الهيضل والنخوة العربية

[معلومات العضو الجعيد العتيبي]

السلام عليكم ورحمة الله وبركاته

اخوي بدران البدراني بيض الله وجهك وسلمت يمينك على هذه القصة للشيخ مناحي الهيضل شيخ الدعاجين والهياضل يعدون من اقدم الشيوخ في عتيبه وكانوا شيوخ برقا في نجد قبل ان ينزل تركي ابن حميد ببقية عتيبة لنجد حيث ان الهياضل من اول من دخل نجد من عتيبة وكان عنده مربط خيل مشهور.

واستميحك عذرا لإيراد القصة مره ثانية مع أضافة بعض التفاصيل فيها:

هذه القصة يرويها بلسانه الشيخ مناحي الهيضل في مجلس الملك عبدالعزيز بن سعود حيث سأله الملك عبدالعزيز عنها وكان موجود في المجلس شيوخ لبعض القبايل يستمعون لكلامه ومن ضمنهم الشيخ محسن الفرم شيخ قبيلة حرب والذي تدور حوله القصة.

يقول مناحي الهيضل مخاطبا الملك عبدالعزيز :

ذهبت ياطويل العمر الى منازل قبيلة حرب وقصدت بيت محسن الفرم لأطلب منه حصانه فحل لعدة ايام على خيلي ، وعندما وصلنا انا وبعض جماعتي الى منازلهم استضافنا اهل بيت محسن وربعه الذين كانوا في بيته وقالوا : انه غيرموجود فالديره ولكن نبا نكرمكم ونقوم بالواجب وفعلا صبوا لنا القهوة وذبحوا لنا وكنا ساعتها في وقت الظهر

وبعد قليل جائهم منادي يصيح بأن عليهم غزو من شمر وانه لابد من حشد وتجهيز القبيله لصد هجوم شمر الذين استولوا على الابل والحلال وهربوا ولابد من اللحاق بهم وتخليص الحلال من ايديهم ، وكان الذي استضافنا في بيت محسن وهو على ما اظن اكبر القوم واعرفهم قال لربعه : لابد من اللحاق بالقوم وأمرهم ان يجهزوا انفسهم بسرعة، ثم قال لي : نحن الان قد اعددنا لك الغداء وهو على النار ونحن نستسمحك حيث نريد اللحاق بهولاء المعتدين لتخليص حلالنا وانت في مثل بيتك وسنذهب وسنعود باذن الله اذا كتب لنا الله عمر للغداء معك والا فأهل البيت يسدون محلنا ومحل محسن الفرم ، فقلت لهم منصورين بأذن الله ، ثم ذهبوا وشدوا على خيولهم وانطلقوا تجاه القوم المغيرين.

وبعد دقائق جائتني امراءة من اهل بيت محسن الفرم تنتخي وتقول اين مناحي الهيضل، فقلت لها : انا هو فقالت تكفا القوم اخذت خيل محسن وهاك الحصان هذا رد به خواته لأنه مايلحقهن الا هو واخذت تنتخي, وسبحان الله كان الحصان اللي جابته هو الحصان اللي جيت من اجله عشان اخذه فحل لخيلي ، وما اكذب عليك ياطويل العمر حين قالت اين مناحي بانني قرصني قلبي فأنا ضيف عندهم وليس لي دخل بينهم و بين شمر ، وفعلا اخذت الحصان وركبت فوقه ، وقالت هاك هذي الشلفا تنفعك وكانت الشلفا قصيره ونصلها غير محدود واخذتها وانطلقت بالاتجاه اللي توجه له معازيبنا الحروب وبعد دقائق وصلت فاذا بالحروب واقفين جميعهم وامامهم من بعيد شمر والحلال من ورى شمر ، وقلت في نفسي ان جيت من الامام ردوني الحروب لاني ضيف عندهم ولايريدون توريطي معهم ، وكذلك من الامام ايضا سيراني فرسان شمر ويهجمون علي ، وقلت خلني اجي من وراهم كلهم ومن ورى الحلال وفعلا قمت بذلك ياطويل العمر ، فأخذت الجانب الايمن وانحدرت ايمينهم ونيتي الف من ورى الحلال لأن هدفي اني ارد خيل محسن اللي وصتني عليها المره, ولكن سرعان ماشافني ولحقني احد رجال حرب قبل ان اتعدى خيول حرب ، وقال لي : وين رايح انت مجنون ارجع القوم كثر وانت رجل واحد ونحن والله ماننقص من قدرك فأنت فارس ولكن الكثرة تغلب الشجاعة ، قلت : والله ما ارد طلب من انتخى بي وانا الله جابني لكم في هذه الساعة ولاني براجع ابد ، فقال : اجل اسمع ، فيهم رجل منهم ان غلبته سينكسرون ، فقلت للحربي : من هو ؟ فقال : صاحب الجوخه هذاك اللي في اولهم اظن هو قائدهم ، فقلت للحربي : زين عطني شلفاك الطويله اللي معك واخذ هذي اللي معي وما قصر عطاني شلفاه وكانت طال عمرك طويله ومحدودة النصل ، ثم اخذت احيد للجانب الايمن وانا كما تعرف ياطويل العمر لااعرف بسرعة حصان محسن ولم اجربه من قبل بالركوب ولاادري هل هو يسند ويطرد من كيفه والا لا، وعند اقترابي من القوم ، قال احدهم انظروا هذا محسن الفرم وهذا حصانه الاحمر ، فضنوني محسن ، وبعد لحظات انصل علي كبيرهم ابو الجوخه, وعند اقترابه مني اسند للورى حتى اطرده على الحصان وفعلا ارخيت وهزيت رسن حصان محسن ولكن في الطرد ثبت حصانه وقصر حصاني ولم يوازي حصانه ، وكان قصده يريد انه اذا تعب حصاني من الجري ينكس عليه ويقتلني ولكنني كنت قريب منه بما فيه الكفاية لقذفه بالشلفا، وجلست على ركبي فوق ظهر الحصان وهو يجري وهو امامي كالبرق بحصانه ومن السرعة اخذ الهواء يدخل من بين ركبي وظهر الحصان لشدة الطرد ، وعندما اقتربت منه بما يكفي رفعت الشلفا عاليا وقذفتها عليه وسبحان الله قادر على كل شئ دخلت الشلفا من قفاه وخرج رأس النصل من الأمام فسقط صريعا من فوق حصانه على الارض ونزلت من الحصان وانتزعت الشلفا منه وحينها ياطويل العمر هجمت حرب عليهم عندما رأت مقتل قائدهم لكن غزو شمر تراجعوا وانكسروا واخذوا يهربون من كل مكان ، وردينا الحلال انا وفرسان حرب.

فقال الملك عبدالعزيز بن سعود : هل هذا صحيح يا ابن الفرم؟ فقال محسن الفرم : صحيح ياطويل العمر.

وتقبلو تحياتي,,,,,,,,,,,,

 

 

 

 

[معلومات العضو عبدالرحمن الشرافي]

كفووووووووو


وبيض الله وجهك يا بدران

تحياتي

 

 

 

 

[معلومات العضو التميمي المضري]

أحسنت وبارك الله فيك .

 

 

 

 

[معلومات العضو سعـد بن الأشيب]

لاهنت وبيض الله وجهك

الله يرحمهم اجمعين

 

 

 

 

[معلومات العضو قلم بدون حبر]

كفووو والله

با خوالي الهيضل شيوخ برقا

والله يرحم الشيخ مناحي الهيضل رحمه واسعه ويسكنه الجنه

شكراً لك ع النقل

 

 

 

 

[معلومات العضو فهدالمحيسن]

لاهنت اخوي بدران بذكرك لهذه القصة

 

 

 

 

[معلومات العضو كلاش]

أبوزيد الغييثي

أدري ورب الكعبه أنهم عتيبه وألي ذبحهم أبن رشيد مشاهيرهم المحايا ( تركي ومتروك ) ..

أخي عبدالعزيز الدلبحي

أبن طواله بعد حيي !! شمري مايقول (مار أقمحن)

ولايقول ( عقب أوجهوا ) .. ولايقول .... ولايقول ......

ونكهة القصيده روقيه ميه بالميه

الله يخلي الحضري أبن منديل الأسعدي راعي الأسياح ألي قاعد يألف والقصيد يخوك

على قفا من يشيل .. عطني سالفه خرافيه بحكم التخصص وأعطيك عليها قصيده

محبوكه .. بس رايح أتلافى أخطاء من سبقني بهذا النهج وأخليها على نفس لهجة

قبيلة الشاعر ألي بنسبها له

عموماً ياكثر مانشوف من الأكاذيب ومصدرها ( هنيدس ) ذيبان وربعه ..

تسلم يالحية ( جابوه من مكه يخرّز نعوله )