قصيدة للشاعر راشد بن حنيتش الدبالين (رحمه الله )

**معلومات** **العضو** · 27-10-2009, 01:45 AM

بسم الله الرحمن الرحيم
السلام عليكم ورحمة الله وبركاته

اقدم لكم قصيده للشاعر/ راشد بن حنيتش الدبالين ( رحمه الله )

يالله انا طالبك يامسوي النيه=ياخالقٍ البشر والنفس مغنيها
انك تسرع بصيفه عقب وسميه=وانك لدار المحل بالوبل تسقيها
ترعابها اللي تعجب العين بالنيه=ملحاً ورب البشر بالزين مسويها
حنّا هل الابل اليامن قادها نيه=لاجات عشب الوسامي فيه نرعيها
نرعابها فالخطر وديار حربيه=بمسلهباتٍ تشوق عيون راعيها
ومن زارنا عندها ضاعت هقاويه=عود صويبٍ جروحه من يداويها
كسب لجداننا ماهيب مشريه=حرشاً وهذي وسوم اجدودنا فيها
حنّا آل زايد هل الردّات فالهيه=والجار ناسم عصاه ونمّنه فيها
فرجان وعيال حسنٍ والصهيبيه=وانشب ضو الحرايب مانطفيها
هرجٍ صحيحٍ وقد بانت مواريه=وانشد هل العرف ياللي جاهلٍ فيها
والله يعز الملك نصر السعوديه=اللي حكمها وكلٍ كان يبغيها
مشّى الشريعه ويعطي الحق راعيّه=يالله عسى جنة الفردوس ياتيها
ورث حرارٍ على العدوان حربيه=نمشي على حكمهم والله مساويها
من حد دار اليمن واليا الكويتيه=كلن سكن في دياره وامنن فيها

وسلامتكم جميع ...

**معلومات** **العضو** · 27-10-2009, 03:49 AM

صح لسانك وصح لسان الشاعر راشد حنيتش الدبالين
وقصيده حماسيه رائعه
واسمحلي بوضعها بقسمها الانسب

**معلومات** **العضو** · 27-10-2009, 04:14 AM

صح ابدنك ولاهنت طال عمرك على وضعها فالمكان المخصص تحياتي واحترامي ..

**معلومات** **العضو** · 04-11-2009, 11:33 PM

مشكووور

**معلومات** **العضو** · 09-11-2010, 07:39 PM

[size="6"]صح لسان شاعرنا المرحوم ونشكرك يا ابو سااااالم[/size]

**معلومات** **العضو** · 09-11-2010, 09:31 PM

صح الله السانه والسانك والله يرحمه ويسكنه الجنه

عز الله قصيده جزله

الله لا يهينك يابو سالم على انزالها في الموقع

ونتمنى الاكثار من قصيد المرحوم ولا خلا ولا عدم

الذين يشاهدون محتوى الموضوع الآن : 1 ( الأعضاء 0 والزوار 1)

		منتديات صحيفة وادي الدواسر الالكترونية