وان قامت الشعار ببحورها تعوم

[معلومات العضو عبدالله المزيني]

لاعدت يارجم(ن) رقيته ضحى اليوم=بروس الهضاب النايفات المطله
ابا اتسلى مير عودت بهموم=لوا عنايه ويش أنا مرقبله
وتدارقن مثل الحباري عن الحوم=مذيرات اوكارهن عارفله
لي لازمٍ معهن وانا فيه محتوم=رجم العنا هو ليه انا عانيله
واللي تمنيته له اسنين معدوم=حسرات ياجابوا لنا سيرتله
معاد باقي له علامات ورسوم=شد وقهرنا اللي نزل منزلٍ له
احسن يصير العلم ماهو امفهوم=كل(ن) محصل من غثا الوقت عله
وعاده كلام قليل العرف مسموم=قد قالها غيري وانا شاهدٍ له
والكذب لو يفلج به الخصم مذموم=يقطعك فوزٍ فيه غدر ومذله
هو الردا وترا الردا حيلة رخوم=والا ترا الطيب ماهو حيلتله
وجنب خراب(ن) داخله يالعي البوم=مابه ذرى ولا يظللك ظله
بس يتهاوى وكل جدرانه اثلوم=والساس من تاسيسته فيه خله
عليك بصرحٍ يزبنه كل مظيوم=من صكته لوعاتها مزبنله
عنز على الطيب ولوهو من القوم=والا الردي لو هو ولد عم خله
العفن لو ماله مكدس ومردوم=محدٍ ذكر خيره ردي الجبله
وناسه تمنى طيحته جعل مايقوم=والمال يبي يارثه وارثله
وراع السخاء دايم عزيز(ن) ومحشوم=ومقدار ربعه بينهم شيمتله
وتلقى الرفاقه تدهله دايم الدوم=وبيوت ربعه كلها مدهلله
وياللي بنفسك تنقل الكبر والزوم=ابليس من زود الردا مرتحله
وبين الخلايق ناقل الزوم معلوم=تكرم رجال الجود عن صيفتله
وياشريم خل النار برطمك مشروم=والشر خله كان دارة رحله
خله البتييعين يعدونك اللوم=دواهيٍ ماحد يبي لقوتله
الحيل حيلٍ خلفه ولاعندك اعزوم=الحمل ماتقواه يابر كله
واترك اعراض الخلق ماانت املزوم=من يبتهتهم كبدوه الادله
دلايل(ن) تبقى على خشمه اوسوم=عوجٍ صطاويها سوات الأهه
وغير النبي ماحدٍ من العيب معصوم=ماكثر طعون الخلق تحت الاجله
اللي يجيب الهرج ويودي علوم=بيس الطبيعه والردى عادتله
جعله عن الجنه بعيد ومحروم=الله لا يجزاه خيرٍ جزله
في يوم يحشر فيه ظالم ومظلوم=ملطٍ عرايا الجن والانس كله
ادعو معي ترا الدعاء يالملا اسهوم=عسى تصيبه دعوةٍ ماتزله
اخبار وصلتني وانا قبل مزحوم=واخيلها يوم اقبلت مستهله
هملولها ابيض كنه الشعف مبروم=مع دربها مايضل شي امحله
تردم بردها خلفها كنه رجوم=ردم المرو مردوم في عبلتله
واللي يتيه الدرب ماهو امرحوم=السيل باقي مطلعٍ ماوصله
وانا المزيني يانكشف كل مكتوم=وربعي سنان الشلف ولسيف سله
يوم السما صافي ولا دونه اغيوم=ياسعد منهو لابتي لابتله
حرب بطشوا بالترك واحتلوا الروم=اقروا عن التاريخ في صفحتله
حنا رجال الحرب للحرب زيزوم=واللي يبي يهومنا نستحله
وانشيم الطيب وعن الخطا انشوم=قبيلةٍ في سلمها مستقله
دستور حرب اللي صدر فيه مرسوم=من روسهم دستورهم مصدرله
سلمٍ لنا ما نبتدع غيره سلوم=دايم عزيز وعزته من هلله
وان قامت الشعار ببحورها تعوم=حنا اسوات الحوت في غبتله

 

 

 

 

[معلومات العضو عبدالله الحافر الغييثي]

وعاده كلام قليـل العـرف مسمـوم=قد قالها غيـري وانـا شاهـدٍ لـه
والكذب لو يفلج به الخصـم مذمـوم=يقطعـك فـوزٍ فيـه غـدر ومذلـه
هو الردا وترا الـردا حيلـة رخـوم=والا تـرا الطيـب ماهـو حيلتـلـه

الشاعر الكبير/عبدالله المزيني لله درك على هالقصيده النادرة والحكمة المتناهيه.. صح لسانك واعتلى شانك يالقرم تقبل مروري وفائق احترامي

 

 

 

 

[معلومات العضو محمد.الودعاني]

الشاعر الكبير/عبدالله المزيني

صح لسانك واعتلى شانك وبيض الله وجهك ع القصيدة الكفوو

محمد الودعاني

 

 

 

 

[معلومات العضو مبارك بن شافي النتيفات]

الشاعر الكبير عبد الله المزيني

ونعم بك وبربعك وصح لسانك على هذه الدرر

شاعر جزل ومبدع

تقبل مروري

 

 

 

 

[معلومات العضو محمد مطلق آل بريك]

الاخ والشاعر / عبدالله المزيني
صح لسان ملياااااااااااار يالقرم


شاعر مبدع

تميزت قصايدك بالحكمه والجزالة


تحياتي وتقديري ..