لاد بن مسعر ليا جات الصمايل

[معلومات العضو أبـ ريماس ـو]

قصيده قالها الشاعر محمد بن باني المخاريم في حفل الشيخ بندر بن ظافر بن هلتان ال ابو سباع

بسم من ينشي هماليل المخايل=ربنا اللي ما خسر من يلتجي له
زان بدع القاف و اعلان الجزايل=في محلٍ من بغى الكيف يعني له
عند بن هلتان كساب الجمايل=ذاك بندر راعي اليمنى الطويله
للعلوم الطيبه و العز نايل=يكسب الجزلة و لا يرضى الهزيله
طيب الهقوات عنه الشك زايل=ينقل الحمل الثقيل و يرتكي له
مجلسه مدهول في ليل و قوايل=كنه الهداج من يضما يجي له
وسطه صحون عليها كل حايل=وعودٍ ازرق تابعٍ بنه وهيله
عند قرمس عادته كسب النفايل=ومن صناديدٍ مواقفهم جليله
هل صخاف الشول مروين الصقايل=لا تعلو قرح الخيل الاصيله
عزوةٍ بالطيب تعرفها القبايل=و تفتخر بامجادهم كل القبيله
عزوةٍ جابو معبسة الشمايل=ومن غزاهم كسبهم جيشه و خيله
عقب ما خلو عليه الطير مايل=و يتّموا لاطفال و أرملت الحليله
لاد بن مسعر ليا جات الصمايل=لا نظرهم خصمهم عجل رحيله
لابةٍ من روس ماضين الفعايل=الدواسر صانعين المستحيله
خصمهم دايم على كبده ملايل=كل كيلٍ كيلهم من فوق كيله
ميزةٍ فيهم من عصور الاوايل=مجد قومٍ يرّثه جيلٍ لجيله
ذا كلام اللي على قوله دلايل=شاعر و ان قيل منهو ينتمي له
من مخاريم توطي كل عايل=الزحول اللي مواقفهم نبيله
لاشتبك عجٍ وبارود الفتايل=و غطرفت بالصوت ضافية الجديله
و السيوف مجرده و الدم سايل=خصمهم دايم يعود بالفشيله
و الختام بذكر منهو خير قايل=الرسول اللي لنا نور ودليله

 

 

 

 

[معلومات العضو ابو حسين الدوسري]

والله ومليار نعم ولاتسد ويستاهلون المدايح لاد مسعر ولايهونون الباقين
وصح السان الشاعر الكبير محمد بن باني المخاريم
وتسلم يمينك يبو ريماس نومستنا باهل القصيده الشامخه
والله يعز الدواسر وديارهم
خالص الشكر وتقديري لشخصكم الكريم

 

 

 

 

[معلومات العضو فهد الغريري]

صح الله السان الشاعر الكبير محمد بن باني المخاريم ولا هيب غريبه على الجزاله ويستاهلون المساعره جعلهم المعزه وعز الله كفو بالشيخ بندر بن ظافر بن هلتان ال ابو سباع ولاهنت يابوريماس على طرح القصيدة

 

 

 

 

[معلومات العضو راشد المسعري]

من مخاريـم توطـي كـل عايـل
الزحـول اللـي مواقفهـم نبيلـه

كفو والله بلاد المنيعي

صح لسانك يابو ريماس ولسان ابو باني الله يبيض وجهه دايماً حاضر في محافل بني عمه

ويستاهل الممدوح ماقيل فيه ، وآل هلتان كفو وأهل للمدح وما قيل فيهم

لاهنت يابو ريماس ،،،