الشاعر فهد بن سالم بن فنيس المصارير في لقاءٍ (أدبيّ) مع الموقع الرسمي لقبيلة الدواسر

[معلومات العضو الإداره]

الحمد لله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته إلى يوم الدين إخواننا أعضاء وزوّار ومرتادي الموقع الرسمي لقبيلة الدواسر أجرى اللقاء وطرح الأسئلة : عضو مجلس إدارة الموقع الأستاذ فهد بن هادي الغريري . يسرنا في هذا اليوم أن نقدم لكم هذا اللقاء هذا اللقاء الأدبي الخاص والحصري للموقع الرسمي لقبيلة الدواسر مع أحد شعراء قبيلة الدواسر البارزين والمتميزين حيث تميز قصيدة بــ سهولة الالفاظ و جزالة المعنى : شاعر صاحب مواقف طيبه مع قبيلته ، ولاقى من الإشادات الكثير على جميع مشاركاته وهذا دليل أن الشاعر إستطاع أن يلامس متطلبات متذوقي الشعر الحقيقي وهذا هو الشاعر حقاً ، شاعرنا الذي نسلّط عليه الضوء اليوم هو شاعرٌ بعيد عن الأعلام وبمعنا صحيح ظلم إعلامياً من قبل القنوات الفضائية الذي غلب في برامجها الشعريّة الغث على السمين ، الشاعر فهد بن سالم بن فنيس المصارير الدوسري حضر اللقاء : الشيخ محمدبن محيا بن عنان و الشاعر والناقد فنيس بن سالم بن عنان المصارير والشيخ بندربن مدوس المصارير و حسين بن فهد المصارير و محمد بن فهد المصارير و مطلق بن فهد المصارير و عبدالله بن سعد المصارير من اليمين الشاعر فهد بن سالم بن فنيس المصارير وبجانبة الاستاذ فهد بن هادي الغريري من اليمين الشاعر فهد بن سالم بن فنيس المصارير وبجانبة الشيخ محمدبن محيا بن عنان من اليمين حسين بن فهد المصارير وبجانبة عبدالله بن سعد المصارير وبجانبة مطلق بن فهد المصارير وبجانبة الشاعر والناقد فنيس بن سالم بن فنيس المصارير من اليمين الشاعر فهد بن سالم بن فنيس المصارير وبجانبة الشيخ محمدبن محيا بن عنان وبجانبة الشيخ بندر بن مدوس المصارير من اليمين محمد بن فهد المصارير س ) في بداية اللقاء يا أبو سالم نحب نرحب بكم في الموقع الرسمي لقبيلة الدواسر ونسعد بإجراء هذا اللقاء المميّز معك .. ج) مرحبا ومسهلا بموقع قبيلة الدواسرالرسمي ويشرفني لقاكم والمنتدى شرف للقبيله كافه س)بالواقع بودنا أن تتحدث لنا عنك من حيث النشأة والدراسة والحياة العملية ؟ ج)النشأه مسقط الرأس الخرج ونشأت في الباديه والدراسه المرحله الابتدائيه في هجرة الدهو والمتوسطه في الخرج والثانويه في الرياض والجامعه في جامعة الملك فيصل و اعمل حالياً في وزارة العدل س) هل تأثر الشاعر فهد بن سالم بن فنيس المصارير الدوسري بشاعر معين ، ج) والله ياطويل العمر فيه كثيرٍ من الشعراء تأثروبمن سبقهم اللي والده شاعر وتأثربه واللي تأثر بشاعرمعين ولاكن انا لم اتأثر بأحد س) وإن كنت تأثرت بقصيد أحد فنرجوا منك ذكر الأسماء ج) كل بيت شعر جميل اتوقف عنده لأي شاعركان س) وما هي أهم الإشادات التي حصلت عليها طيلة مسيرتك الشعرية ؟ ج) حصلت ولله الحمد على إشادات كثيره من الناس اللي يعرفون الشعر ومن نخبة من الشعراء من ضمنهم الشاعر الكبيرسعد بن جدلان ولقبت بشاعر القبيله من اليمين الشاعر سعد بن جدلان وبجانبة الشاعر فهد بن سالم بن فنيس المصارير س) الشاعر فهد بن سالم بن فنيس المصارير من الشعراء المتميزين لكن بعيد عن الساحة الشعبية لماذا؟ ج) انا لم ابحث عن الاعلام ومتواجد في مناسبات القبيله س) لقبت بشاعر المصارير ماذا يعني لك هذا اللقب ج) هذا اللقب شرف لي كبير شرفني به موقع قبيلةالمصارير الرسمي والجمهورالعزيز على الرغم بوجود شعراء لهم ثقلهم الشعري وهذا حمل كبير وعسى الله يجملنا مجمل يابوسالم ولالقبت بهذا اللقب إلا انت كفوله س)كل شاعر له ميول معين من الشعر فما هو أقرب أغراض الشعر لنفسك ؟ ج) شعر المعاناه حيث ان هذا الشعر يستهويني س) ما رأي الشاعر فهد بن سالم بن فنيس في كثرة البرامج الشعرية في الآونة الأخيرة( قصيدة التحدي ، شاعر المليون ، شاعر العرب ......وغيرة ) وهل لها مردود جيد على الشعر والشعراء ؟ ج) البرامج الشعريه الناجحه مثل شاعرالمليون وغيرها تعتبرافضل دعم للشاعر وعسى الله يكثرها لانها تخدم جميع شرائح المجتمع من شعراء ومتذوقين س) الكثير يتساءل متى كانت بدايات الشاعر فهد بن سالم بن فنيس مع الشعر ؟ ج) والله من الصعب إن أي شاعر يوقت بدايته مع الشعر لكن من عادني بعصاي ورى البل وانا اغرض الشعر. اتفكر في زمان العالم الـمُحْبـوبي=الـزمان إيدور والعـالـم علي مبليـه س) بيت من قصيده ماهو سبب هذه القصيده ج) هذي القصيده ياطويل العمر ظهرت مني غصب انا في بداية بروزي الشعري حصل لي عوائق وتحطيم من ناس معينين فيهم حسد ولاحظت بأنهم لايفرحون لي بالإرتقاء ويفرحون بأي شي يعثر طريقي وانا كنت متجنبهم وصادعنهم ويعلم الله النني ما احب ادخل في هذه الامور لاكنهم ماخلوني في حالي ومثلك عارف بالنسبه للشاعر إذا كان في خاطره شي وتكرر عليه هذا الشي فلابد من اظهاره سوى زين اوشين واناقلت هذه القصيده اقصد بها شريحه معينه من المجتمع ضاربلي فرجةٍ في ذا الخلا وادوبي=كني اللي تايـهٍ ويـقـول ويـش الـنـيه اتفكر في زمان العالم الـمُحْبـوبي=الـزمان إيـدور والعـالـم علي مبلـيـه اتلـذذ بالخـلا لا ظـاق فـينـي ثوبي=وابتعدعن مجتمع ناس تعشق السيه مجتمع قوم تفاخر لاسمعو عذروبي=ولا مدحت اتقول كن اوجيههـم ملويه الردى منهم قريب والجزاله صوبي=ويش ابي بقلوب ناس بالحسد مسقيه كل ماصـديت منهم شذّبـو عـرقوبي=ولا حظرت يقال جاك الذيب جاك وخيه وكل ماصلى المصلي حظّرو واشغوبي=كـنهـم جـنٍ تتالـو مـن بـطـن جـنـيه لاكن الله ماخلقني لجل احسب ذنوبي=مـا خِـلـقـت إلا لـوجـهـه رافـعٍ إيـديـه وانت يالي دايـمٍ حطيـت دوبك دوبي=مكسبي منك الحساني ونت هاك السيه ماحـدٍ مثـلي صبرلك مثل صبر ايوبي=اتـعـدى منـك هـذي واتـجـاهـل ذيـه ويش ابي بك دام منتب عارفٍ ماجوبي=مـاخبـر حـرٍ تمركـز في مكـان حـديـه البارحـه يا طـول لـيـل الـتـنـهات= ماغـيـر اقلـبهـا على يـسـار ويمين س) بيت من قصيده لك يابوسالم بودنا تعطيناها ج) ابشر طال عمرك هذه القصيده لها قصه بسيطه كنت مسافر لأحدى الدول المجاوره وخذيت لي ايامٍ فيها ولين فيه رفيق لي عزيزٍ علي بالحيل وكان اغلب مراحنا ومجينا انا وياه سوا وهذيك المره رحت ألحالي وطولت عليه وارسلي رساله بالجوال ويوم قريت الرساله أثرت فيني وهيضتني واناقدني مال من الديره اللي انا فيها وقلت معاد به اقعاد الديار طلبت أهلها ثم بغيت المسرا ولا سمحت لي ضروفي وقربت القلم والدفتر بأسوي لي قصيد فلاجات القصيده وحطيت راسي ابي النوم ولاجاني النوم المهم اني على ذا الحال حتى قرب الفجر وخاطري فيه اللي فيه ويوم قرب الفجر لاهي والله منهله مثل السبحه المنفله ثم زان خاطري بعدماجات وقول في القصيده من ساحل المشرق لنجدٍ تحيات=تـحــيـةٍ تـرجـح بـكـل الـمـوازين ســلام يـادار الـوفــا والـمــروات=دارالكرم منصى الرجال الكريمين دارٍ لها في مـنهـج الطـيب عـادات=حبي لـهـا مـتـمـركـزٍ بـالـشـرايين لاغـبـت عـنها بـالـزمـن لـو ساعات=كني خـذيـت ايـام وشـهـور وسنين والبارحـه يا طـول لـيـل الـتـنـهات=ماغـيـر اقلـبهـا على يـسـار ويمين بغـيـت اعـرضـها اطـوال المـسـافات=واسـري ووفـرعـبـرتي داخل العين لاكـنـهـا عــيـت تـجـي بـالهـوايـات=عــيـا زمـان الشـين لايـظـهـر الزين واندبـت لـبـحـورالقصـايد ولا جات=وليـل العـنا طول وانا خاطري شين واصـبـحـت كني حـاكـمٍ للـعـبارات=بالصـدر حاكمها وبالعجـز مـقـوين كني على جنح الهوى طرت لحظات=ولا انـتـبـهـت الاوانـا خـاطـري زين مدري عـشـان انهـا تتالـت بالابيات=والا خـيـالي سـاقـني لـلـمـحـبـين الحــب مـاهـو حــب شهـوه ولـذات=حــبٍ يجـي فـجـأه ولالـه مـظـامـين الحـب حـب الـدار والأصـل والـذات=والحــب والـلـه للـرجـال العـزيـزين اللي لـهـم في ظـيـقة الوقت وقفات=وقـفـاتـهـم تـروي كبـود المـحـيـمين مانـيـب أدور عـنـد الانـذال فـزعـات=ولا بمـدح اهـل المـال والا الرديين الـمـدح ذمــه والـمـدايـح كـريـمـات=ماهو من احـتـجـتـه مدحته لقرشين مـا جــور يارجـلٍ أعــزومـه قــويات=منصا الرجال اللي له القاسي يلين رجـل إلى من صـار بالوقت ميلات=يرسي كما ترسي كبار الضلاعين محـمـد المـنـعــــور زبــن الـونـيات=ريـف الضـعـيـف وسلطةٍ للمعادين من شاف فعله يحسب العود مامات=ما مات من خلـف رجالٍ مـيـامين جعله على الدنيا يعيش ابمسرات=وفي الآخره ينعم بخضر البساتين والرجل المقصود في هذه القصيده أخي وصديقي العزيز/ محمد بن محيا المصارير س) حقايق من وثايق معلقه مشهوره لك اذكرها لنا وكم استغرقت من الوقت في كتابتها ج)هذه المعلقه اخذت فيها وقت طويل علماً بأنني عادتاً في قصايدي إذابديت في الشطر الاول ماأفك الموضوع إلاعند الشطر الاخير لان القصيد حدث فمادمت في قلب الحدث اتقنته وإذا خرجت من جو الحدث لايمكنك تمثيله بالوجه المطلوب وهذي المعلقه اخذت فيها وقت لمراجعة التاريخ وتقصي الحقايق واطلقت عليها اسم حقايق من وثايق بسـم ربٍ على الحـق إيهـدينـا=بعـد ما نبـتـدي بـسـمـه بدينـا يقول الدوسـري فهـد المسـمى =حـقـايـق ما تغـبـيـها الـسـنينـا حـقـايـق مـنـتـقـيـهـا من وثايق=من الـتـاريخ واللي عـارفـيـنـا افـعـالٍ مـاتجـاهلـهـا العـوارف=ولا فــيـهــا كـلامٍ مـا يـلـيـنـا بخبر من قراء جزل المعاني=بـإ نـا لـلـمعـالـي قـد رقـيـنـا أقمنا المجد في شتا النواحي=رقـينـا لـلـمـعـالي وأعـتـلـيـنـا بعصـر كـليـب وائل بن ربيعه=اسـودٍ سـايـديـنٍ مـكـرمـيـنـا فـلا عــزٍ تـعــدى مــا نـنـالـه=لـعـز كـلـيـب تغلب وارثـيـنـا مـلـيـكٍ سـاد قـوم في نـزار=ولا نـت لـه رؤسٍ مــا تـلـينـا خلع راس الملك من فوق عرشه=وأبـقـا قـوم تـبـّع شـارديــنـا فـيا عــزٍ تـسـلـطــن بـه كُـلـيبٍ =بـقى مظـرب مثـل لـلـمـاثلـيـنـا ولا نـنـسـا زمـانٍ لـلـمـهـلهـل=ابـو لـيلى حـماي الـخـائـفـينا مضى لـه في زمـانه معـظلاتٍ=تشـيـب أبهـا رؤس الـراظعـيـنا بـنـالــه قـبّــةٍ مـاحــدٍ بـنـاها=بـروسٍ مـن اسـودٍ فـالـعـريـنا بوسط الغاب في بير السباعي=تصـداهـن وصـار أ لهـن كمينا وفي حرب البسوس إيعـد فعله=عـلى بكـرٍ كـمـا نجـمٍ سخـينا خـذا لـه مـا يقـارب نـص قـرنٍ=يقـلـبـهـم شـمـالاً مـع يـمـيـنا بثار كلـيب أخـذ مـنهـم قـبيلـه=بحـد الـسيف والـرمح السنينا وعـاهـد لا يصـالـح دام مـنهم=كـبـيـراً بـاقـيـاً والا جــنـيـنـا فـيشهـد لـه كـلامٍ من لـسـانـه=طـحـناهـم وكـنا الـطاحـنـيـنا ويشهـد قـول ابـا كـلثـوم عمرٌ=طحنـاهـم ودقـقـنا الـطحـينا فعـمـرٌ قـد بنا للمجـد صـرحاً=بعـد كـلـثوم سـاد القـوم فـينا قتل عـمْـر ابن هنـدٍ ذات يـوماً=بـه الـعـز إيـتعـلا الـفـرقـديـنـا بطـش فـيـهـم جـهارٍ مـن نهارٍ=بسيفٍ من سيوف الجارحـينا فخـرت لـه ملـوك الجان سجّـد=وخـرت لـه طُـغـاةٍ سـاجـديـنا وفي ذيقار من دوسـر كتيبه=على كسرى لنا نصراً مبينا وبـالاخـطل وعــتّـابٍ ومـالـك=فـخـرنـا وافـتخـرنـا واقـتـدينا وعلقمة ابن سيف والحـبـيـب=وماجـد في زمـانه مـحـتمـيـنا هو والعـرعـير وجْموع التغالب=وزايـد بالـقـسـا ظـلعٍ مـتـيـنـا مقابيس الوغـى وقـت الحرايب=رجـالٍ يـردفـون الـدين دينـا صـنـاديـدٍ يـضـدون الـمعـادي=ياكم مـن واحـدٍ مـنهـم غـبـيـنا على الأعـداء يـشبـون الـوقايد=وعلى الصـاحـب كِـرامٌ لـينـينا اخـذو وادي العـقيـق بقـو باسٍ =وبالـوادي تـسـلـطـنـا وربـيـنـا حـمـيـنـا الـدار بـجْـمـوعٍ تتـالا=جـمـوع ٍ بالمـلا قـا صـارمـيـنـا فـسمـينـا بـدوسـر وسـتـمـيـنـا=وسمي بـأسـمـه الـوادي عـلينا فـدوسـر كـنيـةٍ مـن أسـم فحـلٍ=وقيل إن دوسـر الجـيش المتيـنا دواسر بالوغـى صـرنا كواسر=ملـيـك المـوت معـنـا لاعــديـنـا زيـازيـمٍ تـوارثـنـا الـسـيـاده=تلـيـنـا بالـفـعـول ومـاتـلـيـنـا لـنـا وسم العصا للجـار عاده=وحـقـه بـيـنـنـا حـقٍ سـمـيـنـا تـسلـسـلـنـا على عـزٍ وهـيـبـه=قـسـانـا بالـقـسـا عـيا يلـيـنـا ويلا كـشّـر زمـانٍ بـه شـدايد=تعـزويـنـا الحـبيبي ونـتخـينـا تجمـعـنـا على حـلـو ومـراره=مصاريرٍ كما حصـنٍ حصـينا مصاريرٍ إلى دارت عـلـيـنـا=رحى قـومٍ على الشـده رسينا مصارير لـنـا بيـض الـلـهـايد=وهي خـيـرة مكاسب الاولينا مصاريرٍ لـنـا عـشـرٍ سـوابـق=مع وجيه المـغـيـره سابقـيـنـا مصاريرٍ لـنـا ظـربـةْ عـقـيـدٍ=تـبـيـد الخـيـل واللي راكبينا مصارير لـنـا فـنـجـال صـينٍ=شـربنا هيبـتـه ثـم احـتـمـينـا مصاريرٍ لـنـا وقـفـة خـويٍ=لها يـشـهـد إيلاه مـعـتـلـيـنـا مصارير لـنـا قــدرٍ يــدسـم =يـدسـم من رؤس الحـاقـدينا مصارير شهـرنا بالخـفـيـسه=شهرنا عـنـد زيـنـات الحـنينا مصاريرٍ على الخفسه شهرنا=وردنا صفـوة الـمـا وارتـويـنـا مصاريـر لـنـا وقـــراً نـعــده=نعـده من صـحـون الاكرمينـا مصاريـر تحـدينـا الـسـباعي =وصـارت كـنهـا مـنـا وفـيـنـا فـلا يـفـرح عــدوٍ في لـقـانـا =ولا نـرظـا حـدٍ يغـلـب عـلـيـنا بـنـو تـغـلـب وغـلا بـون دومـاً=فـإ نـا لا فـخــرنـا غــالـبـيـنـا جـعـلـنـا الله من بين الـقـبـايـل =سـوات سْهيل في وقـتـه يبينـا افاخـر وافـتخـر بفعـول ربعي =هل الطـولات سـقـم المـعـتـدينا بـوقـتٍ راح اخـذنا مـاكـفـانـا=من افعالٍ تنـيـر الـمحجـرينـا وصرنا اليوم في حكم الشريعه=وبحكم املـوكـنـا مـتـفـاخـريـنـا بـفـضـل الله ثــم سـنـة نـبـيـه=تعـلـمـنـا الـشـريـعـه وهـتـدينـا تعـلـمـنـا عـلى حـق وحـقـيـقـه=أطـعـنـا الله ومحـمـد نـبـيـنـا تـوحــد نـا ووحــدنـا امـعــزي=وصـرنا اخـوان في دنياً ودينا س) لك قصيده في صاحب السموالملكي الامير نواف بن نايف بن عبدالعزيز وجافيهاتسميه حدثنا عنها ج) صاحب السمو الملكي الامير نواف بن نايف بن عبدالعزيز آل سعود حفظه الله شرفنا بزيارته الكريمه في منزلنا بمحافظة الخرج وقلت قصيده ترحيبيه وتشرفت بألقاءها أمام سموالامير: يامرحـبا يامير حـيـيـت حـيـيـت=ترحـيباً أحلا من حلات العذوبـه حـيـيـت يانسل الرجال العناتيت=ياهـيـلـعـاً كـل الاكـارم حـكـوبـه ياسـيدي نواف ياشايع الصيت=اسمك غـدا بين القبايل أعجوبـه اسمك ينوف ونايف المجد له جيت=اللي بنا للمجـد طـوبـه وطـوبـه نايف وطا بقدام رجله طواغيت=وكفه على العدوان صارت اعقوبـه كفه على الانذال مثل الدناميت=ويلا سلك دربٍ اتورخ ادروبـه من حبه ادعيله إيلا اصبحت ومسيت=اللي محا الارهاب واخمد شبوبـه ونته على دربه مشيت وتباهيت=تنـهـج مناهيجـه وتلبس لـثـوبـه يامعـرّب الجـدين عـزالله أوفيت=ياسلا لة معـزي زمام العـروبـه من جدك معزي خذيت الوفابيت=ومن جدك محمد عـدامة اعيوبـه وأعجب سموالامير بهذه القصيده وبقوة مفرداتها واطلق على اثنين من طيوره اسم عنتيت والهيلع ثمثلا بالبيت حييت يانسل الرجال العناتيت=ياهـيـلـعاً كل الاكـارم حكـوبـه س) تجد لدى كثير من الشعراء قصائد مقربة من نفسه كثيراً فتجده دائماً ما يرددها ويكررها ..فهل تطلعنا على اقرب قصائدك لنفسك ؟ ج) قصائدي كلها قريبه لنفسي ولكم منها: اللي يقول إنـه صميدع ورجال=ولا فيه مخلـوق يحالي صـفاته الله هو اللي خـالـقٍ كل الاجيال=وكلٍ كتب لـه مـيـزةٍ في حياته لاكن ياللي في مزاياك تختال=ماحدٍ يجي ذكره بحسب امنياته احـدٍ ابفعل الطيب تضربه امثال =واحـدٍ مـايسوى وحـدةٍ من خواته ما فيه فرقٍ بين غـتـرته والشال=ويمكن عـبات البنت تسوى عـباته المـرجـلـه دربٍ بـه الاش يـهـتال=ولا كل من يمشـيه ناوش عـلاته ورجلٍ ماهوب يصيرلـربوعـه ظلال=اخـيـر مـن بـاقي حـياته مـمـاته لابـد مـن شيٍ مع الناس ينقال=أمـا طـواري خـيـر والا شـمـاته والرابح اللي كاسـبٍ خـيرالاعمال=يثبـت على دينه ويحفـظ صلاته وطيب النوايا بالرجل مالها اشكال=تنجـيـه مـن وقـتٍ إيـدور ابـرحـاته وهذي القصيده سرقني انعاس العيـن وانا على مركـاي=غـفيت وسرى بي حلم قلبي على طاريـه سـرت بي احـلوم الليل كنها تريد ارضاي=وجـات الـذي لـي مـدةٍ مـا قـدرت اجيـه جــات المكـان اللـي سبب علـتي ودواي=وجـاني دوا قلــبٍ احـتـارو الاطـبـا فـيـه أقـبـل ابـجـنـح الـلـيـل كـنه يـبـي لـقـيـاي=وقـامت دواعـي فرحتي بالـغلى تـدعـيـة أقـبل يجـر اخـطـاه وانـا أخـف اخطـاي=وقـلـت القمــر ذاجـاك يمشي على رجليـه حـتى قــرب مـني وصــارالـغـرام ارداي=وعـانـقـتـه امـعـانـق شـفــوقٍ لـقى غـاليـه وسـالت ادمـوعـه ليـن بلـت طـرف مخبـاي=وانـا غـديـت اشـفـق من ام الجـنـين إيليـه وشـديت عـزمي لا يـتـغـلـب علي ابـكـاي=وصـديـــت مـنّه كــن مـعــادنـي بـبغـيـه وحـارت قدم رجلي وضاعـت علي اقـواي=ووقـفـت انـا في موقـفي ضـاربلي تـيـه وفـجـأه تفـوق العـيـن و انا على مـركاي=ولاشـفـت حـولي غـيـر ليـلٍ دجـا داجيـه بقيـت ابمكاني عـايشٍ في وهـم ذكـراي=أسلي اعيـوني في خيـال الغظي ورجـيه شعاني الغرام اللي تمركزبـصم اعضاي=سبـا مهجتي والحـال كمل على بـاقيـه وهذي القصيده البارحـه راسي كلـتـه الـتفـاكـيـر=والجفـن عـيا يهـتـني في منامه لاجـيـت اباعـبـراتضيع التعـابيـر=متشـتتٍ فكـري ولا ادري علامه يامـاحـلا المـمـشا مع فجّـة النير=في خـايعٍ سـيلـه يشق العـدامه ممشاً مع الـذيدان ويّـا المـناعـير=هـذا هـوا قـلـبـي وغـايـة مـرامه لاصـيـح الـراعـي وتـل المـقـاهير=ولوّح على المركوب وارخااخطامه وجـاتك مع الريعان كـنها طوابير=لا عـقـبـت جــوٍ يـثـوّر عــسـامـه لا قـالـو الشـده ثمـانـيـن واخـيـر=وكلٍ عـصب راسه وجوّد احزامه وتغـا نـمـو قـفـرٍ كـستـه النـواوير=متشكلٍ عــشـبـه إيشـوّق جـهامه تسرح مع الجهمه قبل قومة الطير=وتاصل وعادالليل مادمس ظلامه هـذي مجـاهـيـمٍ وهـذي مغـاتيـر=تجلا عـن القلـب الحـزين الندامه تروي شفى قلبٍ يسوق التباشير=على النقا والعـز واهل الشهـامه وشوفة اصغيرٍماتقول إنه اصغير=يكـبـرابعـيـنـك في حـلاه وكلامه امقـابلـة وجهـه اتبـشـرك بالخـير=ياحـي منـطـوقـه وحـي ابتسامه اخـيـر من وقـتٍ غـدى بـه تنـاكير=في زحمة العـالم وزحـمة نظـامه س ) أين الشاعر فهد بن سالم بن فنيس من الأمسيات الشعرية !! اناموجود والعتب على الأعلام=يمكن ماعندي واسطه ولانيب تاجر س) وكذلك السؤال نفسه أين شعراء الدواسر وخاصة الشباب من الأمسيات الشعرية المنقولة فضائياً ج) شعراء الدواسر لهم باع طويل في الشعر وحضورمميز ولاكن الاعلام منحصر ومحسوبيته لأشخاص معينين س) هل لشاعر فهد بن فنيس مساجلات مع الشعراء وهل ممكن ذكرها. ج) المساجلات كثيره ولاكن لعل احدثها مجاراه للشاعر ابن الذيب العجمي لقصيدتي ضوى الليل وعيون الشقاوي تحب الضوح=وغـطا ظـلا مـه نظرة العـين والـظـيحـه وحـول شقـي الحـال من عالي اللحـلـوح=يـبـي ساعـةٍ يـاخـذبـهـا القلب تـريـيـحـه وهبت هبوب الشـوق وسـترسلت بالـبـوح=حـبـيـس المـشاعـر حـظـرت لـه مفـاتيـحـه تجـي مـع طـرفهـا نـفـحـةٍ دايـمٍ وتـروح=وتـثـعـى الخـفـوق وتهّـل الـدمع للطـيـحـه يـخـيـم ظـلام اللـيل والـنـور عـنـه إيـزوح=وتظهـرتحته اصنـاف خلـق الله امشيحـه و يـبـدا سهـرمن كـن في عـينه الذرنوح=يذوق الـعـنا والـناس في نومها امْرِيحـه يحايل هواجـيـسٍ بصـدره تلـوحـه لـوح=تعـاقـب على دلـو الصـنـاديـق وتـمـيـحـه اتتلـه من الـمعلـوق حـتى تـزوع الـروح=وإيلا ردت الانفاس خطـرٍ من الصـيحـه تصلـفق هبـوب النـود وتهـيض المجـروح=وتـرجّـع شريطٍ فـات للنـاس واتبـيـحـه تسوق الطواري لين تصفق لهافي صوح=وتزحزح لها شيٍ عـجـز غـيرها يـزيـحـه تراني من اصدوف الزمن والهوى مجروح=وجرحي عميق وظاهرٍ بالحشا قيحه دخيلك ترد الروح ياصوتي المبحـوح=لعل الحـشا يرتاح من بعـد تجـريحه يضوق الفضا لوكان باب الفضا مفتـوح=وتعـتادنا الضيقـه وفجوج الله افـسيحـه دورات اللـيالـي مالـقـيـنـابـهـا مصلـوح=تبـي دايـمٍ تاخـذ ومـداتـهـا شْـحـيـحـه مجارات ابن الذيب لايحضرني منهاإلابيتين يقول ضوى الليل يابن فنيس والبرق قام يلوح=وقـلـبـي كـمـا طـيـرٍ تعـلـق بـتلـويـحـه شعتني ابيـوتك لـو مالـيـبـها مصلـوح=شـذاها كمـا ريح النفـل لاطغـى ريحـه وفيه مساجله بيني وبين الشاعرصالح الصليبي الحقباني أقول صباح المطـرمع طاعـة الله وريـح العود=وفوح الدلال وصاحـبٍ يضحك حجاجه وشربة قراحٍ صافيٍ في طـرف قرهود=وجـو(ن) رذاذه يبهـج اعـيون من داجه وقال صباح المطرمع طاعة الله مع أهل الجود=وبـروقً عـلى كـل الـوطـن جـات لعـاجه وخــوة خــويً خـوتـه لـلحـيـاه اتـزود=وانـا بـشهـد إنهـاغـايـة القلـب وعـلاجه وقلت حلـيـف المراجـل خـوته لـلـنـشـاما فـود=وكـلٍ يـبي دربـه ويـنهـج بـمـنهـاجـه مثل صالح الحقبان رجل الوفاوالجـود=عـلى طـاعـة الله والكـرم ماخـذٍ تاجـه وقال نجـاريك يابن فنيس ونكـثـف المجـهود=نبي ناصل الشاعـر وننهل من انتاجـه ولاهي غريبه يافهـد وانت نسل العود=مـقـر الـوفـا ماخـاب من يـرد هـداجـه وقلت ألايالـصلـيـبي مابـه شيٍ عـليـك إيكود=وبحـرك إلامن هاج من ينطـح أمواجـه نغوص البحـر ونعوم واللول به موجود=وشرد الخـلا دايم عـن الناس هجاجـه س) أيهما أقرب لشاعر فهد بن فنيس في نشر إبداعاتك الشعرية .. هل هي عن طريق الأمسيات أم من خلال التواصل الاجتماعي تويتر او عبر الصحف والمجلات أم عبر المنتديات ؟ ج) كلهاتوفي بالغرض لاكن تويتر اظهرني ووصلني لناس ماكنت اتوقع الوصول لهم وتشرفت بمعرفتهم وبالنسبه للمنتديات تعتبر حفظ للتاريخ س)بودنا لو تعطينا رأيك بكل صراحة عن الموقع الرسمي لقبيلة الدواسر عن بداية إنضمامك بهذا الموقع ؟ هذارأيي يالدواسر ياحميدين الخصايل=منتـدا كم لازم إنكم تدعـمـونه منتـداً جـمّـل مع كـل الـقـبـايل=بالجزيل ينومس اللي يدخلونه كـل فـعـلٍ نادرٍ مالـه مـثـايـل=لا ادخلو في منتدانا ياجدونه دوّنوه اللي يحـفظـون الـدلايل=كـل فعـلٍ بالـدلـيل إيورخـونه نشكـر الله تم كريمين السبايل=الرجال اللـي عـلـيـه يراقـبـونه جعل من يتعب على فعل الجمايل=يحفظه ربي من الشر أويصونه س) كلمه اخيره لك ج) في نهاية هذا اللقاء احب ان اشكر موقع قبيلة الدواسرالرسمي والقائمين عليه عامه واشكر الاستاذ فهد بن هادي الغريري خاصه ويعلم الله يابوراشد إنك مكسب للقبيله وإنك كفوومجمل بأخلاقك وبفعولك الطيبه في ختام هذا اللقاء الممتع لايسعنا الا نتقدم بخالص الشكر والتقدير لـ الشاعر فهد بن سالم بن فنيس المصارير على إتاحه هذه الفرصة لنا وعلى أريحته وعلى سعة صدرة وإجابته على جميع الأسئلة ، سائلين المولى عز وجل أن يوفقه ويسدد على طريق الحق خطاه . (صوت قبيلة الدواسر) منتدى قبيلة الدواسر الرسمي www.alduwaser.org/vb

 

 

 

 

[معلومات العضو فهد الغريري]

بسم طاقم موقع الدواسر الرسمي اشكر الشاعر الفاضل فهد بن سالم بن فنيس المصارير. على استضافتنا وعلى سعة صدره رغم مشاغلة على اجراء هذا اللقاء القيم المفيد ونسأل الله لنا وله التوفيق والسداد

 

 

 

 

[معلومات العضو علي العبدالهادي]

بارك الله في جهود ادارة موقع قبيلة الدواسر الرسمي على هذه المقابلات الطيبة وبيض الله وجه الشاعر فهد بن سالم المصارير على حسن الضيافة ولاهي غريبة عليه

 

 

 

 

[معلومات العضو الكاتم]

شاعر جزل وخلوق ولقائه مميز
شكراً ادارتنا الرائعة شكراً ابو راشد

 

 

 

 

[معلومات العضو ابومبخوت الدوسري]

شكرا" للاداره على هذا اللقاء الجميل والرائع
والشكر موصول للشاعر المبدع فهد بن سالم المصارير

وتقبلوا تحياتي ،،،

 

 

 

 

[معلومات العضو أبونواف الدوسري]

بارك الله فيكم أدارتنا الكريمه..

وبارك الله فيكم على جهودكم المبذوله..

وكل الشكر والتقدير للشاعر فهد بن سالم المصارير

متمنيا من الله أن يوفقه ....

دمتم في حفظ الرحمن..

 

 

 

 

[معلومات العضو فلاح بن عايد]

نشكر جزيل الشكر للشاعر المبدع فهد بن سالم بن فنيس المصارير على اتاحته الفرصة للموقع لإجراء اللقاء الرائع وصح السانك يالقرم ولا ننسى ان نشكر الاستاذ فهد الغريري على اجراء هذا اللقاء والله يطول بعمره
ونشكر ادارة الموقع جزاهم الله خير على هذا الجهد الجبار لخدمة القبيلة والله يطول بعماركم على الطاعة

 

 

 

 

[معلومات العضو مناحي المصارير]

شكرا" للاداره على هذا اللقاء الجميل والرائع
والشكر موصول للشاعر المبدع فهد بن سالم بن فنيس المصارير هذا الشاعر المظلوم اعلامياً اتمنا له التوفيق
وتقبلوا تحياتي ،،،

 

 

 

 

[معلومات العضو ابو زابن المسعري]

اشكر الشاعر الفاضل فهد بن سالم بن فنيس المصارير.

على الاستضافه وعلى سعة صدره وبيض الله وجهه

 

 

 

 

[معلومات العضو نآصر البدراني]

بيض الله وجهك يا ابو راشد على هذا اللقاء وتعريفنا


بشاعر جزل ومتمكن من ابناء عمومتنا الكرام ,,,,



بيض الله وجه الشاعر / فهد بن سالم بن فنيس على استضافة ابو راشد


واتاحة الفرصه للتعرف عليه وعلى طرح بعض قصائده التي استمتعنا وانطربنا بها



بصراحه قرأت بعض قصائده وتوحى لي أنه كبير في العمر


وذلك لجزالة شعره ومفرداته ومضمون قصيده الله يوفقه ويحفظه



لاعدمناكـ يا ابو راااشد ..

 

 

 

 

[معلومات العضو عبدالرحمن بن فلاح آل بريك]

ونعم الرجل . لقاء ممتع وجميل . شكراً لكم إدارتنا على جهودكم .

 

 

 

 

[معلومات العضو سالم999]

نشكر الاداره ممثله باالأخ فهد الغريري على هذا اللقاء

والشكر موصول للشاعر الجزل فهد بن سالم بن فنيس المصارير على اتاحة

الفرصة للاعضاء والزوار للاطلاع على شاعريته الجزله وصراحته وافكاره وتطلعاته المفيده

فلكم كل الشكر والتقدير

وتقبلوا تحياتي ..