::: مـنتدى قبيلـة الـدواسـر الـرسمي :::

::: مـنتدى قبيلـة الـدواسـر الـرسمي ::: (http://alduwaser.org/vb/index.php)
-   :: منتدى شاعر المليون لنسخته الخامسة :: (http://alduwaser.org/vb/forumdisplay.php?f=85)
-   -   مجاراة الحبابي و الدوسري لمنيف الفهري في بن مسرع (http://alduwaser.org/vb/showthread.php?t=61787)

راشد المسعري 04-04-2012 12:06 PM

مجاراة الحبابي و الدوسري لمنيف الفهري في بن مسرع
 
السلام عليكم ورحمة الله وبركاته:
اسعد الله اوقاتكم بالخير والمسرات:

يقول الشاعر منيف الفهري القحطاني أحد الشعراء المتابعين لمشاركة الشاعر نايف بن مسرع في شاعر المليون التي لن أتكلم عن تفاصيل نهايتها:

شفت الدليلة يوم ورّد على هيت
وثقت به واليوم شفته بعيني

وش عاد يانايف من الشعر خليت
مغير بيتين لبدر المحيني

صوّت لك وانته ماتحتاج تصويت
صوتك يمثل أغلب المسلميني

وإن كان يانايف عن الحق عديت
كلن شهد والحق نوره يبيني

أكبر فضيحة يابطل يوم قفيت
عن مسرح يبطي لمثلك مديني

جريمتك يارمزنا إنك تبريت
من ذلّهم.. وإنك لخالد عويني

من دون بن عمك بحاجتك ضحيت
ودحمت للطالة بضلع متيني

اضرب يابو عبدالعزيز الدناميت
خلّه يهد العين وام القويني


وقد انتشرت الابيات وجارها كثير من الشعراء من ضمنهم الشاعر سالم بن دخيّل الحبابي حيث قال:


يامنيف فيما قلت وش عاد بقيت
لكن بازوّد كلمتك كلمتيني

نايف ولد مسرع كبير الطواغيت
وقالو له إن الكبر ماهوب زيني

ثم قال ابرفع مستوى الشعر لاجيت
فزعت وفا واهل الوفا خابريني

لأن شاعر المليون يحتاج تثبيت
قام يتهزهز في توال السنيني

برنامجن يبغا يطوّر يابلفيت
ولازم يصير الذيب مثل الحصيني

ومن القصايد ما حفظنا ولا بيت
ما فيه غير الهذرمة والرطيني

ولاّ بن مسرع في الشعر ذايع الصيت
من قبل يوخذ راي نشوى الرويني

ولون البحر ما غيرّه قطرة الزيت
ومن يعترض فيما ذكرته يجيني


وأيضاً مجاراة الشاعر سلطان بن محسن الدوسري:


منيف هيضني بطرقه وغنيت
صح الله لسانه طويل اليميني

علم الصحيح يصح من دون تثبيت
قول العوارف والعرب الاوليني

لا هنت يانايف على كل ما احصيت
من هيض فكرك والكلام الثميني

أبدعت في كل المراحل وعديت
في قمة العليا مع الغانميني

ومراحل التصويت بنيت على بيت
كثّر رصيدك وافهق المبدعيني

أبدعت في صنع التماثيل وارهيت
وفرايد المبدع سواتك تبيني

ووقّف ميقاف المعزه وناديت
للي بدار الغرب قد هو سجيني

شكراً على وقفتك ياذايع الصيت
والله لكساب المراجل عويني




شافي بن راشد النتيفات 04-04-2012 01:24 PM

رد: مجاراة الحبابي و الدوسري لمنيف الفهري في بن مسرع
 
جريمتك يارمزنا إنك تبريت
من ذلّهم.. وإنك لخالد عويني

من دون بن عمك بحاجتك ضحيت
ودحمت للطالة بضلع متيني



ولاّ بن مسرع في الشعر ذايع الصيت
من قبل يوخذ راي نشوى الرويني

ولون البحر ما غيرّه قطرة الزيت
ومن يعترض فيما ذكرته يجيني




ووقّف ميقاف المعزه وناديت
للي بدار الغرب قد هو سجيني

شكراً على وقفتك ياذايع الصيت
والله لكساب المراجل عويني



صح الله السنت شعرائنا الفهري والحبابي والدوسري
ولاهنت يابومحسن على نقلها لنا

راشد المسعري 07-04-2012 10:03 AM

رد: مجاراة الحبابي و الدوسري لمنيف الفهري في بن مسرع
 
صح بدنك يابو شالح

لاهنت ولك ودي وتقديري ،،،،

غازي المسعري 07-04-2012 11:13 PM

رد: مجاراة الحبابي و الدوسري لمنيف الفهري في بن مسرع
 
صح الله السنت شعرائنا الكرام

لاهنت اخوي راشد


الساعة الآن 08:21 PM

Powered by vBulletin® Copyright ©2000 - 2024, Jelsoft Enterprises Ltd.
---