ملحمة الانصار للشاعر ابراهيم بن عبدالرحمن بن ذيب ال عريمة

[معلومات العضو ابن ذيب الودعاني]

بسم الله الرحمن الرحيم


ملحمة الانصار من نظم ابراهيم بن عبدالرحمن بن ذيب ال عريمه الودعاني الدوسري وفيها ذكر بعض مناقب ومواقف الانصار رضي الله عنهم وارضاهم حبّا لهم و اعترافا بفضلهم وجهادهم في نصرة رسولنا صلى الله عليه وسلم ونشر الاسلام في ارجاء المعموره فجزاهم الله خير الجزاء وحشرنا معهم في زمرة نبينا محمد صلى الله عليه وعلى اله واصحابه وسلم وقد تضمّنت القصيده بعض النصائح والفوائد نفع الله بها ناظمها وسامعها وقارئها.

انا اول كلامي بذكر الرحمن = علاّم مايخفى على الانسان
ومن بعده اصلّي واسلّم على النبي= شفيع امّته لانصّب الميزان
يقول ابن ذيب(ن) كلام بالمثل = في وسط صدره تقرع القيفان
هاضت هجوس الشعر وانساح خاطري = وبدع المثايل للعريمي زان
وانا الى منّي تهيّضت بالغنا = تجي المعاني كنّها الودّان
تمطر على فكر(ن) كما مخصب الثرى= وينبت زهور(ن) زاهية الالوان
واعاف من بين المعاني هزيلها =وانقى من اللي ندّر وسمان
يالله يالمطلوب ياجزل العطا = يالواحد المعبود يالمنّان
طالبك عاوني على بدع المثل = واجعل جنى غرّ المثايل دان
يالله عسى دعوة نبيّك تنوبني = اللي بها ساق المثل حسّان
ويارب هوّن كلّ ماكان كايد = ودنّ البعيده وافتح البيبان
والهمني القول السديد وقدّني = يامفهّم(ن) داوود وسليمان
الوذ بك من كلّ هم وضيقه = حيثك دليل التايه الحيران
ياماحلا في تالي الليل سجده = اغسل بها نفسى من الادران
واطرح بها ذنب(ن) على الكتف هازعه= واملى بها روحي من الايمان
اعزّ لحظاتي الى انزلت جبهتي = لله في جوّ(ن) من الجيّان
خضوع(ن) لمن هو لااله(ن) غيره = الواحد المعبود والديّان
اللي خلقنا من مجرّد نطفه = سبحان من لاراد بامر(ن) كان
هدانا الى التوحيد واللّي غيرنا = يمسي ويصبح في وحل الاوثان
وانزل علينا افضل الكتب كلّها = محفوظ من زود(ن) ومن نقصان
وارسل لنا خير البرايا محمد = اخير من يمشي من انس وجان
وشرع لنا خير الشرايع واتمّها = واظهر لنا دينه على الاديان
وسقانا من العدّ القراح الصافي = واللي سوانا مجدب(ن) ظميان
وغذانا من الزاد الصحيح وغيرنا = يمسي ويصبح طاوي(ن) جوعان
وكسانا بفضله من عرانا له الثنا = والغير جنبه كاشف(ن) عريان
وانعام ربي من شكره له يزيدها = ومن قال انا قارون ذلّ وهان
فلك الحمد ياربّي مع الشكر والثنا = عداد خلقك ياعظيم الشان
ولك الحمد وزن العرش وارضا نفسك = ومداد كلماتك وما قد كان
مالي من الاعمال وانت ابخص بي = فالسرّ عندك كنّه الاعلان
يكون كلمة لااله الاّ الله = وحبّك وتعظيمك من الوجدان
احبّك واحبّ اللي اصطفيته من البشر = ثم اجتبيته من نسل عدنان
الطاهر اللي عظّم الله مكانته = احبّه واحب اّله مع الاخوان
واحب الصحابه واتفاخر بحبّهم = غمّ(ن) على اهل الرفض والبهتان
صدّيق الامّه هو مع فاروقها = جيرة محمد حازها الشيخان
والثالث اللي جهّز الجيش وحده = الله يجازي بالثنا عثمان
والرابع اللي طيّب الله حظّه = زوج البتول وفارس الفرسان
وابو عبيده عامر مع سعد = مع الزبير وعابدالرحمن
وسعيد مع طلحه وذولا عشره = العشرة اللي بشّروا بجنان
وباقي الصحابه ماننزل قدرهم = خصّ(ن) اهالي بيعة الرضوان
واصحاب بدر اللي محى الله ذنبهم = اللي ثبتوا يوم التقى الجمعان
وياكاتب اكتب لا تناسى تكفى = اللي تبووا الدار والايمان
الانصار انصار الرسول وفزعته = هم درعه الضافي على الامتان
الانصار جعل اللي ينزّل قدرهم = يحشر نهار الحشر مع هامان
سلّوا سيوف الهند من دون النبي = وحموا جنابه والعدو مهان
اهتزّ عرش الله لموتة اميرهم = انا اشهد انه راجح الميزان
وعلامة الايمان في الرجل حبّهم = حيث انهم للدين هم عنوان
وعلامة النفاق في الرجل بغضهم = حيث انهم للمرجفه عدوان
الانصار من يقدر يضحّي مثلهم = وقت الخصاصه لا غلت الاثمان
الانصار من يقدر يسوّي سواتهم = الى عبس وجه الزمان وشان
الانصار من يمسك شبا السيف مثلهم = لاكلّحت الانياب في الميدان
الانصار من يقدر يعدّد فضلهم = ايمان واسلام وتقى واحسان
في يوم بدر(ن) يوم هبّت مكه = على عماها ساقها الشيطان
الف(ن) من الفرسان تعداد جيشهم = ومن لاغزى جهّز فرس وحصان
وحول المدينه صاح في الناس النبي = ياعصبة التوحيد ردّ الشان
اما نقابل خصمنا ونردّهم = ولاّ نعوّد كن ماشن كان
فلبّوا له الانصار والصوت مرتفع = حنّا فدى لك من عنا الزمان
حنّا فدى لك يارسول الرحمه = ولا خير في قول(ن) بلا برهان
ماهي بكلمة من زهمهم موسى = اذهب وربّك قاتلوا العدوان
والله لو تبغي بنا خوض البحر = خضناه مايطري حد(ن) نكفان
ان راده الله شفت بالعين فعلنا = فحنّا رجال في اللقا صبران
وحنين للانصار يشهد بالفخر = والله ايتكلّم لوّ فيه لسان
لكنّ ياتاريخ لا تجحدها = وياليل حدّث واحك يازمان
غارت هوازن وانفرا ثوب العزى= وعجّ الرمك ثوّر كما الدخان
وكلّ(ن) شرد يبغي النجاة لنفسه = يوم اعجبتهم كثرة الاخوان
ثم صوّت العباس للناس فانثنت = كتايب الانصار كالعقبان
قوم(ن) تناحي خيل الانصار بالقنا = ماهيب والله والشبب باقران
فمالوا عليهم ميلة(ن) تعجب النظر = وبان الذهب الاصفر وغيره بان
وجابوا الغنايم والغنايم واجد = غنايم(ن) زادت على الحسبان
ثم وزّعت بين القبايل كلّها = عمّت حضرهم واغنت البدوان
الانصار من روس العدا تنثر الدما = وفيض الغنايم راح للعربان
فاخذوا بخاطّرهم على قسمتها = ولو كان مايقصد بها حقران
فدرى الرسول وقام فيهم خاطب = وقال ما معناه: يالظفران
وش كلمة(ن) تطرى وجتني منكم = وماغاب من شيّ(ن) علينا بان
ماجيتكم ضلاّل ثم اصبحتوا = عبّاد لله من بعد الاوثان
ماجيتكم متناحرين وصرتوا = عقب التناحر بي هل(ن) واخوان
قالوا بلى ياخير من نقتدي به = ماعاش من يجزاك بالجحدان
ثم قال لو تبغون قلتوا كلمه = فيها صدقتوا والصدوق معان
لفيت من مكّه طريد(ن) زابن = وحنّا وقفنا لك كما الضلعان
ولفيت من قوم(ن) تكذّب دعوتك = وحنّا قبلناها بلا نكران
ونصرناك بالروح العزيزه وبالولد= وبالسيف الاملح والشبا والزان
قالوا لك المعروف اول وتالي = والدمع منهم تنثره الاعيان
ثم قال ماترضون بي قسمتكم = والناس تذهب بالغنم والضان
قالوا رضينا بك وحنّا لنا الشرف = انت الغنيمه واي كل شن فان
فدعا لهم بالدعوة المشهوره = يارب تجزاهم رضا وغفران
هذي مواقفهم وهذي فعولهم = نجم(ن) يشعشع في سما السهران
الله يرزقنا بجيل(ن) مثلهم = يبدل لنا عسر الزمن ليان
وانا اقول طيب الجيل يرجع للنسا = يطيب منهن وان تردّن هان
والبيض مايصلح بدون امّاته = والبيت مايبنى بلا عمدان
وقد قالها الشاعر وهو باخص(ن) بها = يضرب على معناه بالنيشان
الام مدرسة(ن) اذا اعددتها = اعددت شعب(ن) طيّب الجدّان
من شان هذا القول عندي كلمه = لك ياصليب الراس يابن فلان
لاتاخذ العذرا على شان زينها = الزين ظلّ(ن) مايل(ن) فتّان
ولاتاخذ العذرا على شان مالها = المال يفنى والزمن خوّان
ولاتاخذ العذرا تبي الجاه والحسب = كم عزّة(ن) يقفى لها هوان
لاتاخذ الا من يسرّك دينها = الدين راس المال للانسان
اللي تسرّك في وجودك عندها = وفي غيبتك حفظ ونقى وامان
البيت جنّتها وجنّة زوجها = لاهوب لا سجن(ن) ولا سجّان
سلامي على اللي ماتعرف الموضه = موضة هل التلمود والصلبان
شوف الفتاة بدارهم كيف صارت = سلعة زبون(ن) بارخص الاثمان
هذا على المسرح يجرجر بضاعته = وهذا بصورتها على الاعلان
وسلامي على اللي ماتبيّن وجهها = يرفض حياها مبدأ الهوان
اللي سقت بالدين نبت الحشمه = واثمر ثمرها في طرف الاغصان
وسلامي على اللي ماتحزم الشيله = في الراس مثل الشايب الوجعان
ولا علّقت عباتها بكتوفها = ولا قصّرت من تحتها الفستان
وخلاف ذا عندي بعد نصايح = وتراها على ماقيل بالمجّان
تجمّل بتاج الصمت في كل مجلس = ولا تظهر الكلمه بلا ميزان
ترى لسانك حيّة(ن) في جحرها = لايلدغك يابن ادم الثعبان
تبني من اعمال الصلاح مباني = طوال(ن) وهو يهدم لك البنيان
والعين لاراغت وزاغت عن الهدى = فاخير من راع البصر عميان
ياويل قاضي الارض من قاضي السما= وياويل راع الدين م الديّان
وياويل من ينفق بالايمان سلعته = وهو عند ربّي كاذب الايمان
هو مادرى ان التاجر الصادق الوفي = مع الانبيا له صحبة ومكان
ومن باع بالدنيا على الناس دينه = فيبشر على ماقيل بالخسران
ياشن قريب وكن ماهو بحاصل = نضحك على انفسنا خفا وبيان
الحيّ ياقربه من الموت والذي = ياتي قريب وتكشف الغطيان
وين القلوب اللي تذوب من الكمد = لادنّس العفّه هل الطغيان
وين العيون اللي تهامل بدمعها = لا شاهدت طفل(ن) وهو حيران
وين الثياب اللي تضايق على البدن = الى نهب سرّاقها اليتمان
وين الضمير اللي يعذّب صاحبه = لاصاب ذنب ويقلقه لاخان
وين الهموم اللي تعيّفه الكرى = لا جا ينام ومن ظلم سهران
هذي بيوت الشاعرابن عريمه = الدوسري من مارثة ودعان
تواردتني مثل خيل(ن) شرّد = تجاول وانا طوّعتها بعنان
عنانها فطنه وعشرة ندّر = زحول(ن) عواريف(ن) طوال ايمان
في الحرب سيف وفي المجاعه منسف = واهل حكمة(ن) تقطع ظما الظميان
اصوغها من خاطري طرب(ن) لها = صوغ الذهب والدرّ والمرجان
معنى الذهب يزهى على درّ حرفها = محبوكة(ن) معنى وبحر واوزان
الوزن من بحر(ن) طويل وافي = نونيّة رنّانه القيفان
تنساق من فكري على قدر طاقتي = والجود م الماجود مهما كان
وبعض القوافي لو تكرّر لي العذر = القاف شاب وفي الصدر دندان
والقصد ماهو برقة المتزيّن = خلّيت هذا لريشة الفنان
القصد معنى في كلام(ن) واضح = يحمي السليم ويبري المرضان
اهديتها هدو(ن) ولا ابغي لها ثمن= الاّ من اللي كوّن الاكوان
هذا وصلّى الله وسلّم على النبي = ماغرّد القمري على الاغصان
والحمد للي عانّي في نظمها = باسمه تعالى نختم البيان

 

 

 

 

[معلومات العضو محمد بن سالم الخضراني]

ابن ذيب الودعاني صح السانك منا لين تطلع الشمس وفيت وكفيت وقصيده جزله من شاعر جزل وكيف وهي في الانصار الذين ناصرو الرسول صلى الله عليه وسلم جزاك الله خير الجزى تقديري واحترامي

 

 

 

 

[معلومات العضو الرجباني مشاري]

ابن ذيب الودعاني صح السانك

منا لين تطلع الشمس وفيت وكفيت

وقصيده جزله من شاعر جزل وكيف وهي في

الانصار الذين ناصرو الرسول صلى الله عليه وسلم

جزاك الله خير الجزى

والله لايهينك

 

 

 

 

[معلومات العضو ابن ذيب الودعاني]

مراقبنا الغالي
محمد بن سالم الخضران

يشرفني مرورك يالغالي والانصار رضي الله عنهم لهم حق على كل مسلم كل في مجاله والشاعر ابراهيم بن عريمة استغل قدرته في الشعر ووظفها في مدح الرسول صلى الله عليه وسلم والصحابة رضي الله عنهم

جعلها الله في موازين حسنات الشاعر والكاتب والقارئ

وتقبل تحياتي

اخوك ابن ذيب الودعاني

 

 

 

 

[معلومات العضو ابن ذيب الودعاني]

الرجباني مشاري حياك الله وشرفني مرورك يالغالي

وتقبل تحياتي

اخوك ابن ذيب الودعاني

 

 

 

 

[معلومات العضو فراج بن فهد آل تركي]

هنا الشعر الحقيقي , وهنا المواضيع التي تستحق نظم القصائد .

قصيدة أعتبرها وبدون مجاملة أو مبالغة : من معلقات الشعر في العصر الحالي .

أتحفظ فقط على وصفها بملحمة الأنصار :

فصحيح أنها تحدثت عن الأنصار ومآثرهم الخالدة بشكل غير مسبوق , وبكثير من التفصيل الجميل
إلا أنها لم تقتصر على ذلك فقط , فقد تطرقت إلى عدة مواضيع مختلفة أجاد
الشاعر أيّما إجادة في الربط بينها بإتقان , وفي تناول كل موضوع من
كافة الجوانب بصورة تدعو للدهشة والإنبهار .

أما قول الشاعر :
وبعض القوافي لو تكرّر لـي العذر...ألقاف شـاب وفـي الصـدر دنـدان

فحسب علمي أن أهل النقد والأدب يجيزون تكرار القافية بعد البيت السابع ,
فمن باب أولى السماح بذلك في قصيدة وصلت أبياتها 134 بيتاً , كل بيت فيها عن قصيدة .
نحن _ كمتذوقين _ لانريد من الشعراء عدم تكرار القوافي , نريدهم فقط أن
يكتبوا شعراً بهذا المستوى الراقي موضوعاً وصوراً وألفاظاً وتركيباً .

فلله درّ الشاعر ابراهيم بن عبدالرحمن بن ذيب آل عريمة الودعاني على هذه
المعلقة النادرة , ولافض فوه, وكل الشكر والتقدير لك أخي ابن ذيب على
نقلها لنا , وانقل له _ مشكوراً غير مأمور _سلامنا وإعجابنا وحرصنا على رؤية المزيد من قصائده .

 

 

 

 

[معلومات العضو محمد بن حمد الشكرة]

ابن ذيب الودعاني صح السانك منا لين تطلع الشمس وفيت وكفيت وقصيده جزله من شاعر جزل وكيف وهي في الانصار الذين ناصرو الرسول صلى الله عليه وسلم جزاك الله خير الجزى تقديري واحترامي

 

 

 

 

[معلومات العضو يكفي اني دوسري]

السلام عليكم ورحمة الله وبركاته
.
.
.
.
قصيدة جزلة ومعاني واضحة وقوية
من شاعر كبير
حكم – تصوير وكأنك تشاهد وتعيش ما يقول – نصائح – درر .
من الآخر قصيدة تكتب بماء الذهب

وتقبل مــــــــــــروري

 

 

 

 

[معلومات العضو ابن ذيب الودعاني]

حياك الله يابو فهد والسموحة على التاخر في الرد بسبب الاختبارات

بيض الله وجهك على كلامك الطيب ولاعليك زود وقد يلغت الشاعر سلامك وكلامك الطيب وهو يبلغك جزيل الشكر على تعليقك النباء على القصيده خصوصا ان هذا التحليل من شاعر متمكن مثلك. وقد اوصاني بابلاغك وجميع الاخوه السلام . ويعتذر بانه ليس له عضويه في المنتدى . كما انه يبدي اعجابه واهتمامه بقصائدك

 

 

 

 

[معلومات العضو ابن ذيب الودعاني]

محمد بن حمد الشكرة

مرحبا والله ومسهلا وشرفني مرورك الطيب على القصيدة

وتقبل تحياتي

 

 

 

 

[معلومات العضو ابن ذيب الودعاني]

يكفي اني دوسري

ارحب تراحيب المطر واشكرك على تعليقك الطيب على القصيدة

وتقبل تحياتي

 

 

 

 

[معلومات العضو محمد بن ماجد]

قصيده جزلة من شاعر جزل

 

 

 

 

[معلومات العضو عبدالله اّل عريمة]

صح لسانك وبيض الله وجهك وطالبك بوجية كل المتابعبن ان تعطينا قصيدة من الخزن الا ستراتيجي لديك / عايض بن مجمد بن ذيب ال عريمة

 

 

 

 

[معلومات العضو الـــسـلـــيــل502]

ابن ذيب مشكور على ذا القصيده
وكفيت و وفيت وتسلم

 

 

 

 

[معلومات العضو الـــودعـــاني]

صح لسانك يابو عبدالرحمن وبيض الله وجهك وفالك البيرق