:: مزنه :: ردّت حلالهم من الحنشل00وتزوجها الامير/تركي السديري

[معلومات العضو ابوبادي المنداع]

::: القصه ::: وقعت هذه القصه في أحد قرى مدينة عنيزه بالقصيم .. والمعروفه بالـ" عوشتزيه " أو العوشقيه << .. .. قبل ما يقارب ميه وخمسين سنه .. المهم كان مؤسس هذي القريه " المطرودي " .. عنده بنت أسمها مزنه .. وولد أصغر منها .. وولد أكبر منها .. وكانو لهم عادة وهي كل يوم جمعه .. وقبل الصلاه .. يروحون كل أهل القريه يصلون الجمعه بعنيزه .. ويتقضون ويرجعون .. المهم .. ترك أبو مزنه " طبعاً له ولد كبير بس أنا علشان القصه نناديه ابو مزنه " حلاله يرعى .. وكل أهل القريه يسوون كذا .. بس حلال أبو مزنه كان أبعد حلال تقريباً عن البيت .. يعني " حسب وصف الراوي " .. سبعين الى ثمانين متر تقريباً .. وكانت مزنه جالسه بالحوش .. هي واخوها الصغير يمكن عمره " 9 " سنوات .. المهم لمحت أحد كان يقرب من الحلال .. والا هم حنشل " ولكنه ما عندهم سلاح يعني عصا والا عجره وإن كثّر سكين .. بس الحنشولي ممكن يقتل علشان وزنة تمر وغالباً يمشون على رجليهم وأطرف شيء يسرقونه " جاء الحناشل والا هم ثلاثه أو أكثر ما حدد .. وكلل واحد أخذ له ذلول والا ناقه .. قامت مزنه وراحت لبست بشت وثوب .. وتلثمت بالشماغ والعقال .. وأخفت ملامحها الأنثويه " " وأخذت لها باروده " بندق " .. عاضه الفشقه من سنه " يعني ما تثور ولا ترمي " .. مجرد شكل .. وهي تلحق الحنشل .. يوم واجهتهم .. وبصوت رجال .. قالت : علي الطلاق بالثلاث .. أن ما رجعتو الركايب لأهلها وسقتوها لمحلّها .. أن هالباروده تفتك روسكم واحد واحد .. !! قامو الحناشل يتشاورون .. وهذا فارس طلق بالثلاث وكلمته ما هي بمردوده .. قالو : أجل خذها .. ونتيّسر حنا بحالنا .. قالت : لا ..علي بالطلاق إن ما سقتوها هالحين .. أن ما يحصلكم طيّب .. قالو : نسوقها .. وأمرنا لله المهم قامت مزنه .. يوم أنهم رجعو الحلال وأعقلوه .. بصوت الرجّال .. قالت : عليه ممّا عليه .. ما أحدن فيكم يسري " يروح " .. غير تقلطون .. حاولو الحنشل الاعتذار .. بس هددتهم وقلطوا .. المهم قلطتهم المجلس .. ونادة أخوها الصغير .. وقالت له : سو القهوه .. وقهوهم .. الين يجون عزوتي " أخوها وابوها " .. وكان الوقت بعد الظهر يعني أمداهم جايين .. المهم .. تقهوو والفارس ما جا .. الا هذولي الابو والاخو .. سلام عليكم .. هلا ومرحبا .. وطبعاً ما هو بناط بوجهه يسأله من أنت .. جاء الشايب وسأل الصغير على جنب .. وقال له الصغير كذا وكذا .. قال إيييييييييه .. المهم جو الحنشل وأعتذرو وقبل الأبو أعتذارهم .. يوم حطو الغدا .. نط واحد من هالحنشل ملقوف وقال : عليه مما عليه ما نذوق هالعيشه غير والفارس يسبقنا قام الأبو يصرف والا الرجال ماش ملزم .. قام الأبو وقال للصغير .. يافلان قال لبيه .. قال : قم ناد مزنه !!! والا الحنشل يوم راحت وجيههم .. الا يوم جت مزنه من ورا الباب متستره و قالت : يالله حي الرجال .. أنا اللي رديتكم .. والبندق عاضتن الفشه من سنه .. تغدو .. تغدو .. المهم قال الأبو .. تراكم مسموحين تقولون أن مزنه بنت المطرودي .. ساقتنا .. المهم راحو الحناشل وقالو السالفه لكل من واجهوه .. وصلت السالفه للأمير تركي بن جلوي بن تركي السديري .. ويقال أنه خطبها من أبوها وتزوجو .. وتقبلوا خالص تحياتي: أخوكــــم/ابو بادي الغييثي

 

 

 

 

[معلومات العضو مبارك الخييلي]

الله لايهنيك



وبيض الله وجهك على أسراد هذه القصة الجميلة



تقبل شكري والمرور

 

 

 

 

[معلومات العضو رائــــــــــد]

ابو بادي
بيض الله وجهك على هالقصة
اما من ناحية القرية فهي تسمى
بالـــــــــــعـــوشــــــزيــــــــــــة

وهناك سؤال يطري على بالي
هل المطرودي ابو مزنه
من الدواسر ام لا لان الروايات
كثر من هذه الناحية وخص
اهل العوشزية
ودمت بالف خير

 

 

 

 

[معلومات العضو ابوبادي المنداع]

الاخ مبارك الخييلي اشكرك على الاطلاع الدئم وإهتمامك الآ محدود

إخوي رائــــــــــد وجهك ابيض اما بنسبه لنسب المطرودي فهم من البدرين ومشكور على مرورك0

اخوكـ/ ابوبادي الغييثي

 

 

 

 

[معلومات العضو abuadeeb]

كفو مــزنـــة
ياليت بنات اليوم تقتدي بها !!!!!!!!!!!

 

 

 

 

[معلومات العضو راشد المسعري]

يعطيك العافية اخوي المنداع


بصر احة قصة رائعة وتبين شجاعة هذه الفتاة ، ولكن عندي ملاحظة على اسم الشخص الذي تزوجها فيما بعد لأنني سبق أن سمعتها في شريط لأحد الرواة وذكر أن الذي خطبها وتزوجها هو من آل سعود. فياليت تتأكد.

وبعدين لا أظن أن في عائلة السديري الكرام اسم ( جلوي ) لأن هذا الإسم موجود في أسرة آل سعود. ولك مني أجمل الود والتقدير ،،،

 

 

 

 

[معلومات العضو ابوبادي المنداع]

كفو مــزنـــة ياليت بنات اليوم تقتدي بها !!!!!!!!!!!

مشكور على مرورك

الاخ/راشد المسعري هذي القصه منقوله ايضا من احد اشرطة الرواه وقد تختلف من راوي لراويي 0 خوكـ/ابوبادي المنداع

 

 

 

 

[معلومات العضو نجــــــــــديه]

الله يعطيك العافيه على سرد الروايه وعلى فكره الدوسريات عند الفزعه مشهورات عند العرب انهن عن عشرة ارجال صح ولا لا تحياتي

 

 

 

 

[معلومات العضو ابوبادي المنداع]

كفو يانجديه وانشاءالله إنك مثل مزنه وأطيب ودمتي بخير

 

 

 

 

[معلومات العضو أبو سعود الودعاني]

كفوووووووووووووووووا

هذولا النسوان مهوب نسوان وقتنا الحاضر

من دون اقصور في البعض


لاهنت ابو بادي على هذا النقل

 

 

 

 

[معلومات العضو فهدالمحيسن]

يعطيك العافيه

 

 

 

 

[معلومات العضو ابوبادي المنداع]

ابوسعود الله يعافيك على التعليق ودمت بخير ــــــــــــــــــــــــــــــــــــ فهد المحيسن اشكرك على المرور

 

 

 

 

[معلومات العضو النايفه]

الله يرحمها والله انها سنعه


لكن اللي اعرفه ان اللي تزوجها من ال سعود



واشكرك على سرد القصه بيض الله وجهك

 

 

 

 

[معلومات العضو ابوبادي المنداع]

المشاركة الأصلية كتبت بواسطة بنت الريم

الله يرحمها والله انها سنعه


لكن اللي اعرفه ان اللي تزوجها من ال سعود



واشكرك على سرد القصه بيض الله وجهك

لاهنتي اختي بنت الريم على المرور المعلومه اللي عندي تقول انه من السدارى والله أعلم ودمتي بخير

 

 

 

 

[معلومات العضو أبو عبد السلام]

يعطيك العافية