تكفون يالمخاريم ، قصيدة نخوه موجهه لـ( لاد المنيعي)

[معلومات العضو العماني]

بسم الله الرحمن الرحيم


هذه قصائد لبعض الشعراء موجهه للقبيلة الأبيّه ، قبيلة المخاريم العريقه ، يهيبون بهم الاعتاق عن رقبة ابن العم محمد بن دحيم الرجباني :


القصيدة الأولى للشاعر لأبن مدعث الهواشله :

يا الله الا ياالله يارحماني =ياخالق الانسان والاكواني
الوذ بك من كل شر مقبل=واعوذ بك من نزغة الشيطاني
واطلبك عفوك والرضا والجنه=في ساعة فيها يجف الساني
وعن كل فعل مايطول وجهي =انا دخيلك ياعظيم الشاني
وانا دخيلك في النهار الكايد =عن موقف الرديان والحقراني
ياربعنا ياهل الوفا والطوله =يوم الوغى يامزبنين الجاني
يا(( لاد المنيعي)) صاملين الوقفه=لاجاء لعج المعركه دخاني
لـدّوا علي وبرقّـوا في قولي=واصـغوا لي الألباب والآذاني
اليوم جاكم من يبي فزعتكم =وانتم لصياح الضحى مزباني
جوكم من( الرجبان) ربع(ن) تزهم =ينخونكم ويعلقون العاني
جاهم من احداث الليالي بلوى=مصيبة ترجف لها الابداني
ومصايب الدنيا كفا الله شرها =ماتضرب المبلي بعود الباني
ماهيب ديباج حرير ناعم =ولاهيب ذعذاع عقب هتاني
مصايب الدنيا صقيل قاطع=يفصل مابين الراس والامتاني
ومصيبة حلت عليهم عظما =وانتوا لها ظل وذرا وكناني
ومصيبة اعيال العمومة وحده=وعند المصايب يصبحون اخواني
تكفون(( يالاد المنيعي)) قوموا =قوموا مقام يعجب الاعياني
وتكفون ((يالاد المنيعي)) فكوا =محمد ابن دحيم لو هو جاني
تكفون ((يالاد المنعي)) لبوا =لبوا الندا وانتوا طوال ايماني
حق عليكم تبذلون الواجب=للمستغيث اللي يجيكم عاني
الذكر يبقا والمواقف تذكر=والا ان سيور البن آدم فاني
فان لا احدن يصد من اللزوم الحاضر =ولاحدن يقول الامر مايعناني
ما للعفوا حق يكون الجنّه=والخير والمعروف والاحساني

وهذي قصيدة أخرى للشاعر سلطان ابن ناصر الروقي العتيبي :

يادواسـر والله انكم عليها قادرين =والمغني قال يازينها في حلّها
يستحق الفزعة العون بالعلم اليقين=الجزا خذاه عجف السنين وذلها
يا ((مخاريم)) العفو والعفوا ياغانمين=اعتقوا( ابن دحيم) ياهل الشهامة كلها
والله ان رفيقكم غالي ومقدرين =والبلاوي تبتلي والمواقف من لها
اي اهلها ((يامخاريم)) يادرع المكين=ياجبال الهضب ياللي يضلل ضلها
فكوا المظهود ياهل الظفر ومجملين=الجمايل والظفر والمراجل كلها
وهيه ياراس المروه وياوال السجين=ياجملها فك قيد السجين وشلها
يرحم الله ميتك كاسب دنيا ودين=زلها ياللي تشيل الثقيلة زلها
يا (ابن حمران) المسمّى عشير الطيبين=يا (مبارك) يارجا من رجاك تحلها
شر عليهم كلهم وادرك الدعوى بحين=الاجر ثم الاجر والجمالة كلها

وسلامتكم

تقبلوا تحياتي،،

 

 

 

 

[معلومات العضو سلطان بن دخيل الله]

بسم الله الرحمن الرحيم

اسئل الله ان يرحم موتانا وموتاهم ويسكنهم فسيح جناته ولاد المنيعي عوايدهم

العلوم الغنمه وسباقين عليها وهم اهلها وان شاء الله بيجي بني عمهم منهم

مايسر , وذلك علم غانم بالدنيا, ولعلمهم مال اعتاق الرقبه من اجر عظيم عند الله


وبيض الله وجهك يابومبارك على هذا الموضوع الذي حرصت فيه على توصيل الرساله

التي نأمل ان تصل الى بني عمنا ويكون لها الأثر المأمول وعسى الله يطول عمرك ويديم

وجودك علومك تشرف وتبيض الوجه يانسل الاحرار,


وصح لسان كل شاعر استخدم شعره في مثل هذه المواقف واسئل الله ان لايحرمهم

الاجر اللهم امين

 

 

 

 

[معلومات العضو عبدالعزيز عبدالرحمن الفوزان]

عقيد المنتدى الغالي بيض الله وجهك على هذه اللفتة غير المستغربة منكم وسأل الله أن يجعلها في موازين حسناتك وأذكر أن بعض أهل العلم ذكر أن العفو أفضل في كل الأحوال وأنه خلق الأنبياء كفعل رسول الله صلى الله عليه وسلم مع قريش يوم الفتح، وفعل أخيه نبي الله يوسف عليه السلام مع إخوته. ولقوله تعالى ( فمن عفى وأصلح فأجره على الله)؛ ولم يحدد الأجر وهو الكريم سبحانه وتعالى. كما أن من أحياها فكأنما أحيا الناس جميعاً، وكذلك فإن أعمال الخير التي يقوم بها المعفو عنه يرجع مثل أجرها على من عفى عنه فله صوم كصومه وصلاة كصلاته. أسأل الله العفو والعافية في الدنيا والآخرة وأن يغفر للمجني عليه ويتجاوز عنه ويسكنه فسيح جناته ويحنن ذويه على العفو من الجاني من بعد أن نزغ الشيطان بينهما.

 

 

 

 

[معلومات العضو مبارك الخييلي]

نسئل الله لهم العفو من بني عمنا



وأنشالله بتبشرون أنتم عنزتم الأمر ل لاد الرجبان


عزالله ونعم الفخذ


علومهم عند الشيبان والقبايل الثانية وطيبهم سابقهم



الغالي أبو مبارك


كل الشكر لك لنقلك هذه القصائد



وثق ثقة تامة يبقى العرق عرق واحد وأنشالله النخوة هاذي ل لاد المنيعي ماراح يخلونها تروح هباء منثور


أبشر بعزك تراك دوسري


وقبل كل هذا


أجره عظيم الذي يعتق رقبة لوجه الله ويعفوا عنها فلله درة


أتمنى أني وفيت في الرد


فأن وصلت فلله الحمد والمنة وأن قصرت فمن نفسي والشيطان


تقبلوا شكري والتقدير

 

 

 

 

[معلومات العضو ابو زيد الغييثي]

تكفون(( يـالاد المنيعـي)) قومـوا=قومـوا مقـام يعجـب الاعيـانـي
وتكفون ((يـالاد المنيعـي)) فكـوا=محمد ابن دحيـم لـو هـو جانـي
تكفـون ((يـالاد المنعـي)) لبـوا=لبوا النـدا وانتـوا طـوال ايمانـي

يا ((مخاريم)) العفو والعفوا ياغانمين=اعتقوا( ابن دحيم) ياهل الشهامة كلها
والله ان رفيقكـم غالـي ومقـدريـن=والبلاوي تبتلي والمواقـف مـن لهـا
اي اهلها ((يامخاريم)) يادرع المكيـن=ياجبال الهضب ياللي يضلـل ضلهـا

لاهنـــت يا بو مباركـ على نقل هذه الابيات

و الشعر لدى العرب وقع قد يكون أبلغ من النثر

 

 

 

 

[معلومات العضو العماني]

بيض الله وجيهكم جميعاً على التفاعل مع الموضوع

تقبلوا تحياتي،،

 

 

 

 

[معلومات العضو ابو زابن المسعري]

الله يصح السنت الشعار ويبيض وجيههم والله يلين قلوب اصحاب الدم واسأل الله ان يضهر المسجون سالم يارب العالمين لاهنت ياهايف وبيض الله وجهك ,,

 

 

 

 

[معلومات العضو الهجرس]

اخوي هايف


لاهنـــــــــــــــــــــــــــــــت والله ..


والله يرحمه ويسكنه الجنه .. آآآمين


ابيض وجه يا ابن عمنا ..


وهذا حال الدنيا ..



والله يبيض وجه ابو مدعــــــــــث رفيقنا ...

ووجه العتيبي صاحبنا ...






يالربع لكم الشكر والتقدير والمحبه

 

 

 

 

[معلومات العضو الهجرس]

الله يرحمه ويغفرله
وارجوا حذف الموضوع