مهند ولميس ، وسنوات الضياع !!!!!!!!!!!!!!!!!!!!

[معلومات العضو محمد حمدان المالكي]

مهند .. ولميس ، وسنوات الضياع !!
لمحمد بن حمدان المالكي

بعض القنواوات ابتدت في هالزمن نزع القناع=من بعد ما كنا نفكرها لنا خير الجليس
طلت علينا طول سبع شهور ( بسنين الضياع )=بعض البشر ضاعوا مع ( مهند ) والآخر مع ( لميس )
وقت المسلسل كنهم قاموا على الوجبه جياع=والصمت خيمه فوقهم ما عاد تسمع لو رميس
هذاك يتنهد ، وهذا قد ذبحه الالتياع=والمشهد المعروض : سنيوره يلاويها خسيس
مره يغازلها وتغمز له بالاعيان الوساع=والمره الاخرى تصل للمس لا حمي الوطيس
ما فيه مانع يرتكب معها الرذيله باقتناع !=ما فيه مانع تحمل بمولود لا شرعي وهيس !
كل الامور محلله والهم تأجيج الصراع=حتى يتابعهم كثير الناس ويشوف العفيس
وأمر العجب بعض الشيابه مبتليه الله وساع=يسهر على شان المسلسل والسفاهه والدويس
ما غير مترزز على وضع المهاجم والدفاع=وليا نظر في حرمته قام يتعوذ من بليس
وإلاَّ العجايز بعضهن تبكي ليا شافت وداع=وتسب ( تيم ) وتلعنه وتقول وش هذا النحيس ؟
مرّه تمد كراعها ومرار تقبض في كراع=والخوف لا مات البطل من حزنها تغدي فطيس
والبعض سمى ابنه على ( مهند ) سذاجه واتباع=والبعض سماها ( لميس ) وليتهم سموا تميس !!!
والكارثه حتى الصغار يتابعونه باندفاع=والقاهم ( امهند ) وربعه في ظلام الخندريس
وامر العجب عادت سياحة تركيا بعد انقطاع=موجه تبعها من غدا للزيف والموضه حبيس
ترويج للمسخ الصليبي والرذيله والطباع=واقناع بالتحرير من كل القيم ونصير عيس
ندبك مع الدبكه ونذعن للثعاله والضباع=ونلبس الواقع بثوب الذل في الليل الكبيس
وش كان يعني لو يشاع العهر والفتنه تشاع !!=والامر حريه سواءً عندنا وإلا بنيس !!
وش كان يمنع لو تطب البنت ما بين السباع !!=ويصير ما يحصل بمونيكا على عهد الرئيس !!
يبغون ترسيخ إن هذا العِرض ما اسهل ما يباع=وإن العلاقه يفترض تصبح مثل عنزٍ وتيس
وإن الرذيله والدنس ما فيه شيٍ لو تذاع=وإن الامر عادي ولو كنا مع زمرة بليس
والمشكله فينا .. رمينا الحبل واشغلنا المتاع=والجل قال اش لي دخل .. ما باقي إلا اصبح بُليس
وش لون مالك أي دخل .. وانته تعرض للخداع=وانته من احفاد النبي .. لا ترتضي فيك البخيس
خذ لك قرار وخل لو مره تعْرف إنك شجاع=وتقاطع الفتنه بكل اصرار وترد المخيس
واقول جعل الله يحفظ الدين ويصون القلاع=وإنه يثبتنا على قرآننا الدر النفيس
والله يحمينا من الاعلام وسنين الضياع=وإنه يكافينا ( مهند ) ثم يكفينا ( لميس )

 

 

 

 

[معلومات العضو نجــــــــــديه]

كفو والله
وصف رائع ووافي اخترق السحب
هنا نصفق بحراره
بيض الله وجهك عالقصيد الجزل
قصيده في غاية الروعه من أولها لـ تاليها
ابدعت يامحمد
صح لسانك وفكرك
وافيه من راس واحساس وافي
لك فااائق احترامي وتقديري
وننتظر جديدك لاهنت

 

 

 

 

[معلومات العضو معيوف بن مبارك]

محمد ارحب وصح السانك

ليس غريب عليك الابداع وضاهره نعاني منها جميع

محمد ضحكت من الشايب الي يتعوذ من بليس وياكثرهم
لاهنت طال عمرك

 

 

 

 

[معلومات العضو راشد المسعري]

محمد حمدان المالكي


لله درك ياشيخ ، قلت فأبدعت


هكذا القصيد والشعر وهكذا معالجة المواضيع


والشعر رسالة وعز الله عرفت تختار وتوصل رسالتك


تقبل ودي وتقديري ،،،،

 

 

 

 

[معلومات العضو نايف الخييلي]

صح لسانك يامحمد المالكي , وقصيده رائعه تحكي واقع مؤسف

 

 

 

 

[معلومات العضو ابن قرنين]

محمد صح الله السانك يالسنافي وبيض الله وجهـــــك ليس غريب عليك الابداع وظاهره نعاني منها جميع والله المستعان تقبل خالص تحياتي ابـــــن قـــــرنين

 

 

 

 

[معلومات العضو محمد حمدان المالكي]

يا مرحبا تراحيب المطر
اسعدتني زيارتكم الكريمة
واستأنست بمروركم
مرحبا تراحيب المرط
كلا باسمه

 

 

 

 

[معلومات العضو محمد حمدان المالكي]

حيا الله ابن قرنين تراحيب المطر