محاورة بين شايب وبنت

[معلومات العضو الركن]

بداية القصة عن شايب أسمه ( حمدان ) وهو رجال هواوي قلبه اخضر مايشوف سوادة إلا ويتولع ومشهور بأنه حبيب

فيه بنت ملكعه وصاحبة مقالب قالت في نفسها انا ليه ما اروح للشايب وامزح معه واضحكه شوي واشوف ردة فعله كيف تكون

راحت له وسلمت عليه كيف الحال ياشايب رد السلام والله بخير الله يعافيك

وفجاءة عطته ظهرها ومشت ( فقت ) ولا استأذان ولا شي

ولع الشايب من حركتها قال فيها كم بيت يستعطفها فيها ويقول انها ذكرته الماضي واذا ماعطيتيني وجه لحقت بأخوي حمود اللي مات من مدة قريبه

ويقول الشايب

يابنت خوذي خاطري وارحميني * * * * * لا تجرحين العود بعيونك السود
غضي نظرك وغطي الوجنتيني * * * * * لعل يوم جدد الجرح ما يعود
يوم انتهى مع مرمسات السنيني* * * * * جتني صواديفه على غير مقصود
باول شهر عشرة نهار الثنيني * * * * * حمدان مروا به على جنازة حمود

البنت كانت تقصد من استفزازه انها تجاريه في القصيد وترد عليه والمسكين ما كان عارف انها شاعرة والشايب ماخذ راحته في التغزل

ردت عليه ابنت

ياشايب الرحمن وينك ويني * * * * * عزي لحالك قدمك الباب مسدود
قلبك عطوف وجاه قلب متيني * * * * * والبنت ما تشفق على مغازل العود
حبل الرجا مقطوع بينك وبيني * * * * * مثل الغليث اللي رعى قلبه الدود
اقفى شبابك والعرب مقبليني * * * * * ياعود مايرجع من العمر مفقود

حطمته يوم قالت له انك عود وان الشباب مايرجع وان مافيه امل تعطيه وجه
حس العود انه متورط وقال كم بيت يقول لها صدي عني انه مايبي الغزل بعدما وصل عمره ثمانين سنه

وقول الشايب

يابنت صدي بالعيون الضليله * * * * * لا صد عنك الله نهار القيامه
مالي ومالك يالفروع الطويله * * * * * لو فيك من رسم البداوه علامه
يابنت ما لي بالثمانين حيله * * * * * اهدف كما تهدف على البير قامه
افقى شبابي والدهر شفت به ميله * * * * * يالله حسن الخاتمه والسلامه
عطيتك موجز والبضاعة قليله * * * * * واخذت لك من صافي الماء سنامه

راحت الأيام والشايب مسكين سنه خذله معها شايب وهي بنت وتقوله كيف اعطي الشايب وجه
بعد فتره عرضت عليه البنت واستفزته وراحت وخلته ولع الشايب وقال ليه ما ابين لها في كم بيت انها بتشيب مثلي واني رجال طيب وان الناس تنصاني ومعروف بالكرم واني ما بي منها غير التحيه والترحيب

قال الشايب

يابنت ماجاك الكبر والخشونه * * * * * وعادت شباب اليوم يجفل من الشيب
ياسرع ما وبلك تمزع مزونه * * * * * يالفاتنه يام اثمان الرعابيب
يا بنت ما بيني وبينك مهونه * * * * * كلمة شرف نبي تحيه وترحيب
الله من عودٍ ثقيله طنونه * * * * * ينصاه راع المشكله والمواجيب
على الكرم والدين نفسه حنونه * * * * * تلقاه بالاجواد شرق وتغاريب

جهز الأبيات وارسلها مع عجوز من ربعه ووعد العجوز بهديه اذا وصلت الرساله للبنت
راحت العجوز وسلمت الابيات شافتها البنت وقفلت على العجوز في غرفه وقالت مثل ماجيتي يأبياته لي ما ترجعين إلا برسالتي وتسلمينها له
العجوز المسكينه قالت طلعيني ولا ابي منكم شيء الله لا يعيدكم انتم واوراقكم

قالت البنت

العود عود وطايحاتٍ سنونه * * * * * من كثر مايرقد على جرة الذيب
عودٍ مهرقل والعرب ما يبونه * * * * * ياعود مالك في طويل المراقيب
اقفى شباب العود راحت حتونه * * * * * مثل اليتيم اللي بكا ما له مجيب
جداه ينثر دمعةٍ من عيونه * * * * * غريق موج ما لقا له مقاضيب
هذا ما حبيت ان انقله لكم للمتعه وتغيير جو

 

 

 

 

[معلومات العضو الفيصل الودعاني]

الله يعطيك العافية على هذا النقل واطربتنا .


محبكم / الفيصل الودعاني

 

 

 

 

[معلومات العضو بنت الأكارم]

يالله المستعان لايصلح العطار ماأفسده الدهر .. والبنت يبيلها كف على وجهها الحياء نعمه .. مشكور اخوي أسعدتنا بهذه المشاركه ..

 

 

 

 

[معلومات العضو الركن]

المشاركة الأصلية كتبت بواسطة بنت الأكارم

يالله المستعان لايصلح العطار ماأفسده الدهر .. والبنت يبيلها كف على وجهها الحياء نعمه .. مشكور اخوي أسعدتنا بهذه المشاركه ..

الأخ / الفيصل الودعاني : يشرفني مروركم العزيز على قلبي

الأخت / بنت الأكارم : تعليق جميل يعطيك العافيه على المرور

تحية وتقدير للجميع

 

 

 

 

[معلومات العضو رعاد]

مشكور اخوي والله يعطيك العافية

 

 

 

 

[معلومات العضو الركن]

الأخ العزيز ابو مشاري

عطرت المشاركة بمروركم وحياك الله

 

 

 

 

[معلومات العضو يحيى الودعاني]

لاهنت أخوي الركن وبيض الله وجهك
دائماً سوالفك طيبة

 

 

 

 

[معلومات العضو صالح الجعيدي]

أخي الغالي/ الركن ،،،
لا هنت على إيراد القصة الممتعة والقصائد الجزلة يالقرم.
بيض الله وجهك على النقل الجديد والمتميز ،،،
ننتظر جديدك دائماً.
وتقبل خالص تحيات أخوك ومحبك في الله/ صالح الجعيدي

 

 

 

 

[معلومات العضو الركن]

الأخ العزيز يحيى الودعاني

أنت اطيب وسعيد بمرورك يالغالي


الأخ صالح الجعيدي

تميزنا من تميزكم وكم انا سعيد بوجود اسمك في هذا المنتدى

 

 

 

 

[معلومات العضو فهاد]

لاهنت يالركن على القصة والقصيدة الجميلة.,

 

 

 

 

[معلومات العضو الركن]

المشاركة الأصلية كتبت بواسطة فهاد

لاهنت يالركن على القصة والقصيدة الجميلة.,

ولا هان شخصكم الكريم على المرور الطيب