خالد ! دخيلك يالخوي . وجد الكتابه ! وشبلاك؟

[معلومات العضو وجد الكتابة]

[[صباح الخير صباح الشوق صباح الطيبة
حبيت اليوم نغير مع بعض عن الروتين فاليوم احدى المحاورات اللي كانت بيني وبين الاخ الشاعر نايف والاخت الشاعرة عيون الكون على الله تعجبكم وتسريح في خيالكم
ماابي اطول وانا ماني روااد الخطب والمقدمات

وجد الكتابة

بيني وبينك يا البحر نايف ونايف لك سمـي
يا ليت تقدر تقنعه يبعـد ويتركنـي معـاك

في خاطري نسمة هوى شفته يناديها ازهمي
وجد الكتابه وارجعي للي قضى عمره فـداك

نايف فديتك يا الخوي ان كان تفهم بالومـي
عاشق وصدقني اذا قلت العشق نصفه هلاك

قلبي هوى من تعشقك والقلب ماهو ادمـي
ودي اصرح باسمها لكن يجوز افقد رضاك !


الشاعر نايف

يوم ٍ قريتك ياقوافـي الوجـد ردّدت بفمـي
ياويل ويلك يالبحر خالـد تـرا والله نـواك

خالد وربي اسمها مع رسمها يجري بدمـي
خالد ترا لو تعشقك تبي تنوّر لـك سمـاك

خالد ترا بنظراتها وبسماتها قمـت احتمـي
شف دمعتي واحكم علي تبي تكف عني بلاك

وجد الكتابه إبتعد تراهـا توصـل للرّمـي
أرميك بسلاح العشق واثوّر بخافي صفـاك


وجد الكتابة

صدقني لو كان بيدي ما جيتك اشكي مظلمـي
لكن خفوقي يا ولـد تعبـان وشفـاه بـدواك

ان كنت صاحب صاحبك فاجعل حصادك مغنمي
وان كنت باخل بالعطى فالله يجازيـك بعطـاك

لو قلت لك من دونها يمكن عيونـي تنعمـي
لا صارت عيوني مطر تدمع وهي تطلب رجاك

ارجوك نايف قلها وش يعربي! وش اعجمي!
وان العرب لا جيتهم ما عندهم انـزح وراك


الشاعر نايف

أذكر ليامني بكيـت بحضنهـا رحـت ارتمـي
واذكـر يدينـي بيدّهـا يازيـن ذاك الإحتكـاك

واللحظه اللي تغيب عني وماتشعشـع أنعمـي
صارت أساس ف ملعب القلب وتصوّب فالشباك

خالد ترا هذي البنيّه دنيتـي .. هـي موسمـي
أذكر تقول (( انته يانايف ماعشق قلبي سواك ))

شبّكت سور بقلبها والقلـب لعيونـي امحمـي
خالد ! دخيلك يالخوي . وجد الكتابه ! وشبلاك؟

عيون الكون

ضاع العشق بين القلوب كلا(ن)يقول انا تبي
محدن سأل قليبها بارضك اهو او في سماك

ياسامعين قولي ترى اقلوبنا بحكم القوي
رب العباد امصرفن القلب مايمشي هواك

يانايف وخالد ترى قلب البنيه مو ابكمي
قول العواذل اتركوه وشد بيمنيه يمناك

اشعاركم تملك قلوب وتسكت لساني وفمي
لكن هوى قلبي نطق ياخافقي محدن سواك


وسلامتكم واتمنى ان ارتقي بشعري وبمحاوراتي الي قلبوكم
تقبلوا اعذب الوجد

وجد الكتابة

 

 

 

 

[معلومات العضو جذابه بنت ذيابه]

نص جميل جداً ..

كـ جمال شاعريتك ..


لكـ الشكر حتى ترضى ..

على امتاعنا هنا ..



دمت بخير ..

 

 

 

 

[معلومات العضو شيهانه بكف صقار]

روووووعة

صح الله السنتكم

ولاهنتم

 

 

 

 

[معلومات العضو برنسيسه الريــــاض]

صــــــــــح الله ألسنتكم أبدعتم

 

 

 

 

[معلومات العضو الشـيخه]

محاوره رائعه ياوجد

صحت السنتكم ويسلم راسك

ولوكان يسمحون تنزل محاورات شاعرات مع شعار

كان نزلت محاوراتي اللي لعبتها بالمنتديات

تحيتي وتقديري لك