(( الملاحم الدوسرية )) لـــ "محمد السديري" و " خالد السديري" و " مسعود المقيبلي"

[معلومات العضو عبدالرحمن الشرافي]

أخواني الأعزاء ,,,

مرتادي الموقع الرسمي لقبيلة الدواسر

أضع بين أيديكم هذا الموضوع المعنون بـــ (( الملاحم الدوسرية ))


واللذي يحتوي على قصائد الملاحم الدوسرية للشعراء :


1- الامير/ محمد الأحمد السديري (( رحمه الله ))

2- الأمير/ خالد الأحمد السديري (( رحمه الله ))

3- الشاعر/ مسعود المقيبلي (( حفظة الله ))




( 1)

الملحمة الزايدية لــ/ الامير/ محمد الأحمد السديري (( رحمه الله ))

يقول فيها:

1-عفـا الله عـن قلـب يزيـد عنـاه"="وداعـي غرامـه للغـرام دعــاه
2 ماطـاع عـذالٍ يعذلـه مـن المـلا"="وان سمـع عذالـه يزيـد عـنـاه
3 إلى توسـع خاطـره ربـع ساعـه"="على الضيق داكـوك الهمـوم نحـاه
4 قلب بـراه مجـادل الضيـم والعنـا"="الضيم مـن بيـن الضلـوع بـراه
5 دع القلـب ياعـذال خلـه بغايـتـه"="هـواك مايتبـع طـريـق هــواه
6 دع القلـب ياعـاذل عذلـك يضـره"="يزيـد يـاعـاذل علـيـه شـقـاه
7 كونـه الايــام لـيـن أوجعـنـه"="وعزى لمـن حـر الزمـان كـواه
8 يكويه من هجـر النياحامـي الطنـا"="يضيـق بـه ممـا دهـاه حـشـاه
9 يحـن حنـات الخلـوج لجنينـهـا"="والخلـج مفهـوم تـحـن ظـنـاه
10 ماحزنهـا حزنـه ولاربـع مـابـه"="وحيـاة مـن نشـا السحـاب بمـاه
11 على جادلٍ ما شافـت العيـن مثلهـا"="احيـا بذكـري مـن هويـت لقـاه
12 عشيري شرابي من مناظيم مبسمـه"="يجلا عـن القلـب الدريـك ظمـاه
13 اداريه عن شىء يحسـه ويغضبـه"="وإلى زعل يصعـب علـى أرضـاه
14 ان دك بي من حامى البين هاجـس"="وجرعت مـن حـر الغـرام طنـاه
15 تذكرت مـن طلابـة الجـود نـادر"="رفيع الذرا عسـر الـدروب مشـاه
16 مشى بدرب المجد والنفـس تدفعـه"="الى شامخ عسـر الـدروب سنـاه
17 خالد سنـام الطيـلات بـن فيصـل"="حجا مـن لجابـه والزمـان وطـاه
18 ابشكي على فرز الوغى جاير الهوى"="شطون الشفـاوي والشفـاوي تـاه
19 قـد تـاه ببحـور الغـرام المظلمـه"="دليل الخطا عـن مـن يريـد نحـاه
20 نحاه عن حـي يـوده مـن المـلا "="وما فـات مـن يـومٍ يزيـد غـلاه
21 غـلاه فـي قلبـي تجـدد علايمـه"="وتكتب على القلب الدريـك اسمـاه
22 اسماه وأن عرضت مع الناس صفقت"="محانـي فـوادى والحبيـب رمـاه
23 رمـاه بسهـوم المحاجـر وجندلـه"="قليل الفـزع ظلـم الحبيـب دهـاه
24 دهـاه بالفرقـا وقلبـي لـه انتمـا"="يتلـه ومـن بيـن الظلـوع لـواه
25 لواه يوم انه علـى الحـب يلتـوي"="ومـن دينـه ديـن الجميـل اوفـاه
26 اوفيه بالروح العزيـزه ولـو غلـت"="روح تبـي روح تـحـب جــزاه
27 اجـزاه لـو انـه رمانـي وجادنـي"="يمحا خطـا الغالـي عظيـم إرضـاه
28 إرضاه يبهج خاطري عقب ضيقتـه"="ويرتـاح قلـب بالـفـؤاد فــراه
29 فراه فـي وسـط المحانـي وعذبـه"="وان عذبـه سـهـل علـيـه أدواه
30 دواه عـنـده سبـايـب مصايـبـه"="واشفـاه مـن كوثـر نظيـم شفـاه
31 ارجيه لو دونه مـن النـاس حاسـد"="رجــاي بالله ماقطـعـت رجــاه
32 ارجيه لـو دونـه جمـوع تصدنـي"="وحبل الرجا يضفـي علـى رشـاه
33 وقد قيل للعراف في ماضـي مضـى"="هـذا لـهـذا مــن هــذاك رواه
34 يمنى بـلا يسـرى قليـلٍ حصيلهـا"="ورجـلٍ بـلا ربـع يخـاف اعـداه
35 ماهبلك ياباغي مـن النـذل فزعـه"="رجواك مـن عنـد الجبـان سفـاه
36 رفيق الرخا ينسـى مـودة رفيقـه"="ليا ضاق به شيـن الزمـان نحـاه
37 عوين الدهر مايامن الجـار جانبـه"="وليـا عـرض للشامتيـن شـنـاه
38 على داره السـودا تبنـي خيامهـا"="عوين الدهر شيـن السـواد غشـاه
39 خذ يالبيـب القلـب منـي وصيـه"="حميدان في ماضـي الزمـان لقـاه
40 إختـر مـن الخـلان حـي تــوده"="تسبـق علـى فعـل الجميـل يـداه
41 دليل على العليا بعيـد مـن الخطـا" ="الطيـب فـي دنيـا الحيـاة مـنـاه
42 ماجال في قلبه مـن الخـوف جايـل"="وان كـاد مرقـا الطيـلات رقــاه
43 ولا ضعف النفس العزيـزه الجارتـه"="ولاهروولـت للمحصنـات إخـطـاه
44 يفرح به العانـي ليـا حـده القصـا"="وللضيـف معسـول الكـلام نـبـاه
45 وان جاك من يمـة معاديـك ريبـه"="مـن قبـل ماتاطـا عليـه وطــاه
46 صديقك صديق لـه وضـدك يضـده"="وعلى روس عدوانك تديـر رحـاه
47 هـذاك حطـه لـك رفيـق موالـى"="عونـك ليـازاد الـزمـان بــلاه
48 مايفصـل الـقـالات الا رجالـهـا"="ولاكـل مـن شيـد بنـاه حـمـاه
49 ولا كل من ركـب الجـواد عدابهـا"="على حامـي الهيجـا وحـر لظـاه
50 ولاكل من نـوى لـدار رحـل لهـا"="يمـوت مالـحـق هــواه إمـنـاه
51 ولاكـل مـن رام المراجـل ينولهـا"="ياعسـر مقضبهـا علـى يمـنـاه
52 ولاكل من ركـب المطايـا غزابهـا"="ولاكـل مـن رام الغـريـم قــواه
53 ولاكل مـن يبـرم عهـود وفابهـا"="يطغـى علـى فعـل الجمـيـل رداه
54 ولاكـل مـن ودع لسـر يصـونـه"="وكـم واحـدٍ سـر الصديـق أبـداه
55 ولاكل مـن حصـل حـلالٍ صخابـه"="يبيـن بالوقـت الشديـد صـخـاه
56 ولاكل من جالس هـل العلـم عالـم"="وكـم عالـمٍ ضـر العبـاد خـطـاه
57 ولاكـل مـن نالـه جميـلٍ يــرده"="ولاكل من شـاف الحريـب نصـاه
58 ولاكل مـن سـل السنـان صطابـه"="يمـوت وسنانـه جضيـع إخـبـاه
59 ياناشـدٍ عنـي وانـا لـي قبيـلـه"="لهـا المجـد زايـد بالرفـاع بنـاه
60 وكمل مقام المجـد عامـر وشيـده="طريـق المعالـي للدخيـل مـشـاه
61 كونٍ جـرى علـى واضـح النقـا"="الاشراف جضت مـن عظيـم بـلاه
62 مزنٍ تزبر فـوق سلـى صواعقـه "=" تشظّف من خشوم الجبـال حصـاه
63 نشا من ثنايا برك ترعـد مخايلـه "=" من الشرق غيظ بالصـدور حـداه
64 غيظ مخيف يطحن الغيـظ والغضـب"="وماطال مـن روس الخشـوم طمـاه
65 امطر على الاشراف وانهـل وبلـه"="عليهـم تنثـر بالغـزيـر طـمـاه
66 قوز الشريف اكبـر علايـم دلايلـه"="سيلـه تدفـق هـد كــل انـيـاه
67 سيله عجاج الخيل والبيـض والقنـا"="وروس النشامـا بالحـزوم غثاه
68 تشهـد علـى ماقلتـه العامـريـه"="جضت أسبيـع مـن عويـل ابكـاه
69 تبكي على فتخـان الإيمـان غلمـه "="تعشوهم اللـي بالحـروب اعصـاه
70 والضبعـة العرجـا تعشـا بدربهـم"="وكـم ضيفـوا ذيـب يجـر إعـواه
71 والطير يلقى البر من ضرب شلفهـم"="مضاريبهـم يعـي الطبـيـب إدواه
72 وش حل بالاشراف غالـب وراجـح"="اقفـو كمـا صيـد حدتـه إضـراه
73 اقفو على قب تخافـق مـع الوطـا"="تنـازا بطوعـات الرقـاب حــذاه
74 من ولب عطبين الهوايـا آل زايـد"="لهم صانع السيـف الصقيـل حنـاه
75 حناه وارهـف شذرتـه يـوم كملـه"="وعطاه لمن هـم بالحـروب عـداه
76 حيث أنهم يروون حـده مـن العـدا"="بأيمانهـم روس الفهـود عـشـاه
77 إلى عـدا فيهـم حريـب وزارهـم"="يعدلـون بحـدود السيـوف صغـاه
78 وجريس ماطاله مـن الظيـم طايـل"="اسود الشـرى عمـن يبيـه حجـاه
79 اسود الشرا بالضيق تنجي دخيلهـم"="ويـروون مـن دم الرقـاب ظمـاه
80 فكوه ثم اغنـوه يـوم انـه التجـا"="وجـه أبـن بـدران يزيـد ضيـاه
81 تجمل مع جريـس اليمانـي وعـزه"="الزايـدي يـوم الدخـيـل عــداه
82 يشهد العامر مامضـى مـن فعايلـه"="يـوم إن غالـب بالجمـوع نصـاه

الكاتب الأصلي / العضو: الودعاني

لمشاهدة الموضوع الأصلي : http://www.alduwaser.org/vb/showthread.php?t=8







( 2)

ملحمة الأمير/ خالد الأحمد السديري (( رحمه الله ))

يقول فيها :

رياض العشب وبروق الوسامي=وعشب الروض بعد السيل زامي
زهت ريضانها واقفا قشرها=وطاب النبت في درب القدامي
تدوج بها المها تلع الرقاب=جفار الريم وخشوف الادامي
عليهم من هوى قلبي وصايف=لولا الثقل ووسوم الزمامي
وميزهن عن جم الرواما=عطور الهند مع دق الوشامي
يشابهن المها باشكالهنه=وحذرهن والتهايا والريامي
غصون ماظهر فيهن ثمرها=غراغير غضيضات توامي
عماهيج تضيع بها الوصايف =نواعم ماو سمهن اللكامي
رعن اثمار قلبي واحرقنه=صبايا الحور وبدور التمامي
غطاريف عطاهن من خلقهن=خدود مايغطيها اللثامي
انا اللي من عسل حمر الشفايا=شربت وطاب لي شرب المدامي
احن لهن ولو اني بعيد=حنين الخلج في وسط المضامي
واجنبهن خوف من خطرهن=ولو اني عليل القلب دامي
اخاطبهن وارجي عن عطاهن=بما خص المناهيد الزوامي
يعاملني بعفوه عن خطاي=زمان راح باخطاء جسامي
شربت من الهوى كاسات خمر=زمان طاب لي عهده ودامي
وطلقته طلاق بدون رجعه=وتبعته غرامي والهيامي
لحا الله الليالي وش بلاها=الى اقفا عام نحس حل عامي
يسليني عن الخفرات واسلى=لو اجذب للعذارى بالخزامي
وصوت(ن) نسمعه باذني وقلبي=يناديني وينسيني غرامي
يناديني لفعل الجود ((زايد))=اسنافي يضيم ولا يضامي
ترفع بالحسب حتى تعلا =ويشهد له يماني وشامي
شهود بانه اكرم من سكنها =بفيض مثل مامور الغمامي
وخلف عصبته بيض الوجيه=عليهم كل مانصبح سلامي
تمادو بالجدود وبالحدود=ديار وحشوها للنعامي
وعادات تورخها السنين=سجل معرض اخباره واقامي
وقلطات وقايعها فجايع=رعوا بظلالها عشب الوسامي
رعوا قطعانهم في كل خايع=من ارض الشام لين حدود يامي
فعول لا علالي فعلها=بسوالف وترديد الكلامي
ولولا فعلهم ماجنبوهم =ولاشربوا عذيات الجمامي
وقفوا مع جارهم حتى اضمنوا له=عن اقدار الولي رب المقامي
ومن شاف العزازي في عيونه=اقام بكل ماله واستقامي
حموه(( اولاد زايد )) في حماهم =الى صدر ردى الخال ضامي
غذايا > (الازد)< والا الجد ( زايد) -1- = حمول الخيل مبعدة المرامي
بنو فوق السحاب قصور مجد=ورفعها عامر الحر القطامي
كرام يمنون اللي زبنهم=الى ضاع الحلال من الحرامي
مراهيف خذوها ماشروها=تضيع بها مشاهيب الظلامي
مراهيف ضرايبها رزايا =غدا فيها الطبيب مع المحامي
صقيلات يشيلن المناكب =يتادن بالذهاب وبالعدامي
غزوهم بالشريف ونوخوا له =بنهار حامي والهوش حامي
انصحوه اللي يعرفون الدواسر=ولكنه عن الشور متعامي
اتلوعه القرادة والعبت به=وعلى وجهه ردي الحظ هامي
يبيهم يرخصون اللي زبنهم =مثل من عض له راس البهامي
فزوع من يمينه ومن يساره= جنود مثل عمدان التهامي
تكاثرهم وهو قلبه غليل =غليل القلب والله مايلامي
وركبوا له على قب المهار=(دواسر) وردهم ورد الظوامي
على صفر يسابقن المنايا=وشهبٍ لقموهن اللجامي
(دواسر) ماختلف فيهم فحلهم =نسبهم جدهم من عهد حامي
(دواسر) كل ماحلوا تعلوا=لهم راس العقيرة والسنامي
(دواسر) بالمخافه ينزلون=وسباياهم تروض للصدامي
تعلوا بالعوالي والمعالي=غذايا الجود شجعان كرامي
يدوسون الخطر ويحطمونه=وشمس الظهر غاطيها الكتامي
الاول عدهم والناس تدرى=الى عد القبايل واللحامي
ولولا الموت ماخاف الجبان=وهام المرجلة ولد الخمامي
ولكن المنايا والسهومي= تحكم ان الشجاعه ماتسامي
ومن صحت دروب المرجله =يعرف ان الشجاعه ضرب هامي
يعرف ان الكرم والجود يبقى=الى قلت مروات اللئامي
ولايصبر على العيلات قوم =بواتع مابها رخوا الخزامي
يحسبون الليالي ومابدت به=ويجزون الخطا بالانتقامي
وذي عادات عطبين الضرايب=حموها بعهد حام وعهد سامي
على قب يشيلن المنايا=يعالحن الاعنه والرشامي
تضيق بها فضيات المفالي=ويردون الخطر ورد الحيامي
رجال(ن) هربوا جمع الشريف=تجفله الاظله والعدامي
زيارة نجد مايرجع عليها=وعنها راح مروح التهامي
يشوف بعينه اجموعه تداس=وجوهن عفروها بالرغامي
عزم واقفى عن الديرة واهلها =وهو طمع(ن) بها وقت الصرامي
ترك كل السوالف والمراجل= وجنب صايبه مثل الدوامي
((اخو جوزا )) -2-جرى له ماجرى له=نهار فيه تبتر الجمامي
عليه الريشة الزينه خذوها=تنقلها سنافي ٍ همامي
((ابن اقويد)) على الربعه تدلى =ونزعها صيدة(ن) في كف شامي
ولاينسى لهم والفعل بيّن=الى بان القعود من القيامي
ندبهم ضارى زعل عديم=بيوم فيه طير الموت حامي
ابو تركي-3- خذى الديرة باهلها=دعاه الحظ يوم الحظ قامي
وداجوا في بحر جيزان دوجه=بقايا الموت صعبين الشكامي
وحلوا كنهم بديار اهلهم =اوردوا والمشوك له عسامي
غدا ملك (الدريسي)-4- من سلبهم =بيوم غيرهم سلبه جهامي
غنايمهم ملوك وثقوها=وصغرت عندهم لوهي عظامي
تولوهم جسرين ضواري=فعايلهم تطيب بها العلامي
تعلق بالجباه (بن زعير) =بعد ماشيدوا بيض الخيامي
وشهد نجران في فعل(( آل زايد))=بيوم فيه يشتد الزحامي
نهار فيه مايخفى الذليل=وتظهر فيه غضبات الكرامي
حموه من الجنود وطهروه=بعزايمهم وزينات المرامي
سهجهم جمع وفقين الضرايب=وتوطاهم سحاب(ن) بن هشامي
وضرب بالسلايل والنيامس=الى كابر عنيد مايرامي
ومن لامات منهم عودوا به=برجله قيد وبراسه خطامي
وشروا في عرق ابو داعر وباعوا=علوم كنها نسج الحلامي
غزا فرعون مصر بلاد يام =بدبابات وجنود النظامي
وتحدوه(( آل زايد)) واعتنقهم=عطاوي عن الهيبات شامي
وبدوه بعزمه حمرا وسله=شراة الموت موقظة النيامي
جريين على القلطات عجلى=الى هابوا قليلين الرحامي
وراجوا روجة تشفي الغليل=بعده طاب للعرجا المقامي
وحام الموت فوق جنود ناصر -5-=وغرد فوقهم ورق الحمامي
خلوهم عند بو داعر شلايا=صيام مايعرفون الصيامي
شرايدهم تبي درب السلامه=وجنايزهم مزبرة ركامي
وقالوا مانبي فيهم شفاعه=وحكمهم ضرب مصقول الحسامي
وعابن السلايل من دماهم=سيوف غضب واجسام ضخامي
رماهم بين مخلفة الهقاوي=حماة الجود وافين الذمامي
سراياهم مخالبها تصيد=وبيارقهم يطيب بها المنامي
رعى الله ديرة حلوا حماها=من ارض مغدرات الى اللدامي
احييهم جزا مايفعلونه=وابديهم بمدحي واحترامي
واعرف ان المروة ماحفظها =الى ضاعت عدا الرجال العصامي
وحقك تاخذه ماهوب يعطى =بمجهودك الى اختل الكمامي
تراك ان خذت حقك من عدوك=تلذذ بالمنام وبالطعامي
والى امنت الدخيل وعز ضيفك=عدوك عرضه روس الوجامي
كفى الله السنين ومابدت به = تجي بين المصلي والامامي

الكاتب الأصلي/ ابن محمد الودعاني

لمشاهدة الموضوع الأصلي : http://www.alduwaser.org/vb/showthread.php?t=7819







( 3 )

"الملحمة الدوسرية" للشاعر / مسعود بن سعد المقابلة الدوسري

القصيدة بصوت الشاعر




يقول فيها:

بأ سم الاله الواحد المعبود = ابدى بذكره باول المارود
واصب قافٍ كالجنيه الصافي = مثل العسل واقطع من البالود
من هاجسٍ لاناطحت قيفانه = قامت تداحم لي على المعهود
اكتب وراجع كل فعلٍ طيب = افعال ربعي كاسبين الفود
وذكر الرجال الطيبة بافعالها = هو غايت الشاعر وهو المقصود
واخير مامدح بالقصائد ربعي = ولاغير مدح الطيبين عدود
ربعي هل العادات سقم العادي = ((دواسر)) ترسي سوات الطود
خطلان الايدي (1)والفعول مجربه = من عصرنا الحالي لعصر جدود
اولاد(( زايد ))زايدين بفعلهم = وعيال ((تغلب)) كاسبين الجود
انـّا مزبنة الدخيل الخايف = ويشهد لنا ابن مطرفٍ وسعود
وانـّا ودينا جارنا من جداره(4) = بين القبائل فعلنا مشهود
وبالحرب حداد الجمل عاداتنا = وحذف السمل لاقوّس البارود
لاسيقة العطفه وشاشوا بالحدا=لعيون بيضً ينقضن جعود
فوق الأصايل والسيوف عصيهم=والباسهم من مالبس داؤود
كم خيرٍ بنحورهم ثاروبه=مع درب غيره راح منعى الخود
ونزود في وسمة عصى قصيرنا = سلمٍ لنا على الرجال يكود
ناسم عصاه ونهمله في دارنا= ايلين يطلب ديرته ويعود
مع جارنا يشهد لنا العرجاني = بأفعال( شلال ٍ) وهو مرمود
مايشكي الوجلا وحيف الحايف=من كان له لاد المنيعي عضود
جريس يثني بالكرم والجيره =وعبلان ماعن كلمته منشود
وانـّا اهل رمحٍ يظل ظلاله = في فيته روس الرجال قعود
بن صباح ومعه بن خليفة = رمح آل حسن في الموقف المشهود
الاشراف طاري (تين) قام يروعها =ووسيم تبكي عزها المفقود
يوم (ابن بدران) المسمى عامر = افرع على صفر الرمك سنود
ومن كسبنا يوم الطراد الريشة = من حاكم عنه الرجال تحود
شهر لها ابن( قويد) مقدم لابة = فزعة شيوخ تنصف المضهود
شيخٍ على شيخٍ موارث شيخة = السيف يفعل واليمين اتجود
يجر له نمراً يشوّق فعلها = تروي يمانيها عطاش العود
يقدى مقادمها ويمنع عقبها = لاعلق البيرق على العمود
يوم الخفيّف قالها بمثايله = جونا محددت الجمل بقيود
وفينا الضمين يعده الخلاوي = يوم القبائل طارد ومطرود
ومنا (وقيان) أمدحه بفعوله =وعادات أخو فرجة مقام الجود
في حظنه الميزب نهار الهية=لين انتهى الطارد من المطرود
ينسم ألواني ويمنع عقبها=وينحى السبايا لقبلن ورود
والهلقمي (بجاد) ما ننسى فعله =عند (الدويّخ) موقفه محمود
و(حزام ) اعده معه منا خمسه =مع من بنا مجدٍ تلته مجود
يشهد له معزي وباب المصمك= وشلفى (فهد) في بابه المردود
وفينا بعيدين المغازي عاده = جرات (ابن عواد) مرذي القود
وأثني على (ابن حفيظ) راع الردة = نعم بفعله والعدو ملهود
زهم (ابزايد) ونتخى في لابته = مال الفتى عن يومه الماعود
وثلاث قبٍ يركبن الحيهن = من بندقٍ له ضربها وكود
وزيد الخويري ستر ابل قصيرته = في ساعةٍ حوض الدرك مارود
ونا هل الست المهار القرح = يوم الرفيده رده المقرود
وهل خمسٍ يشود بها بمخاضه = يوم جلوي جانا يجر جنود
ونا هل الست الركايب حنا = وهل الثمان اللي لهن عدود
وهل العشر لاد الحبيبي عدهم = والعود ينبت في محله عود
والترك ذاقوا بالملاقا فعلنا=كله لعينا باتل العبود
عند ابرق الركبان طيب فعلهم=لاد الحريجي فعلهم ماكود
وناطى الحفيف الى وزى في داره = هضاب الاشرع بالصباح شهود
فيها نعن المعلفي حلايله = الجيب ولّع والنحر مقدود
وعند الخوي وقفاتنا معروفه = معيبيل له نعمين وايضا زود
ذبح ذلوله والرشاء من جلدها = واظهر خويه بالمتن مشدود
وايضا نعد الشمري خوينا =قصر به الموتر بدار زيود
بين الدهم والوايلي وعبيده=سباعٍ مافيها اولواني الرقود
تقاسموا الموتر وشالوا صاحبه =إلين أدخلوه بديرة بن سعود
وخوينا ناسم عصاه تسيّره = كن الخوي مع صاحبه موجود
ونعطي عطاياً ماوراها منّه = عطية سويقي عطى المولود
وخضير بن شامان راع الحرشى = معطي عطاياً مالهن حدود
اللي عطى في يومه امية ناقه = يوم الرجال يكودها المفرود
عزوة حسن من يومها لايومنا = مانلحق جزال الفعول جحود
وترفق مرتنا من ذرابة سلمنا = في وجه ابوها والسلوم بنود
وبيع اللحم عيبٍ علينا عايب = والماء علينا بيعته منقود
ولاناكل الفجوة ولانقبلها = عزة نفوس في فعول اسود
والضيف قدره عندنا مثلوثة=يوم القرى على الرجال يكود
و (عامر) بقدر الضيف فعله بيّن=كرايمٍ ماجا لهن نّدود
كرامته للضيف من حيل البل =تسعين غير الشاه والقعود
في ديرةٍ تجذى المناوي دونها = عنها نعدي بالنمش ونذود
ديرة نخيلٍ مايطير غرابها = ليال ظايفها ليال سعود
وديرة جهام مايزعزه النذر =منداً مساس ومنهل قرهود
دارٍ حميناها بسيف وبندق = قدام يطلع دولةٍ وحدود
بين (العتيبي )و(قحطان) وحلفهم = و(سبيع) و(المره) هل النفود
شرقيها (العجمي) بخيل وسله = وجنوبها (اليامي) الى الاخدود
يرسخ بها الغرس المظل الداجي = وترعي بها الابل بين وضح وسود
اقسومنا لامن علن سهومنا = لابيّن الصامل من الشرود
ماجاتنا عطى ولا نحايل = من حفنا ماجت بدفع نقود
بمشلشلٍ يفرى النحر مظرابه = لامن لحق لباسة الماهود
قرايع الشجعان من حفانها = سند غواربها عراض خدود
نبرى لها من فوق قب و ضمر = ننحي الجموع ونحتمي البلود
ياما نحينا دونها من نمرا = عقب الطمع وقفت بهم عرجود
هذا ونا من عزوةٍ معروفه = فرجان لاجا حاوي ومردود
انا معيلة الطراد بظربنا=لاجات بالسلات والعبرود
نواسة القيمان فوق الضمر = هذا يصبح يوم ذا مهجود
كم ذود مصلاحٍ لفوا يشعونه = بضرب القنا والصاطي المجرود
سودٍ حراب الشلف وصف آذانها = تقول ترقى مشيها سنود
نزالة القفر الخلى لاخلي = ودباشهم صوب الحفيف تقود
عساسها البراق من يم الخطر= ترعى الزهر لاشاخ فيه فنود
من مدهله يقزي الوضيحي نشرها = ترعى الطرف يوم البرى مردود
يبرى لها سردٍ عليها ندر = قبٍ عياطيرٍ عليها فهود
كم شيخ قومٍ عندها ردوبه = لامن غدى للجبخان رعود
عقب الطمع والزوم واللي معهن = في كبده الشلفا الوريع تنود
هذا قليلٍ من فعايل ربعي = ماعد غير الواقع الماكود
مثل البحر ماينقصه غرافه = ومثل الجبل يلجى به المضهود
للصاحب ظلالٍ وشهدٍ صافي=وعلى العدو همٍ وسم كبود
المدح يزهاهم وهم يزهونه = ويزين في ساس الكرم والجود
ولا قول بفعول القبائل قاصر = الاجواد تعطى حقها بالزود
الطيب ماله بالملا حكاره=حبل المراجل للعرب ممدود
لكن يبي صبرٍ وعزم وهمه=همة رجالٍ تحتمل للكود
أدرى عواقب كلمتي لا قلتها=ابذل على القول الصحيح جهود
ابي هل العرف تعشق مضمونها =واصونها من كلمة الهبود
وختامها صلوا على نبينا = عداد ماهبت هبوب النود

الكاتب الأصلي/ مسعود المقيبلي

لمشاهدة الموضوع الأصلي : http://www.alduwaser.org/vb/showthread.php?t=3049





وتقبلوا فائق التحية والتقدير

أخوكم / عبدالرحمن بن سالم الشرافي

 

 

 

 

[معلومات العضو فرحان فهد ال فرحان]

في قصيده سعود المقيبلي وردة كلمه يرصخ والصحيح يرسخ

مشاركه حلوه منك يابطل لاهنت على اعادتها

 

 

 

 

[معلومات العضو عبدالله العماري]

انشاء الله رح انزل الملحمه الدوسرية مقطع صوت تقبلو تحيات اخوكم عبدالله العماري

 

 

 

 

[معلومات العضو ابو زابن المسعري]

بيض الله وجهك يابو سالم

 

 

 

 

[معلومات العضو سعد المقابله]

بيض الله وجهك

ولاهنت على الجمع الطيب

 

 

 

 

[معلومات العضو مبارك الخييلي]

الله لايهنك علي القصائد الاكثر من رائعه
عجبني فيها
ربعي هل العـادات سقـم العـادي((دواسر)) ترسي سـوات الطـود
خطلان الايدي (1)والفعول مجربهمن عصرنا الحالي لعصـر جـدود
اولاد(( زايـد ))زايديـن بفعلهـموعيال ((تغلب)) كاسبيـن الجـود
بني عمي لي الفخر كاني منهم
ان كنت زايد وتغلبي عزالله محد قدك ياولد عمي

لاهان راعي الموضوع

تقبلوا الشكر والتقدير

مبارك بن حجاج الخييلات

 

 

 

 

[معلومات العضو خصيم نفسه]

بيض الله وجهك

 

 

 

 

[معلومات العضو مـّسـفــرٍ ال شآمس]

الله لا يهينك يا الشرافي مجهود تستحق جزيل الشكر عليه صح الله اللسان الشعار ويرحمهم

وهذا الملحمه الزايديه بصوت الامير محمد السديري ضيفه على مجموعتك



تقبل كل حترامي وتقديري اخوك وبن عمك مسفر ال شامس

 

 

 

 

[معلومات العضو ذيب أمعط]

لاهنت يا الغالي على الموضوع

وجعل يمناك ماتعطب وبيض الله وجهك

ولا تحرمنا من مواضيعك الطيبه جعلك تحيى

وتقبل مروري


اخوك وابن عمك/محسن بن راشد بن محسن الغريري الدوسري

 

 

 

 

[معلومات العضو عبدالرحمن الشرافي]

المشاركة الأصلية كتبت بواسطة فرحان فهد ال فرحان

في قصيده سعود المقيبلي وردة كلمه يرصخ والصحيح يرسخ

مشاركه حلوه منك يابطل لاهنت على اعادتها

لاهنت على الملاحظة

ولاهنت عالمرور


تحياتي

 

 

 

 

[معلومات العضو م.فهد الدوسري]

عبدالرحمن الشرافي بيض الله وجهك ورحم الله محمد السديري وخالد السديري وصح لسان مسعود المقيبلي

 

 

 

 

[معلومات العضو ابن محمد الودعاني]

لاهنت يابو سالم في تجميع هذه الملاحم الدوسرية الشامخة

وبيض الله وجهك على مجهودك وتسلم يمناك على الابداع

 

 

 

 

[معلومات العضو عبدالعزيز الشكرة]

لاهنت يابو سالم في تجميع هذه الملاحم الدوسرية الشامخة

وبيض الله وجهك على مجهودك وتسلم يمناك على الابداع

 

 

 

 

[معلومات العضو لين]

ملاحم شعرية رائعة من شعراء متمكنين في مدح قبيلتهم التى هي أهل لكل ما قالوه وأكثر ... فهذه الملاحم سوف تبقى مضيئة ويتغني بها جيل بعد جيل من أبناء هذه القبيلة المعروفة بصفاتها الطيبة. فشكراً للأخ عبدالرحمن الشرافي على وضعها حيث تمكنا جميعاً من الإستمتاع بترديدها .

 

 

 

 

[معلومات العضو غربة وطن]

بوسالم لاهنت وبيض الله وجهك

عزالله انك ما قصرت

سلمت يمينك

وسلامي لك