قصه في منتهى الروعه اتمنى تعجبكم
الجزء الاول....
تجلست واسندت ظهرها لشجرة الوحيده في بيت عمها.......وتأملت مغيب الشمس والمعركه التي كانت تدور بين الليل والنهار...بين النور والظلام..ابتسمت بمراره وهي تشهد انتصار الظلام على النور....بس بكره فيه يوم جديد وفيه معركه جديده بتنصر الشمس فيها وبتطرد الظلام.......تنهدت بعمق واخذ شريط الذكريات يمر امامها لكن الظلام اللي خيم على حياتها ماله شمس تطرده.......
-"لازم يعني من هالقعده كل يوم في هالوقت"
التفتت بسمه على بنات عمها اللي توهم دخلو البيت:"قاعده اتأمل مغيب الشمس"
هدى بسخريه:" اش تحبين في مغيب الشمس عشان تتأملينه"
بسمه وهي قايمه بتدخل:"ما احبه......احب الشروق اكثر... بس كرهي له مايمنع اني اتعلم اتعايش معاه....مثل ما فيحياتي اشياء كثيره
مااحبها بس متعايشه معاها"
هدى:"انتي اش قاعده تقولين....الحمد لله والشكر على نعمة العقل"
هند:"قصدها حياتها عندنا"
كملت بسمه طريقها....وماردت عليها حتى تبعد عن المشاكل...
هدى وهي تناظر بسمه بعد مااختفت:"ياكرهي لها"
هند:" حتى انا....تصدقين احيانا احاول احبها... بس لما اشوف كل اللي احبهم صاروا يفضلونها علي...."
هدى تقاطعها بضيق:" بدال هالمقدمه الطويله العريضه.... قولي باختصار اغار منها"
هند وهي تلتفت على اختها:"وانتي ليش تكرهينها ياام العريف؟؟"
هدى:"اكرهها كذا بدون سبب"
هند:"هههههه....بدون سبب ولا لان مرة خالي خطبتها....لحبيب القلب"
هدى بعصبيه:"سكتي لاتسمعك"
هند:"حتى لوسمعتني.... مافيه امل انها تتزوج يوسف لن ابوي رفض حتى من غير يشاورها"
بسمه بنت اخو ابو عبد العزيز(حمد)تعيش عند عمها من سبع سنين من عقب وفاة ابوها ومها واخوها في حادث سياره.... عمرها 19سنه تدرس ثالث ثانوي...رغم صعوبة الحياه في بيت عمها الا انها متفوقه...
جميله كان جمالها بسيط وهادي متوسطة البياض ويميزها صفاء بشرتها عيونها سود ووساع وشعرها اسود متوسط الطول واحلى مافيه انه غزير......
هدى بنت عم بسمه اكبرمنها تدرس ثاني جامعه....جميله وتحب تغير في شكلها...كل فتره لشعرها قصه وصبغه مختلفه...
هند عمرها 17سنه تشبه اختها هدى...لا انها قصيره نسبيا.....
اول مادخلت كانت مرة عمها في الصاله وكالعاده لما تشوفها....لازم تنكد عليها....
-"ذكرتي لعبد العزيز".
بسمه:"ايه ذاكرت له بس هو الله يهديه...."
ام عبد العزيز(حصه)مقاطعه كلامها:" لا بس ولا غيره ان جات علاماته ضعيفه ياويلك يابسمه"
بسمه :" وانا اش ذنبي ؟؟"
ام عبد العزيز:" ذنبك انه هو مسؤليتك وان ما نجح تحلمين تدخلين امتحانات الثانويه... ان يروح تعبك على الفاضي..."
بسمه في خاطرها ياها الثانويه اللي كل شوي والثاني تهددني بسبتها...ما لي الا الصبر..
بسمه:"لا ان شاء الله ينجح وبتفوق بعد"
ام عبد العزيزبسخريه:"نشوف...التفوق"
تنتبه بسمه على رنة التلفون...
ترد ام عبد العزيز:"الوه"
-"السلام عليكم"
ام عبد العزيز:"وعليكم السلام هلا والله بالغاليه"
-"اشلونكم.....واشلون العيال؟؟"
ام عبد العزيز:"طيبن الله يسلمك...اشخبارك انت؟؟"
بدريه"الحمد لله بخير.....يسرك الحال"
ام عبد العزيز:"وينك يالقاطعه مااحد يشوفك"
بدريه:"خليها على الله التهينا في العيال والمدارس"
ام عبد العزيز:"صادقه....هالمدارس جننتا"
بدريه:"عاد كلمتك عشان امل لها اسبوع غايبه مثل ماتدرين وبغيتها تذاكرمع بسمه"
ام عبد العزيز:"ايه ما عليه خليها تجي الخميس تذاكر معها..كان اقول اليوم بس اليوم رايحين بيت اهلي"
بدريه:"طيب خلي بسمه تجي اليوم عندنا... تدرين ابو مازن مسافر وما عندي عيال كبارعشان تخافون عليها"...
ام عبد العزيز:"افا عليك انتي مثل امها بس ما ادري عن عمها يرضى تجيكم...بالذات انا نتأخر في بيت اهلي"
بدريه:"ماودي احرجك ياام عبد العزيزمع ابو عبد العزيز..."
ام عبد العزيز مقاطعه:" تدرين ما يكون خاطرك الاطيب"
بدريه: "هذا العشم فيك يام عبد العزيز"...
ام عبد العزيز:"بكلمه وان شاء الله ما يخالف"...
بدريه"مشكوره....ياللا تامرين شي"...
ام عبد العزيز:" سلامتك يالغاليه...مع السلامه"
على طول من سكرت ناظرت بسمه...نظراات كلها كره..
ام عبد العزيز:"هذي جارتنا ام مازن...بنتها كانت مريضه الاسبوع الماضي..
وتبغى تروحين اليوم تساعدينها في المذاكره"
بسمه (في خاطره والله منتي هينه ياامل قول وفعل):"على راحتك...مرة عمي"
ام عبد العزيز:" والله راحتي ما تروحين...لكن هذي ام مازن غاليه علي ما اقدرارفض لها طلب"
######################
-"ها يمه...عسى وافقت"
-"انت قاعده بجنبي وسامعه كل شي لا يكون انا اتكلم سيلاني وانا ما ادري"
أمل:"ههههههههه...حلوه منك ياام احلى امل...اقصد يا احلى ام"
بدريه:"امل قومي ذاكري لك كلمتين...انا متأكده من تجي بسمه على المذاكره السلام"
أمل:"أي مذاكره الله يهديك انا ناديت بسمه عشان ننبسط مع بعض مهو نذاكر...
بدريه:"وانا لوشفتك مقصر في دروسك....كان مستحيل انادي بسمه"
امل:"على اني كنت غايبه بس بسمه ارسلت لي كل الدروس اللي ما حظرتها "
"بدريه وهي تفكر:"فيها الخير...بس تصدقين ياامل بسمه كاااااسره خاطري"
أمل:"ايه والله يمه..الله يعينها...كل اللي في البيت ما يحبونهالا عمها ولا مرته...ولا هند ولا هدى الا بالعكس يغارن منها بشكل فضيع هي سحر اللي كانت طيبه معها ومن يوم تزوجت وسافرت فقدتها بسمه"..
بدريه وهي تناظر ساعتها: الله يعينها"
امل:"اشفيك...كل شوي تناظرين الساعه"
بدريه:"خالك خالد اتصل وقال بيمر علينا واشوفه تأخر"
امل:"والله اشتقت له من زمان ما شفناه"
بدريه وهي تتنهد:"حتى هو حالته حاله من عقب اللي صار"
أمل:"خالي خالد يستاهل مسوي قيس ليلى"
بدريه بعصبيه:"اي يستاهل الله يهديك من يوم هم صغار وهم خالد لعبير وعبير لخالدحتى حببوهم في بعض....لكن الله يسامح اللي كان السبب"
أمل:"الحين صدق عبير انخطبت"
بدريه:"ماادري وحتى لوما انخطبت ابوي مستحيل يوافق ان خالد يخطبها مره ثانيه عقب اللي صار"
امل:"انا اللي قاهرني اش اللي محببه فيها الاقمه في الغرور والتكبر"
بدريه: "اقول ..ترى لسانك طويل"
أمل:"اسفه يمه...بس مقهوره منها ومن امها الشريره"..
بدريه:"ما كنك تسبين خالتي وبنتها"
تقوم وتحب راس امها:"اسفه يمه بس كل ما اشوف خالي وحاله اللي تغير احقد عليهم"
ام مازن:"اقول اسكتي...احسن لا يدخل خالك واحنا في طاري...."
-"طاري شو..."
التفتوا ثنتينهم لمصدر الصوت...
أمل تمثل دور مرعوبه:" بسم الله روعتني....وبعدين من فتح لك الباب"
خالد:"ليه لها الدرجه اخوف...وبعدين يالذكيه عندي مفتاح"
ام مازن:"هلا والله بخالد"
خالد:"هلا فيك يالغاليه"
بدريه:"تو ما نور البيت"
أمل:"لا تغلطين يمه البيت منور بوجودي...(تقرب من امها كأنها بتقولها موضوع مهم)
"بعدين يمه ليش تعطينه مفتاح بيتنا ...ما تدرين ان حاميها حراميها"
تجرها امه من شعرها بلين ...
بدريه:"حاميها حراميها في عينك ياللي ما تستحين فيه بنت محترمه تكلم خالها بهالطريقه"
امل تقرب وتحظن خالها:"امون على خالي "
خالد:"ههههههه تمونين بس لاتزودينها"
امل:"افا عليك...الحين انا ازودها "
بدريه:"اقول سوي القهوه لخالك...احسن من الهذره الزايده"
أمل:وهي تأشر على خشمها... "حاضر على ها الخشم"
خالد:" ما ابغى قهوه من يدها ...اخاف اتسمم"
أمل:"لا تخاف المستشفى قريب ..وتجي الاسعاف لحدنا اذا تبغى توصيل مجاني"
خالد:"هههههههههه ...يالله اقلبي وجهك ابغى اسولف مع اختي"
أمل:"اشبع في اختك انا رايحه"
طلعت امل وهي سعيده بشوفة خالها...
خالد:"اش اخبار ابو مازن"
بدريه:"ما عليه طيب ...موعد وصوله يوم الجمعه"
خالد:"يوصل بالسلامه"
بدريه:"الله يسلمك...الا اشلون امي وابوي"
خالد:"ما عليهم طيبن..عاد تروحين معي اليوم ان شاء الله"
بدريه:"لا اليوم ما اقدر... بكره ان شاء الله اجي"
سمعت بدريه امل تناديها:"خلني اشوف ها الخبله اش تسوي في المطبخ"
خالد هو الولد الوحيد لامه وابوه عمره 28 سنه يشتغل في شركة ابوه وعمامه...وسيم...قمه في الاخلاق لكن اذا عصب يفقد القدره على التحكم في نفسه.....
سمع التلفون يرن نادى بدريه ماردت عليه
خالد:"شكلها ما تسمع...خلني اشوف مين"
توه رافع التلفون الا ويسمع ضحكه...
-"هههههههه ...سلام ياجميل"
خالد:"الوووو"
ارتبكت بسمه...اخر شي توقعته يرد عليها رجال لانها داريه انه ابو مازن مسافر ..
خالد:"الووووووو"
بسمه...ما قدرت ترد وسكرت السماعه...
خالد:"ياحلو هاالضحكه"
أمل اللي توها داخله هي وامها:"ضحكت منو ...اعترف"
خالد:"ههههههه...ما ادري وحده ما عجبها صوتي وسكرت في وجهي"
امل بحشريتها المعتاده:"بشوف رقم منو"
تقرب امل من التلفون:"هذا رقم جيرانا ...اكيد هذي بسمه...بكلمها اشوف ما جاها سكته"
خالد:"وليش يجيها سكته.. الا سلمي عليها "
أمل وهي تدق الرقم:"لو اقولها خالي يسلم عليك.... تقاطعني وترمي بصداقة سبع سنين عرض الحائط"
خالد:"ههههههههه حلوه عرض الحائط"
ماردت على خالها لانها بسمه رفعت التلفون-"الو"
أمل:"مساء الخيييييير"
بسمه:"امل انتو عندكم احد.....ولا انا غلطت في الرقم"
أمل:"شوي ...شوي... كل ذا اسئله ...ايه خالي خالد عندنا...وهو اللي رد عليك"
كانت امل تبغى تحرجها:"بس اشرايك في صوته حلو صح"
بسمه:"ترى والله لسكر"
أمل:"لا امزح معاك ياشيخه ..(.وهي تقلد اللهجه السوريه)لك طولي بالك"
بسمه:"المهم...ترى بجيكم بعد ساعه"
أمل وهي تمزح:"عاد ما صدقتي عزمناك...تقومين تجين بدري"
بسمه:..................
أمل:"هههههه امزح والله امزح لا تزعلين ...الاعلى فكره اشرايك في الافكار"
وهي توطي صوتها علشان امها ما تسمعها :"خليت سحيله ام الخلاقين توافق تخليك تجين"
بسمه:" خطيره افكارك....."
امل:"غريبه قدرتي تكلمين"
بسمه:"طلعوا فوق وما صدقت"
امل:"انتبهي لايصيدونك"
بسمه:" اقول يالله مع السلامه عمي توه داخل وصوته معصب الله يستر"
وسكرت حتى قبل تسمع ردها
أمل:"مع ....."
خالداللي كان منتبه:"هههههههههههه ما عطتك فرصه تقولين مع السلامه ما تنلام لانك ممله"
ما ردت عليه وكانت سرحانه استغرب خالد منها... شوي الا وتكلم امها...
أمل:"يمه بسمه تقول جا عمها وصوته معصب اخاف ما يخليها تجي"
بدريه:" لا تخافين على انه عصبي بس ما يقدر يكسر كلمة مرته"
أمل:"ان شاء الله يمه...انا ماادري اشلون متحمله هالوحش"
بدريه: "اقول روحي شوفي اخوك محمد ما صحى من نومه"
أمل:"حركااااات والله يمه...طرده مؤدبه...عادي قولي ضفي وجهك.. اتقبلها بصدر رحب"
ام مازن وخالدفي نفس الوقت:" طيب ضفي وجهك"
أمل:"ههههه لها الدرجه انا على قلوبكم...اوكيه يالله باي"
طلعت الدرج وهي عارفه اش الموضوع اللي رح يتكلمون فيه...
امل علاقتها مع امها قوبه ...يمكن لان ما فيه فرق في السن كبيربدريه عمرها 34سنه تزوجت عمرها 15سنه...و امل 18سنه اكبر عيالها
عقبها رهف عمره 14سنه دلوعت ابوها ومازن عمره 9سنين واخر العنقود محمد عمره سنه...
بعد ماطلعت امل التفتت بدريه لاخوها وتاملت وجهه خالد كانت له معزه خاصه يمكن لانه الاخ الوحيد ويمكن لانه عمره ما قطعها ودايم يسأل عنها ويستشيرها في كل شي...
قطع تاملتها خالد:"وين رحتي قاعد اكلمك ما تردين ... اكيد عند الحبيب الغايب"
بدريه:" وانت الصادق عند الحبيب الحاضر اللي قاعد قدامي"
خالد:"هذ انتي قلتها قدامك....ومثل ماانتي شايفه طيب وما فيني الا كل خير"
بدريه:"ونظرة الحزن اللي تطل من عيونك"
تنهد خالد وابتسم بمراره :"يابدريه لا تقلبين المواجع"
بدريه:" ياخوي من باعك بيعه"
خالد:"هي مالهاذنب"
بدريه: "النتيجه وحده ..الحين عقب فتره بسيطه بتكون في ذمت رجال"
خالد:"بس هي للحين ماانخطبت وما سمعنا الاكلام"
بدريه:"اصلا حتى لو ماانخطبت تتوقع ابوي يرضى يخطب لك عبيرمره ثانيه عقب اللي صار"
خالد:"انا وعبير مالنا ذنب في كل اللي يصير"
بدريه:"ذنبكم انها هي اخت محمد والعنود تصير بنت عمك"
خالد:"محمد والعنود لا اول اثنين ولاآخر اثنين يتطلقون"
بدريه:"صحيح بس ياخالد طلاقهم اثر في علاقة العايلتين لدرجة ان ابوها فسخ الخطبه"
خالد بحسره:"اه...يالقهر كان موعد ملكتنا عقب الامتحانات"
بدريه بحنان:"كل شي ياخوي قسمه ونصيب"
خالد:"خلاااااااص انا ما افكر اتزوج"
بدريه:" حرام عليك اللي تسويه في نفسك...طيب ما فكرت في امي وابوي اللي امنيتهم يشوفون عيالك"
خالد: "هذا اللي مقطع قلبي امي وابوي"
بدريه: "ياخالد انت اللي معيش نفسك في دوامه منت قادر تطلع نفسك منهااشلون ياخالد لوصابتك مصيبه لا قدر الله"
قاطعها بعصبيه :"اللي انا الحين فيه ما تعتبرينه مصيبه اني افقد انسانه كان حلمي انها
تكون شريكة حياتي وام عيالي وتبغيني اكون سعيد"
بدريه:" انا ما قلت كذا ياخالد بس الانسان لازم يساعد نفسه انه يطلع من اللي هو فيه تصدق اعرف انسانه عايشه انواااع المآسي لكن لما تشوفها تقول هاالانسانه قمه في السعاده... فقدت اسرتها في
كانت هي الناجيه الوحيده... عايشه عند عم قمه في حادث
الظلم والتسلط ما يرحمها واسرته ماتقل عنه في ظلمها ولكن ...صابره ومحتسبه وتنتظر الفرج من الكريم"
خالد:" هذي بسمه اللي تو كلمت امل"
بدريه وهي متفاجئه:"اش دراك..."
خالد.:" سمعت امل يوم تقول عمها جا وما ادري شو"
بدريه:"ايه...الله يعينها...المهم حاول يخالد تنسى عبير"
خالد:"تطلبين يابدريه المستحيل"
بدريه:"هالكثر تحبها ياخالد؟؟"
تنهد ومارد عليها الابابتسامه حزينه وسرح بعيد....ولعبير اللي مايتصور انه بيحب احد غيرها..
-"هيه ...انت يالحبيب وين رحت؟؟"
خالد:"هلا والله برهوفه الحلوه ..ما انتبهت يوم دخلتي"
رهف:"اكيد ماانتبهت كنت في عالم ثاني ...المهم ترى اشتقنا لك ما قمت تجينا ...وان جيت تكون ثلاثة ارباع وقتك وانت سرحان وين خالي الاولي
... والله اني اشتقت له"
ضمها بحنان لصدره ..حتى انتي يارهف ...اجل اشلون حال امي وابوي انا لازم اطلع من اللي انا فيه اكراما للي يحبوني...
خالد:"اقول اش مسويه في الدراسه عسى بس شاطره على خالك"
رهف:"اعجبك انا مهو الغبيه اللي فوق"
خالد:"ههههههه ليتها تسمعك"
رهف:"والله صدق واللي يقهر صديقاتها اشطر ثنتين"
بدريه:"على الاقل تعرف تختار صديقاته مهو انتي اللي صديقاتك المترديه والنطيحه "
خالد:هههههههههههههههه
رهف:"يمه حرااام عليك اش حلاتهم صديقاتي وبعدين حصلت انا مثل بسمه ودلال وما صادقت بالذات بسمه ياحبي لها والله انها خسااااره تكون صديقه لامل"
خالد.:"اقول اش فيكم ما عندكم طاري الابسمه لايكون هذا اليوم العالمي لبسمه"
رهف:"ومن اللي يشوف بسمه وما يحبها......تصدق حتى مازن يموت فيها"
خالد:"ماشاء الله... عرفوني ياجماعه عليها يمكن احبها معكم"
رهف بكل برآه:"عااااااااااادي تزوجها وانت تحبها على طول"
خالد:"ههههههه تدرين يابنت اختي كفايه انتوا تحبونها"
رهف وهي تهزكتفها:"كيفك انت الخسران"
خالدوهو قايم بيطلع:"ههههههههه ياللا يابدريه انا استئذن....اشوفكم ان شاء الله بكره انتي وفرقة معجبين بسمه"
بدريه:"هههههههههه ان شاء الله"
طلع من عندهم وهويتصنع الضحك...يحاول يبين قدام اخته وعيالها انه عادي ..وهو من داخله ميت قهروحزن ...مايتخل ان عبير تكون لغيره..
##################################
دخل البيت وهو معصب من شغل المكتب ومن الزبون اللي كان ذكي وما قدر يلعب عليه ....ويغشه في الارض طايحه في كبده لها شهر... لقاها في وجهه توها تسكر التلفون بسرعه...
ابوعبد العزيزبعصبيه: "من تكلمين انتي ووجهك"
بسمه:"هلا عمي ...هذي امل بنت ابو مازن"
قرب منها وشدها من شعرها بقسوه...
ابوعبد العزيز:"لو شفتك ماسكه التلفون مره ثانيه صدقيني لكسره على راسك"
بسمه والخوف يطل من عيونها:"ان شاء الله عمي"
ابوعبد العزيز:" فارقي عن وجهي لا احط حرتي فيك"
وهي في خاطرها من عندك غيري....تحط فيه كل قسوتك وظلمك...
ابوعبدالعزيز (حمد)عم بسمه الوحيديشتغل في مكتب عقار حالته الماديه جيده.... رجل قمه في القسوه والظلم وعلشان مصلحته عنه استعداد يبيع أي شي....اكثر شخص يقع عليه هالظلم هي بسمه يمكن لانه ما احد يدافع عنها....ويمكن لانه كارهها مثل ماكن يكره ابوها لانه الوحيد اللي كان يوقفه عند حده....عياله هم سحر وهي متزوجه وساكنه في جده...وهدى وهند..وعبدالعزيز وعمره 8سنين....
هند:"هلا والله ببوي الغالي ...اش فيك صوتك واصل اخرالدنيا...(وهي تناظر بسمه بنظرااات كره)... ما تنلام مادام ذي اللي كانت في وجهك اول مادخلت"
ابوعبد العزيزوهو يبتسم بحنان:"هلا والله ..بالغاليه...اشوفك فرحانه اش عندك"
هند تقرب من ابوها وتحب راسه:"اليوم الاربعاء بنروح لخوالي ما تبغاني اكون مبسوطه"
تناظر بسمه بنظرات كلها حقد:"بس بسمه مهي رايحه معنا بتروح بيت جيرانا"
ابوعبد العزيز:"مهو على كيفها"
سكت لما تذكر انه اكيد هالروحه بتكون برضى مرته :"بس اذا امك موافقه ماعندي مانع (وبسخريه) هي حسبة امها وادرى بمصلحتها"
هند:"ايه موافقه بتروح لانه..."
قاطعه:"ما ابغى اعرف ليش انا تعبان وداخل ارتاح شوي ...لا اسمع صوت"
تنهدت بسمه بارتياح لانه الموقف عدى على خير... التفتت هند لهاوناظرتها نظرات كلها حقد ...
هند:"المره هذي ما قدرت اخرب عليك لكن الجايات اكثر اما قطعتك من امل ما اكون اناهند"
هند تغار من علاقة بسمه مع امل لان امل كانت صديقتها على انها اكبر منها و لما جت خلود عاشت عندهم ...طيب اخلاقها هو اللي حبب امل واهلها فيها...
##########################
كانت في الصاله مع امها واخوانها تنتظر بسمه اول ما سمعت الجرس راحت تركض عشان تتفتح الباب ....
رهف "شوي شوي لا تتكسرين"
امل وهي مستعجله:" يشين اللقافه"
اول ما فتحت الباب دخلت بسمه استغربت ان اللي فتح هي امل
بسمه:"انا عارفه انك تحبيني بس مهو لدرجة انك تتكرمين وتتفضلين علي وتتفتحين الباب بنفسك"
امل:"افا عليك كم بسمه عندي ...يالله اليوم وناسه بسمه في بيتنا يامرحبا يامرحبا"
بسمه:"ههههههههه اقول ماكني اليوم شايفتك في المدرسه.. خلينا بس ندخل ولا بتقعديني برى"
امل:"تفضلي ...لانا لوتاخرنا شوي نلقى جمهور المعجبين طالعين في الحر لعيونك"
دخلوا الصاله وفعلا كان الجميع ينتظرهم...
بسمه وهي مبتسمه::السلام عليكم"
بدريه:"وعليكم السلام هلا وغلا بسمه"
قربت بسمه منها وسلمت عليها:"اشلونك خالتي "
بدريه:" طيبه الله يسلمك"
قربت رهف من بسمه وسلمت عليها:"هلا برهوفه ...كيفك و كيف الدراسه معاك"
رهف:"الحمد لله كل شئ تمام"
مازن مسوي نفسه زعلان :"اللحين تسلمين على الكل وتنسين خطيبك اللي بيكون اهم شخص في حياتك"
بسمه:"هههههههههه ...لا تزعل بس تدري استحي من امك"
بدريه:"لا تستحين يازينها والله خطيبة ولدي اذا بتكون بسمه"
رهف:"اي خطيبه انت ووجهك ...قل ام خطيبتي لان بسمه اكيد بتتزوج وانت ما خلصت الابتدائي"
بسمه:"هههههههه ما عليك منها ...اذا انا وانت متفقين ماعلينا من الناس"
مازن: "وانتي الصادقه ...الا اقول رحوا اهل عمك ولا بعد"
خلود:"لا بعدهم ما راحوا"
مازن وهوطالع:"اجل يمه بروح عند عبد العزيز عنده اشرطة بلاي ستيشن جديده"
بدريه:"تعال....لا.."
كان يركض ماانتبه لامه اش كانت تقول...
بدريه:"الله يصلحك وانا امك...اقول امل ما اشوفك جبتي شي لضيفتنا"
امل وهي ماسكه يد بسمه:" بعدين يمه الحين بنطلع نذاكر خلي الشغاله تجيب العصير لغرفتي"
وهي تناظر اختها:"وياليت يمه ما احد يزعجنا"
بدريه:"هههههههه امحق مذاكره"
طلعت امل وبسمه لغرفة ...اول ما وصلوا رمت نفسها على السرير وجلست بسمه على كرسي مقابلتها...
بسمه:"يالله ياامل اليوم ضاع وجهي مع خالك كنت متاكده انه ما فيه رجال في بيتكم كنت ماخذه راحتي واضحك في التلفون"
امل:"هههههه ايه دخلت عليه وهو يقول الله يازين الضحكه"
استحت بسمه:"الله ياخذك وتقولين بعد"
امل:"ياعزيزتي انا مشكلتي الصراحه...المهم تصدقين انا خفت انه عمك ما يخليك يوم قلتي صوته معصب."
بسمه تبتسم بسخريه:" لا هو مستحيل وحطي مية خط تحت مستحيل انه يكسر كلام حرمته"
امل:"بصراحه ماادري اش مصبرك على هالوضع؟الوحيده اللي تطيعه ومع ذلك ماهو راحمك"
بسمه بمراره:"ما تدرين ... اللي مصبرني ياحلوه انه ما قدامي الا الصبر ولا من راح يوقف معي في وجه عمي"
امل:"اكيد فيه حل"
بسمه:بعصبيه:" أي حل ...وهو ولي امري الوحيد...مالي الاخاله وحيده وحارمني منهاولو حاولت اعانده ...قولي على بسمه السلام...اصلا انا من غيرعناد ماني سالمه منه تذكرين الكدمه اللي كانت في وجهي من اسبوعين"
امل وهي تفكر:"ايه تذكرتها..بس انتي قلتي..."
قاطعتها بسمه:"قلت لكم طحت والصحيح انه هو رمى الريموت على وجهي ولو لقى غيره كان ما قصر والسبب...هدى طلبت فلوس تروح السوق...وهو مثل ما انتي عارفه يتعذب اذا احد جاب طاري الفلوس ما لقى احد يفرغ غضبه فيه غيري رمى الريموت على وجهي وقال انقلعي عن وجهي...يوم ارتاح شوي عطاها فلوس وراحت السوق وانا اخذت اللي فيه النصيب"
حست امل انه زودتها ...وحبت تلطف الجو شوي...
امل:"اسفه يابسمه ادري ان لساني طويل ويبي له قص...اشريك تقصينه"
بسمه:"هههههههه لا مشكوره خلي هالمهمه لغيري..الاما قلتي اشلونك مع الدراسه..لازم نشد حيلنا...ونجيب نسبه تساعدنا في
دخول الجامعه...( وهي تنهد) : ولو اني ما ادري يخلوني اكمل ولا يحرموني"
امل :"لا ان شاء الله نكمل بعض"
بسمه وهي تهز راسه:" ان شاء الله ...بكره بتروحون لاهلك"
امل:"ايه ان شاء الله"
بسمه:"تصدقين اشتقت لخالتي ...مستحيل هي تجي عقب ما طردتها مرة عمي"
فتحت رهف الباب...وطلت براسها:"ها... ما خلصتوا مذاكره"
قامت بسمه ومسكت بيدها وهي طالعه معها ابتسمت لامل اللي مقهوره من اختها
بسمه:"اكيد خلصنا"
##########################
-"اقول داوم خالد امس"
ابوخالد تنهد بعمق: "ايه..."
ام خالد :"اشوي ...ما بغى يداوم"
ابو خالد:"من اسبوعين توه امس يروح ما اقول الا حسبي الله عليهم "
ام خالد :"حرام عليك اختي وبنتها مالهم ذنب..هذا ابوها الله يهديه هواللي فسخ الخطبه "
ابو خالد بضيق:" الله يهدي الجميع ويعوض ولدي احسن منها"
ام خالد بأسف :"ما ضني فيه احسن منها ...لكن الله كريم"
ابو خالد بعصبيه:"ايه... استمري انتي وريم في ترديد هالكلام قدام خالد اللي فيه مكفيه"
ام خالد :"الله يهديك ياابوخالد فيه ام تكره تشوف ولدها متزوج وتشوف عياله انا بس اقول ننتظر يمكن عبير ماانخطبت"
قاطعها ابوخالد بعصبيه :"والله اذا انتي ترضينها علىولدك انا ماارضاها...من باعنا نبيعه لوهو من يكون....وبعدين نسيتي اللي صار في العنود بسبب ولد اختك"
ام خالد بضيق:"خالد وعبير مالهم في كل اللي صار"
ابو خالد بعصبيه:"اذا هم مالهم ذنب ليش ابو محمد يفسخ الخطبه..."
ام خالد:"ماادري عنه يمكن عصب على اخوك لما راح له البيت وحب ينتقم"
ابو خالد:"تدرين الحمد لله انها جت منه....لانه الحين مستحيل ارجع اخطب لولدي عنده"
ام خالد:"حرااااام عليك ياابو خالد تدري ان خالد يحب عبير"
ابو خالد:"أي حب واي خرابيط"
ام خالد:"لا تنسى انها كانت خطيبته "
ابو خالد:" اذا تزوج غيرها بينساها"
ام خالد:"ماراح يرضى يتزوج غيرها"
ابو خالد بعصبيه:"بيرضى انتي بس اطلعي منها"
ام خالد :"زين لا تعصب روحك"
ابو خالد:"انا ياام خالد مثل ماانتي شايفه ماقطعتك ولا بقطعك من اختك بس مالنا نصيب عندهم"
ام خالد حرمه طيبه وحنونه...عيالها بترتيب.. بدريه ساره وخالد واخر العنقود ريم…تحب خالد بجنون….وشصيتها ضعيفه وتتأثر بسرعه
واكثر من يقدر يأثر عليها… اختها ام محمداللي هي ام عبير
على رغم استغلال الاخيره لها...
ابوخالد رجل شخصيته قويه وله مكانته في المجتمع مكون مع اخوانه شركه ...
-صباح الخير على الحلوين
ابوخالد:صباح الورد على دلوعة ابوها ... تقرب من ابوه وتحبه على راسه
ام خالد :"غريبه ريم صاحيه من بدري يوم الخميس"
ريم :"ابد سلامتك بس البارح من الملل نايمه من بدري"
ابو خالد:"احسن وانا ابوك مامن السهر فايده"
ريم :"وانت صادق يبه الاوينه ولدكم المدلل العاده ما تفوته هالقعده الصبح"
خالد اللي كان توه داخل:" مدلل في عينك يالحسوده"
ريم :"لوطريت مليون كان احسن"
ام خالد :"لا ولدي اغلى من ملاين الدنيا"
خالد وهو يبتسم :" موتي قهر"
ريم :"اقول ماتحسون اني اصير صفر على الشمال اذا جا خالد"
ابو خالد:"هههههههههه انتي حبيبة ابوك ما يكفيك"
ريم الدلوعه في البيت حلوه ومغروره قدوتها في الحياه عبير بنت خالتهاعمرها 19 تدرس اولى جامعه مع عبير...
ريم وهي تبتسم لابوها :"اللي يكفيني ...الا متى بتجي بدريه وبناتها والله اني اشتقت لهم اسبوع ما شفناهم"
ام خالد :"بتجي الظهر"
ريم وهي تكلم امها:"عبير كلمتني اليوم وتقول بيجون اليوم في الليل"
تغيرت ملامح خالد من جا طاري عبير وانتبه له ابوه...
ابو خالد:"على فكره يام خالد نسيت اقولك اليوم انا وخالد رايحين المزرعه مع ابو فيصل وابو ناصر (اعمام خالد )وعيالهم"
استغرب خالد بس حس ان ابوه يبغى يبعده عن البيت عشان خالته بتجي...
ريم :"والله قهر يبه ياليت تاخذونا اشتقت للمزرعه"
ابو خالد:"مره ثانيه وانا ابوك "
21-07-2005, 11:10 PM
جروحي تنزف احزاني .. قصه ولا ارووع .
العرض العادي
