العماني في افريقيا

[معلومات العضو عبدالله الحافر الغييثي]

انا اليوم حبيت اجيب لكم قصه -منقوله - للأمانه ولكن عليها بعض التعديلات من عندي

ملاحــــــــــــــــــــظه: الشخصيات وضعتها ممن امون عليه والعذر والسموحه منهم
وهذي حبة خشم لشخصيات القصه لايزعلون علي

طيب وش رايكم نبدا بالقصه ؟


كان يا مكان في قديم الزمان وسالف العصر والاوان كان فيه



المهم


نبدا القصه


وهي بعنوان

رحله بعض الاعضاء الى غابات افريقيا المجهوله

وهذا غلاف القصه للي يبي يشتري القصه
[IMG]http://www.puzzlehouse.com/images/***page/wildlife1000clem.jpg[/IMG]
اعضاء الرحله:

1/ خميس الغييثي: القائد الفذ والسواق والبطل وكل شي طبعاً


2/ هايف العماني : ماجلان الرحله ( الدليل ) <<<<< والله اللي ضيعنا


3/ ابونواف: متعهد الاعاشه في الرحله

4/ اابو زابن المسعري: ماخذينه لانه ازعجنا ابي اروح معكم ابلشنا صراحه وكلم سالم بن صمهود يتوسط له المهم



بدت القصه لما كلمت هايف وقلت له انا الصيفيه هذي ما سافرت ابد وابي اسافر سفره ما صارت ولا استوت

قال لي بس من يبي يروح معنا من الاعضاء ؟

قلت له ما عليك الاعضاء انا ادبرهم بس انت اجزم وابشر بعزك

قال خلاص انا وياك في الهوا سوا <<< سوا ولا موبايلي


اتفقنا حنا يا الاربعه نجتمع في بيتنا وقررنا ان الرحله راح تكون الساعه 5 الفجر وبعد كذا كل(ن) راح في حال سبيله طبعا انا ما علمتهم اني ناوي اروح لغابات افريقيا بس قلت لهم نبي نسافر سفرة ما صارت وهم وافقوا


وفي اليوم الموعود مريت هايف وابونواف وابوزابن وتوكلنا على الله ( رايحين بسيارتي الكيا ) وهم كل شوي يسالون


يأيها القائد الفذ الى اين وجهتك ؟

انا : سوف تعرفون عما قريب وسوف ادعكم تقهقهون من القهقه المتزايده <<<بدت اللغه تطلع


المهم

وقفنا في محطه التسهيلات وتزودنا بالوقود وانطلقنا يم جهه الغرب ناصين ( متوجهين ) الى البحر الاحمر عشان نشق البحر ونطلع على افريقيا

ولما وصلنا للبحر الاعضاء توقعوا اننا نبي نقضي الرحله في البحر المهم وقفت انا في البحر وكانت معي يد سوني وقفت مقابل للبحر واخذت اليد وضغطت L1 L2 R1 R2 <<<<<<<<< هع هع هع هع مسوي درايفر
المهم وفجاءة قلبت السيارة الى مركب برمائي ورجعت ورا عشان اشد العزم وهي الدعسه


100

150

180

200

250

300

<<<<<اقول تراها كيا يعني حدها 60 وواجد عليها بعد


المهم وانا اللي انطلق

الا واسمع هايف وابوزابن وابونواف يضحكون ضحكه خوف



المهم وانا ماسك الخط - في البحر - اخذ الطريق معي تقريبا مده ساعه ساعه وربع بالكثير الا وانا في افريقيا


يوم وصلنا .. نزلنا وصلينا الظهر والعصر جمع تقديم وقصرنا ...

واما امداني اوقف السيارة

هايف : هاه يا ابومطر متى الرجعه ان شاء الله المغرب ولا عقب ما نتعشى ؟


انا : اقول وش رجعته ما فيه رجعه قبل 4 ايام

وقلت لهم انا ما جيت لافريقيا ساعتين وارجع وانا قلتلكم اللي يبي يطلع معي يطلع انا ما ضربت احد على يده <<<<مسوي يستقوي على الاعضاء


المهم انا حبيت اني اوسع صدورهم شوي

وقلت :يابوزابن ؟

ابوزابن: هلا بالقائد الفذ
انا : سمعنا شي من القصايد اللي تحفظها نبي نستانس

ابوزابن: ولا يهمك وما امداه يقول شي الا وهو اللي يحس بشي يحك رجله ولما شاف رجله سبحان الله



على طول هو ما سوى شي ولاتحرك لان هايف قايلن له اذا جاك ثعبان استسلم على طول << والله من زين الوصيه وابوزابن زرقت عيونه ووقف شعره


والحمد لله عدت على خير ومشى الثعبان على رجله وراح ما ادري وين طس له



ولما هدا الوضع شوي

قلت لهم اسمعوا يا اعضاء منتدى الدواسر الموقر

انا ما جينا هناه الا عشان الجوهر والاساس <<<<<اكشخ يا الاسلوب انت


طبعاً اابوزابن بلم ولا فهم السالفه



قلت لهم : باتسر ان شاء الله نبي ندخل زود .. نبي نروح نتمشى بالغابات
حناااا اللحين بافريقيا .. ويمدحون غابه هنااا



( الوضع العام بعد سماع الخبر )


انا : متحمس لاني بطل هذا شي اكيد <<<<اقول سقها

هايف: مسوي متحمس وهو بالع ام العافيه

ابونواف: خايف بس متحمس
ابو زابن : مع الخيل يا شقرا



قالوا : امرنااا لله .. انت القائد و حنا معك ..<<<<اعضاء عاقلين
قلت : خلاص .. نبي نريح اليوم هناااا .. ومن بكرة ندخل للغابات




( الساعه 3 فجراً )

انا : خخخخخخخخخخخخخخخخخخخ ولا عندي في احد <<<< لاني قوي اكيد اني انام بشكل طبيعي


هايف : نايم .. بس انه مواسدني على المخده حقتي


ابونواف : نايم فوق القدر

ابوزابن: قاعد يراقب المكان ( الوضع شفتات ) ساعه عليه وساعه على غيره الا انا لاني القائد


المهم وبينما اابوزابن يراقب الوضع وهو كان يلقي على مسامعه الشعر الا وفجأة يسمع صوت


عووووووووووووووو عوووووووووو <<<<<لاعاد تقلد الله يرحم والدينك وصلت الفكرة بس لا عاد تقلد مرة ثانيه


سمع صوت ذيـــب



تجمدت رجلين ابوزابن وصارخ

ابومطرياخميس قم يامال اللي مانيب قايله

انا : خخخخخخخخخخخخخ

الا ويقوم ابوزابن بالملاس اخذه من ابونواف و طررررررررررررررراااااااااااااااااااااااااااخ على راسي

قمت مرتبك ما ادري وش السالفه

المهم الكل قام من النوم الا ابونواف ما قام وكان يسمع اصوات صدى بحكم انه نايم بالقدر


المهم قلت ابوزابن وش فيه اسم الله عليك <<<مسوي خايف عليه

قال ذيب

قلت له : ما عليك روح نام وانا براقب الوضع <<<< وش عنده اللي طقته الشهامه ؟


المهم اذن الفجر

قومتهم صلينا .. وافطرنا .. يسولفون وش يبي يسون؟ وين يبي يروحون ؟
ومتى الرجعه؟ << هذا اكثر موضوع ركزوا عليه




المهم وهم قاعدين الا ذاك النمر الهندي يتمشى بجنبهم ،،



الا والقوي - اللي هو انا - تجيني ام الركب اول مره اشوف الوحوش ذولي


التفت يمين مافيه احد ،، يسار مافيه احد ،، يؤيؤ وين اللي يسولفون قبل شوي ويشربون شاهي حليب ؟ <<<<حتى بدون سكر خخخخخخخخ




يوم التفت على سيارتي ولاهم متزاحمين بوسط السياره لا وصاكين قفل الباب من زود الروعه


ولما ناظرت النمر بشوف وينه الا واشوف ابو الشباب ناصيني



انا : تشششششششششششنننننننننننننننننننننننننننننننننننننن نننننننننن <<<<<<<حط رجلك يا ولد الحياه مره وحده


مغطت للسيارة وقفلت الشنطه على نفسي من الروعه <<<<< وين القوي والبطل ؟



المهم

مر النمر الهندي من اغراضنا ويناظر حوستنا وهي كالتالي :


1/ قدرابونواف قالبه ومخليه كرسي

2/ فنيلتي مخلينها بيز شاهي

3/ بطانية هايف سماط

4/ ثوب ابوزابن مخلينه رواق

التفت علينا النمر وقال : سديق يبي غسيل سيارة ؟



المهم

ويطق لنا تحيه ومشى عنا ،، قال اروح اتروش احسن من اقابل هالاشكال

ولما ابعد النمر قلت لهم يله انزلوا خلونا نكمل فطورنا


نزلوا وافطروا يوم خلصوا من الفطور راحوا يبي يتمشون لكن اللحين هم خايفين ،، انا اقولهم نبي نتمشى رجليه

والاعضاء يقولون نبي السيارة اخر شي



اتفقوا انهم يتمشون بالنهار رجليه وبالليل بالسيارة


بدينا نمشي ،، ونمشي ونمشي ،، ابعدنا عن السيارة بالحيل يعني مافيه رجعه اللحين ياقاتل يامقتول .!!



والتفتنا يسار الا ونشوف ذاك الفهد اللي يلحق له غزال وهو وياه ملاحق كنهم بزارن متهاوشين على كورة منسمه


الا وشوي ويفلت الغزال من الفهد وينجو من المصير الذي كان سيلاقيه


طبعاً الغزال ذكي ركض لم جهتنا عشان الفهد يشوفنا واجدين ويترك الغزال ويتوحد فينا <<<<<<<<موب غزال هذا صار ابومطر على غفله

الا والفهد عرف الطبخه وشافنا



والاعضاء الحلوين اكلوهاااااا ( بما فيهم انا ) ،، مافيه سيارة قريبة ومامعك سلاح ولا شي << جاري الفركه وحط رجلك كلا" من :

1/ ابونواف

2/ابوزابن


التفت عليهم مسوي نفسي انا عنتر زماني

وقلت : ما ابي صياح خوافين انتم ابطال وبديت العب عليهم


وبينما انا اكلمهم الا وهم ينحشون ويصاروخون وهو يقولون : جاكم الفهد النحشه يا ولد


انا ما صدقت خبر الفهد جاي مجلعد ناصيني وابو الشباب 0 اللي هو انا - شاري قصه عن الفهد من محطه التسهيلات وكانت ابي اتأكد ان اللي جاي لمي هو فهد ولا لا

مادرى الا الفهد شاطفني شطف يمشي 200 كم / بالساعه ،، راح يلحق اللي انحشوا وتركني <<<<<امي داعيه لي



تششششششششششششننننننننننننننننننننننن <<<<<الفهد يتفتف

والباقين ما فيه الاسرعه



السرعه الحاليه :


1/ اابونواف: 260ك/س <<<<<ماكسيما

2/ابوزابن 220 ك/س <<<< كامري

3/ هايف: 160ك/س <<<< ما ادري وشو بس ديزل



يعني اللي اكلها هايف،، ومن الروعه اغمى عليه ،، قرب الفهد ومسكه مع شوشته وقال وش عندك تهايط علي مسوي انت وراسك ذا اللي كنه غطى عطر ؟ <<<<<<<< فهد ويذب والله اللي ما تجي


تبني اسلخك قدام اخوياك ذولي عشان اخليك درس لهم ؟


هايف<< لازال مغمى عليه



المهم واجي لم الفهد وعلى بالي اني جاي من الحارة الثانيه <<<<<<<<< اي حارة انت وخشتك حارة في غابه ؟


المهم

وقلت للفهد : وش السالفه يا الطيب ؟

الفهد: ابد ذولي جاين يهايطون علي وودي أأدبه


انا : لا يابن الحلال اذكر الله المسامح كريم

الفهد : انت وش دخلك الحين وراه ما تتوكل لا اوريك شغلك الحين ؟

انا : عن الغلط عاد لا اوريك شغلك

الفهد ترك هايف : وش بتسوي انت وشعرك اللي كنه حزمه خس ؟

انا -بحركه سريعه- صكيته بذاك المخمس الا وهو اللي منسدح


شفتوا اذا قلت لكم اني انا قوي يعني انا قوي تراني مصطر نسيم حميد

قام هايف من الغيبوبه

ورجعنا للسيارتي وحنا راجعين تونا واصلين للسيارة قام ابونواف الله يعافيه وسوى لنا ذاك الغدا اللذيذ - اندومي بالخضار -

تغدينا وشغلنا السيارة ورجعنا لارض الوطن سالمين غانمين

والحمد لله على السلامه




ملاحظه/

الصور الموجوده ماخوذه من نفس القصه وكذلك الفكرة ولكن الاسلوب والصياغه مني انا



وان شاء الله انها تعجبكم

والقصه في الحقيقه مقتبسه<<<ماهيب مسروقه

 

 

 

 

[معلومات العضو أمـــيرتـــهم]

خميس الغييثي يعطيك الف عافيه...لاهنت
من جد قصه تموت ضحك.... سلمت يمينك


أمــــــيرتــــــهم

 

 

 

 

[معلومات العضو أبونواف الدوسري]

الأخ القائد الفذ خميس الغييثي....

كل الشكر علي هذا الموضوع....والله أدمعت عيني من الضحك...

أسعدك الله ..في الدنيا والأخره ورحم والديك...

 

 

 

 

[معلومات العضو عبدالله الحافر الغييثي]

هههههههههههه
ابونواف
اميرتهم

ياهلابكم جميع

واتظروا القصه القادمه
ان شاء الله

 

 

 

 

[معلومات العضو العماني]

ههههههههههههههه الله يهديك يابومطر على ذي القصة

ابدعت اخوي خميس واخيتار للشخصيات كان اروع ، واضحك الله سنّك .

 

 

 

 

[معلومات العضو ابو زابن المسعري]

ههههههههههههه

تصدق عاد ياخميس لو ماخليتني اروح معكم ان اموت قهر

ما اقول الا الله يبيض وجه سالم ابن صمهود اللي توسط لي

لاهنت على هذه القصه ونتمنى ان تكون حقيقه بس بدون خطريات

خوتكم تنشرى

 

 

 

 

[معلومات العضو عبدالله الحافر الغييثي]

هههههههههه
هلابكم يا اعضاء الرحله
وان شاء الله فيه رحله قادمه
بس تجهزوا وجهزوا القطيه
ههههههههههههههههههه