الحكيم اللي يكافي العظامة بالعظيمة

[معلومات العضو عبدالرحمن الجبابرة]

السلام عليكم ورحمة الله وبركاته

من جديدي وتستحقون الأجمل والأتقى
وهي إهداء لجمعية " إنسان " لرعاية الأبناء الأيتام
ولجميع أحبتي ممن وقف معي من الزملاء الشعراء
والأصدقاء ورجال الإعلام
بشأن دعوتي للإهتمام بالأبناء وبأي وسيلة كانت
كما لا أنسى فضل وحسن توجيهات أخي الشاعر المبدع , شافي بن راشد النتيفات
الذي وجهني في بعض النقاط الحيوية
والقصيدة وقايلها تحت أمركم كبيركم وصغيركم
ولا قلتها مماراة ولا سمعة بقدر ماهي مشاعر خرجت في حينها
ومالي غناة عنكم جميع كبيركم وصغيركم

أحمد الله واشكره يوم انها جت مستقيمة=قافن أحلى من عسل نحل المجر باقصى تهامة
ديرتي الوادي وأهلـْها قلوبهم بيض وحميمة = كلِّن الله خصَّه بقيمة وميزة فرق شامة
يالحكيم اشهد بأنك جبتها فتوى حكيمة =مثل فتوى عائض القرني بشهيدات الثمامة
وأنت ياغازي كسبت الأولة كسبة غنيمة =للرفيق ولإبن عمك والردي يكسب ندامة
وابو بادي قال أبشر مدَّني بذيك الوسيمة = وسمها في بيض وجهه انبساطة وابتسامة
والعماني قد ملك ودي بوداد الود شيمة = ربي الله قد عطاه العلم والرفعة سنامة
والدواسر دولة ٍ نالت وسامات الشكيمة = تكفي الوسمة !عصاهم اوسموها بالفخامة
صعبه أحصي ماضيات افعال هامات ٍ قديمة = من بغى التاريخ يسأل تبصرة ابن قدامة
والحكيم اللي يكافي العظامه بالعظيمة =والبليد الله يعينه يلحق بركب الفهامة
والفهامه ما تجي عشوا كذا خبطة بهيمة =لا وربي ما تجي إلا بفن حكمة واحتكامة
واللي في عينه جهامة ما يشوف إلا الجهيمة =مثل ذاك اللي يبرر لانهزامه با نهزامة
والتمس عذري لمن هو بالأصل عينه كريمة=لأن ربي عاذره قبلي وهو راعي الكرامة
والقرار اللي اتخذته يعتبر شذ وجريمة = في عقول اللي جداهم غنِّي غنِّي ياحمامة
هيه يااللي ترتجي العليا تراها في الحشيمة = حشمة الأيتام مثلي يومني بسن اليتامة
يوم كافلني خذاها مبدأ ودين ورحيمة = يا عساني افدىً لأبو مرضي جليل الاستقامة
شيخ ٍ أطيب من عرفته عِرفته شيمه وقيمة =من خوالي وآنا خال عيال كسَّاب الشهامة
وآل متعب هم خوالي ما تنادوا للذميمة =ربي الله قد رزقهم حنكة وحكمة علامة
وانتسب لابوي غانم غيث ماطر مطـْر ديمة =مسقي الضميان جُبِّه قاسمه قسمة قرامة
قولة ارحب في لسانه سم واقلط للعزيمة= وسوقة الفنجال والمطيب يدخ الى الغمامة
خاوى من طاع الله اللي ما على صدره تميمة = مؤمن ٍ بالله ومؤمن بالبعث يوم القيامة
رحمتك ياربنا ولوالدينا بالنعيمة = جنة ٍخضرا مع اصحاب النبي وأهل المقامة
والمودة ؟ بابها مفتوح والنية سليمة != واختم بقولة وداعية بفالات السلامة

 

 

 

 

[معلومات العضو محمد مطلق آل بريك]

الاخ عبدالرحمن

صح لسانك وبيض على الله وجهك

تحياتي وتقديري

 

 

 

 

[معلومات العضو مبارك بن شافي النتيفات]

ارررررررررررحب ياعبد الرحمن تراحيب المطر

شاعر جزل ولا يختلف على هذا اثنين

بيض الله وجهك على هذه المشاعر الطيبه والدرر الثمينة

تحياتي واحترامي لشخصك الكريم

 

 

 

 

[معلومات العضو سالم الخضراني]

صح الله لسانك وبيض الله وجهك



تحياتي وتقديري

 

 

 

 

[معلومات العضو فـلاح الشدقاء]

الشاعر / عبدالرحمن الجبابره
صح لسانك وعلى الأخرى عانك
قصيده جزله ووافيه كصاحبها
والنعم فيكم يالدواسر
وبيض الله وجهك ومشكور على هذه اللفته الإنسانيه
وحق الأيتام واجب على الجميع
تقبل اجمل تحياتي واطيبها
احوك / فلاح الشدقاء اليامي

 

 

 

 

[معلومات العضو غازي المسعري]

صح لسانك يابو غانم

وانت شاعر مبدع ولا تحتاج شهادتي
لفته انسانه كريمه من شخصك الكريم تشكر عليها

 

 

 

 

[معلومات العضو شافي بن راشد النتيفات]

ارحب ياعبدالرحمن وبيض الله وجهك على هذا الشعور الراقي من شخص راقي ولا يستغرب عليك اما بالنسبة للقصيدة فيشهد الله انها ما خرجت الا من شاعر كبير بحر طويل ولغة شعرية فذه ومعاني راقية صح الله لسانك ورفع شانك ارجو ان تقبل هذا المرور المتواضع لشخصك الكريم