوم أحد الفرسان
ويقـول :
أنا له ويأخذ الفنجـال ويشربـه.
ويذهب في طلب هذا الشخص ولايعـود إلى قبيلته إلا بعد إحضـار البينة
على أنه انتقم لصاحب الفنجـال من الشخص المطلوب
وإلا فـ له أحد خيارين :
1- إما أن يجلي من قبيلته ولايعـود لها أبداً
لما لحقه من ذل وعار وصم بها جبينه .
2- وإما أن يعود محملا بالخزي والعار
ويصبح مدعاة لسخرية أفراد القبيلة .. صغيرها وكبيرها .. رجالا ونساءاً
ولايتزوج منها ولا يخرج للحرب مع فرسانها .
....
قصائد وأبيات قيلت فـ القهوه ...
يقول
محمد القاضي :
يامـل قلـب كـل مالتـم الاشفـاق = من عام الاول به دواكيـك وخفـوق
يجاهد جنود في سواهيـج الاطـراق = ويكشف له اسرار كتمهـا بصنـدوق
لا عن له تذكـار الاحبـاب واشتـاق = باله وطف بخاطره طـاري الشـوق
قربت له من صافـي البـن مـالاق = بالكف ناقيها عـن العـذف منسـوق
احمس ثلاثٍ يانديمـي علـى سـاق = ريحه على جمر الغضى يفضح السوق
حـذراك والنيـه وبالـك والاحـراق = واصحى تصير بعاجل الحمس مطفوق
اليا اصفر لونه ثم بشـت بالاعـراق = وصارت كما الياقوت يطربلها المـوق
وعطت بريح فاضحـن فاخـرٍ فـاق = لا عنبر ريحـه بالانفـاس منشـوق
دقـه بنجـرٍ يسمعـه كـل مشتـاق = راعي الهوى يطرب اليا دق بخفـوق
واحشه بدلـه مولعـه كنهـا سـاق = بلـورة منصوبـة تقـل غـرنـوق
خله تفوح وراعـي الكيـف يشتـاق = اليا طفح له جوهر صـح لـه لـوق
قمـورٍ صغـار كالزمـرد بالاشعـاق = وكبارهاالطافح كمـا صافـي المـوق
وزله على وضحىً بها خمس ارنـاق = هيل ومسمـار بالاسبـاب مسحـوق
مع زعفران والشمطري اليا انسـاق = ريحه مع العنبر على الطاق مطبـوق
اذا اجتمـع هـذا .. وهـذا بتيفـاق = فصبه كفيت العوق عن كـل مخلـوق
بفنجال صين ٍ صافي عنـه الارمـاق = تغضـي وكرسيـه غـدان معشـوق
اليا انطلق من جوهره تقـل شبـراق = رنق تصور بالحمامه علـى الطـوق
شكل على الفنجـال لونـه ليـا راق = دم الغزال اليا انشلـع منـه معلـوق
خمر ٍ اليا منـه تسلسـل بالاريـاق = وعليه مـن صافـي الـورد مذلـوق
راعيه كنـه شـارب ريـق تريـاق = كاس الهوى وسرور من ذاق له ذوق
يحتاج من بيض العذارى اليـا فـاق = غرو ٍ يمز اشفـاه والعنـق مفهـوق
عبـث يعيـل بحبتـه مـن مامـاق = وهو يضاهي زاهي البـدر بعشـوق
في وجنتيه اليا غنـج بـارق حـاق = عجل رفيفه بالطها الغـرق بطبـوق
سحر كتب من حبر عينيـه بـوراق = خديه صاديـن ونونيـن مـن فـوق
كن العرق بخدودهـا حصـن ارنـاق = نثر على صفحـات بلـورة الشـوق
اليا تبسـم شـع واشـرق بالافـاق = نور ٍ يفوق البدر سحـر ٍ ومنطـوق
والعنق كن المسك والـورس بـراق = مامشخصن في صدري الشاخ مدفوق
تمشي برفق خوفهـا مدمـج السـاق = يفصم حجول هزه الثقـل مـن فـوق
اليا صفت لك ساعة وانـت مشتـاق = فأقطف زهر مالاق والعمـر ملحـوق
فاليا حضر ماقلت عنـدي بـالارزاق = بيـدي كريـم كافـل كـل مخلـوق
هذا وصلـوا عنـد مانـاض بـراق = او ماشكى الفرقى شفيـق لمشفـوق
على النبـي مـازج زاج بـالاوراق = وأله وصحبه عد ماسيـق مسيـوق
..
ويقول
محمد السديري :
يا بجاد شب النار وادن الدلالـي = وأحمس لنا يا بجاد ما يقعد الراس
ودقه بنجر يـا ظريـف العيالـي = يجذب لنا ربع على اكوار جالـي
وزله الى منه رقـد كـل سالـي = وخله يفوح وقنن الهيـل بقيـاس
وصبه ومده يـا كريـم السبالـي = يبعد همومي يوم اشمه بالانفـاس
فنجال يغدي مـا تصـور ببالـي = روابع تضرب به أخماس وأسداس
..
ويقول
دغيم الضلماوي :
يا كليب شب الناريا كليب شبـه = عليك شبه والحطب لك يجابـي
الوالمه يا كليب عجـل بصبـه = والرزق عند اللي ينشي السحابي
حنا علينا جيـب ماهـا وحبـه = وعليك تقليـط الـدلال العذابـي
ادغث لها ياكليب من جزل خبـه = وشبه الى منـه هباكـل هابـي
باغي إلـى شبيتهـا ثـم قبـه = تجذب سـراة منبعيـد غيابـي
بنسرية يا كليب صلـف مهبـه = متلطميـن وسوقهـم بالعقابـي
صبه لقرم صرفته مـا حسبّـه = يوم البخيل مدنهر الوجه هابـي
وعده عن اللي مايداري المسبه = اللـي يدوربالقصـي الغيـابـي
لا جاضع المتروع خطو الجلبـه = يا حلو تالي الليل خبط الركابـي
اقحص لهم وابدي سلام المحبـه = لا شح بالهيـن كبيـر العلابـي
..
ويقول
محمد بن مطلق بن بادي :
يـاوي والله كيفـةٍ يـا مطاليـق = ما هيب كيفة شاربيـن الزقـاره
الكيـف ادلال كنهـن الغرانيـق = بيضٍ تقلّط فـوق جـال المنـاره
ومحماسةٍ يحرق بها البن تحريق = تحمس وتفهق عاد فيها صفـاره
ونجرٍ يطرّق بالمويلـي تطاريـق = يجذب بصوته من براسه نمـاره
الأولـه تنسـاق قبـل الأباريـق = وفنجالهـا دايـم يكثـر بهـاره
في مجلسٍ يطرب له البال يا طليق = مع كل شغمـوم ٍ بكبـده مـراره
وإن جاء نهارٍ فيه حذف المعاليق = المـوت سنّـه والغنايـم تجـاره
لا جات من عند الوالي بالتوفيـق = وقفوا على حم الذرا عقب غـاره
والفوا على ربعٍ عليهم مشافيـق = كلٍ يبي من كسب ربعـه خيـاره
وبيوتهم مثل الجبـال الشواهيـق = تزمي الهشال الخلا مثـل قـاره
..
ويقول
مشاري بن ربيعان :
مانيب هلباجٍ علـى النـوم نعـاس = همه طعامـه ليـن كرشـه ملاهـا
ادّرج الدنيـا بالأفعـال وقـيـاس = نسعد عيونٍ وعين نسحـن دواهـا
لاضاق صدري جبت نجرٍ ومحماس = ودلالٍ بيـض غالـيٍ مشتـراهـا
قم سو فنجالٍ على خمسة اجنـاس = احذر تجي حرقـه وبالـك نياهـا
خلك لها عن كل عذروب حسـاس = قيّس لها الطبخه علـى قـد ماهـا
حتى يجي فنجالها يجل الأعمـاس = عقب الصلف والسهر مااكبر غلاها
خصص مشاكيلٍ على النار جلاس = حبوس الرجال اللي بعيـدٍ مداهـا
بدوا بـه اللـي للمعاديـن نطـاس = مودع سمان الهجـن يثلـع حفاهـا
والثاني اللي يثني العصب بالـراس = في ربعة يشبع بهـا مـن نصاهـا
والثالث اللي يحتمي دن الأفـراس = لاروحـت خيـلٍ بخيـلٍ حماهـا
وباقي الملا لو ماتقهويـه لابـاس = هـذارة المجلـس قليـلٍ حـلاهـا
لانافـعٍ ربعـه ولاحـاش نومـاس = ضبّـاط مـال ولايـذّري ذراهــا
..
ويقول
تركي بن حميد :
يا ما حلا يا عبيد في وقت الاسحار = جر الفراش وشب ضـو المنـاره
معدلة تجذا علـى صالـي النـار = ونجر الى حـرك تزايـد عيـاره
النجرب طق وجـاذب كـل مـرار = مالفه الملفـوف مـن دون جـاره
في ربعة ماهيب تحجب عن الجار = لامن ولد اللاش مـا شـب نـاره
..
ويقول
سعد بن حمد ضويان :
ياحسين لاكني على الجمر مجضوع = من فقد خلاني وفقـدي ربوعـي
قم سو فنجالٍ ترى الراس مصدوع = صفه وزله عن سريب الخموعـي
فنجال فيه مخموس الكيف مجموع = بدلال يشـدن الخبـاس الوقوعـي
ونجر دلاله ماو بالصوت مفجـوع = يا زين حسه والخلايـق هجوعـي
وانجاك بالمجلس سنافي وبالـوع = عده على الطيب وكـب البلوعـي
..
ويقول
هايس بن مجلاد :
قم سو ما يصبغ على الصين ياذياب = بدلال يشـدن البطـاط المحاديـب
احمس الى من العرق فوقهـا ذاب = واستدن ما يجذب عليك الشراريب
نجر يصيح من الطرب تقل بحجاب = يصبر على طول الدهر للمواجيـب
..
ويقول
عبدالله بن سبيّل :
ترى حلاة الكيف يا مشرب له = لا فارقوك اهل الحسد والنجاسه
لا صار شغاله ظريـف بزلـه = وظرف بتقليبه وقيمـة قياسـه
الى صفا بنه على مـا شغلـه = تلقا على الفنجال ردعة لعاسه
خطو الولد توه على شبة لـه = جميع هو مات المراجل براسه
يقوم بالمعـروف دقـة وجلـه = والله مهيئ له علـى قوباسـه
وخطو الولد رجم على غير حله = لو جازلك مبناه برّق بساسـه
..
ويقول
غازي بن عون :
يا ريف قلبي للمسايير قم شـبّ = وحط المنارة في طويل الظلالـي
عقب تشق لها لجزل الحطب جبّ = وهات النجر واحضر جداد الدلالي
دنّـه وخلّـه للمساييـر يجـذبّ = لا قام صوتـه للنشامـى يلالـي
يوحونه الجيران لا قـام يقنـبّ = ويجيك الاقصى والقصير الموالي
..
ويقول
سليمان الهزاع :
لافي على جمر الغضى سو فنجال = فنجال بن من رخيـص وغالـي
حيثك قديم مغربل البـن غربـال = حكيم عند مصاطـرات الدلالـي
خله على المطلوب يلفت لنا البال = يفتح لنا المعنى بمبـدا المقالـي
الى انطلق من ثعلب المبهرة مال = يشدي خضاب مخفرات حيالـي
..
ويقول
حمد بن ابراهيم العمار :
الى ضاق صدري قمت يم الدلالي = شبيت ناره يوم عني الكرى غاب
الى اصرهت بالجمر عقب اشتعالي = زليت صافيها على كيف شـراب
وقلبت حمستها على شـف بالـي = حوش الغنم لين العرق فوقها ذاب
ودقيتها من ضيقتي بـاعتجالـي = نجره يصيح لراعي الكيف جـذاب
..
ويقول
شليل بن عوض الحربي :
يا سعود قم هات الدلال المهانيـف = في ليلة ناخـذ سهرهـا قطوعـه
إحمس وكيفها ترى طاب لي كيف = واستدن (مزعل) ياشفاتي وصوعه
إلى تهيض بالعـوى والزعانيـف = يشدي عوا ذيب شكا حر جوعـه
يشدي عواذيبٍ بروس المشاريف = حادية حـادي والهبايـب تلوعـه
حتى يجيب مسيّر البيت والضيف = مثل العقيد اللي تلافـت جموعـه
مخصصٍ الى صار جماعه مواليف = ماركز الشيطـان معهـم بكوعـه
يا زين سجتهم وزين السواليـف = ما دوّروا واحد بالاخـر طموعـه
والى احدث الجهال بعض التخاليف = إستدركوها قبـل تكثـر فزوعـه
تلقى لهم سمعة وهيبه وتصريـف = وكلٍ يجي فعله علـى قـد نوعـه
..
ويقول
راكان ابن حثلين :
يامحلا الفنجال مع سيحة البال = في مجلسن مافيه نفسً ثقيله
هذا ولد عمٍ وهذا ولـد خـال = وهذا رفيقن مالقينـا مثيلـه
..
ويقول
شلعان بن ظافر الودعاني :
هواي نجر ٍ تالي الليل يا فهيـد = لجة ظلوعـه تجـذب الغايبينـي
لا صار بالمجلس قروم ٍ و اجاويد = والهرج راكد بالكـلام الثمينـي
..
منقول مع بعض الاضافات ..
واللي عنده قصايد اخرى غير اللي ذكرت لايقصر
سواءاً من شاعر المنتدى او غيرهم
واسمحو لي عـ الاطاله والقصور
أخوكم //
بلنتي ..
12-12-2006, 04:16 PM
@@ الـ ـقـ ـهـ ـوه @@
العرض العادي
