ماني عجول بالزعل في غيابه

[معلومات العضو مصوت بالعشا]

أنا رفيقي مَا سمع اللي حكابه
لو جاتنا منه السوالف مضاريع
اقرا مفاهيمه.. واحسّب حسابه
واشوف مدخال القدم والمطاليع

ماني عجولٍ بالزعل في غيابه
قدّام مَا سمع منه ما عطى ولا ابيع

لا خير في رفقه بليّا حبابه
ولا خير في جمع القلوب المواجيع

ورفيقك الغالي تحمّل عتابه
واحلم عليه إليا دفعته دوافيع

شيّع ثناه ولا تبيّن عيابه
عاره يعورك يا بعيد المراميع

وان كان دون مرافقك صُكْ بابه
لقّه قفاك وخل مشيك مع الريع

خلّه على بعدك يسرّح ركابه
يقضي سنه والا شهورن وأسابيع

وإليا طلبك الصلح يا مرحبا به
سهّل طريقه لا يجي له موانيع

واحفظ لسانك عنه واستر جنابه
لا تجرحه بين الذياب المجاويع

ترى اللسان.. مْلكعٍ يندعابه
مثل الحصان اللي يبي له مصاريع

واجعل على هرجٍ تقوله رقابه
عقلٍ يصّرف طايشات المواضيع

والصمت في بعض المجالس مهابه
يكفيك شر اهل الفمّي اللواسيع

عن كلمتن يقضب خطاها قضابه
يركض عليها مصنع الهرج تصنيع

خلّه يروح ومنك خالٍ جرابه
يرجع كما المفلس يسوق المطاميع

واحفظ صداقة طيبين القرابه
ربعك إليا قلّت عليك المشاريع

سيفٍ نهار الضيق تقضب نصابه
يا قاك من حدب السيوف البواتيع

وإليا جفاك الدار مالك وما به
رزقك على اللي طوّع الكون تطويع

ممشاك في حزمٍ تطارد سرابه
أخير من شوف الوجيه المدانيع

خطو الرخوم مصاحبين الخيابه
تجار هرج.. وباللوازم كراسيع

الرجل مثل الذيب رزقه نهابه
يأخذ مع الدوّ الخلاوي قراطيع

والطيب ضلعن زامياتن هضابه
للريح في شامخ ركونه ذعاذيع

عسر المراقي يتعب اللي رقابه
ما يا كره كود الحرار القواطيع

والاّ الردى.. جرفٍ هيالٍ ترابه
حوله لزهران المقافي مرابيع

يرقد به الحصني ويلقا الذرابه
والبوم بين غصون قشعه مواقيع

رجلٍ على الناموس بيضٍ ثيابه
ورجلٍ يرقعها على المتن ترقيع

ورجلٍ يزايم علّته من عذابه
عيدان ناره للقريّب مواليع

على الجماعة كل يومٍ طلابه
خماش وجه ولا لقي به منافيع

ورجلٍ مع الأيام ما ينصخا به
عز الرفيق إليا صفعته صوافيع

غيثٍ على من جاه يمطر سحابه
عشبه على روس النوابي مفاقيع

ورجلٍ سوات الليث عطبٍ صوابه
من دون حقّه سنّع الخصم تسنيع

طيّب وعصمان الشوارب تهابه
يرجا وتخشاه الرجال الصعاصيع

ومن لا درى بالناس محدن درابه
ما له على سجل النشاما تواقيع

ومن لا يحوش النعم.. بأوّل شبابه
في شيبته يحسب حساب الرواضيع

وختامها ذكر النبي والصحابه
واستغفر اللي ما يضيّع ولا يضيع


الشاعر : مفرح الضمني المطيري

 

 

 

 

[معلومات العضو شافي بن راشد النتيفات]

اقرا مفاهيمه.. واحسّب حسابه
واشوف مدخال القدم والمطاليع

ماني عجولٍ بالزعل في غيابه
قدّام مَا سمع منه ما عطى ولا ابيع



يعطيك العافية على النقل وصح لسان شاعرها

 

 

 

 

[معلومات العضو مبارك بن شافي النتيفات]

صح لسان الظمني وسلمت يمناك على النقل المميز

تحياتي وتقديري

 

 

 

 

[معلومات العضو فهد المقابله]

صح لسان الظمني وسلمت يمناك على النقل المميز

تحياتي وتقديري

 

 

 

 

[معلومات العضو حرآير]

إبدآع
وصح لسآنك .. لآ عدمنآ هـ الذوق
وتسلم يمنآك على النقل
لآ هنت
.
.
تحيتي ’ : حرآير

 

 

 

 

[معلومات العضو مصوت بالعشا]

تشرفنا بمروركم وسعدنا لكم فائق احترامي

 

 

 

 

[معلومات العضو النايفه]

انتقاء فاخر لذائقة فاخره

صح لسان الشاعر وتسلم يمينك يامصوت بالعشا

لاعدمناك

 

 

 

 

[معلومات العضو مصوت بالعشا]

اشكركم على المرور