::: مـنتدى قبيلـة الـدواسـر الـرسمي ::: - أمير شمل الخييلات محمد بن زيد بن جريس في لقاء مع موقع الدواسر الرسمي(حصرياً)

أمير شمل الخييلات محمد بن زيد بن جريس في لقاء مع موقع الدواسر الرسمي(حصرياً)

بسم الله الرحمن الرحيم

أخوانناء وابناء عمومتنا الغالين ،

اخوانا أعضاء ومنسوبي موقع قبيلة الدواسر الرسمي .

وكما عودناكم دائما ً على نشر كل ماهو مفيد وجديد مما يهم قبيلتنا العريقه (الدواسر) يسعدنا أن نضع بين أيديكم لقاءا ً جميلا ً فريدا ً من نوعه تشرّف موقع القبيله الرسمي بأجراءه مع شيخ شمل الخييلات الأمير محمد بن زيد بن جريس الخييلات الدوسري .

والأمير محمد بن زيد بن جريس من أمراء قبيلة الدواسر المعروفين ، وأسرة آل جريس الكريمه الشهيره على مستوى الجزيره حيث اشتهرت بانها بيت امارة ومشيخه معروفه أنجبت الكثير من الشيوخ والفرسان والشعراء الذين لايفخر بهم الخييلات بحسب بل أبناء قبيلة الدواسر قاطبه .

http://www.alduwaser.org/meeting/ibnjress2.JPG
الأمير محمد بن زيد بن جريس شيخ شمل قبيلة الخييلات

والأمير محمد بن زيد بن جريس سار على نهج آباءه وأجداده قائدا ً للقبيلة منذ اكثر من عشرين عام ، قضاها في خدمة القبيلة وحل مشاكلها ، فكان الابن البار للكبير والأب الحنون للصغير والأخ الواصل للجميع ، مما اكسبه محبه كبيره من أبناء قبيلته جمعاء.

كما أن (أبا زيد) شاعر مجيد يقرض من قصيد الفخر وتمجيد قبيلته بالشعر الجزل والجميل

فهو القائل :

(لاد الخييلي) لابتي مابهم عيب = الا الظفر وذبح حيل ٍ سماني
ترتيبهم الأول على كل ترتيب = واخذت بحد السيف ماهي تماني
مركاضهم يشبع به الضبع والذيب = كسارة الجمع الرزين بثواني
حماية التالي الى كلّح النيب = هاذي عوايد كاملين المعاني
ربعي مروّيت السيوف المحاديب= عند اللقاء يروون حد السناني
ربعي هل الطالات والمدح والطيب = مهوب توّه ، من قديم الزماني!
ربعي (هل الشرفا) رجال المواجيب = عوق الخصيم وطيبهم للعواني
ربعي سلالة (سالم الزير) و(كليب) =واحفاد (ابن كلثوم) عالي المكاني
ربعي كعام الشره تقدم ولاتهيب = يردون حوض الموت ورد الضماني
مدحي لربعي لاحراما ًولا عيب = هم عزوتي لامنه مس البطاني
والمدح باخص به عطيب المضاريب = وكل أبلجا ً فعله من الربع باني

وقبيلة الخييلات (خيالة الشرفا) من قبائل الدواسر المشهورة بالشجاعه والاقدام ، ولها من الأمجاد والتاريخ ما يصعب حصره في لقاء واحد .

حنا هل( الشرفاء) سعد كل مشعافـي=فرسان صفرٍ حنجها صوب مقهورها
ترعي الوسامي في ذرانـا وضفنـا=يامن بنا الخايف مدارق أشرورهـا

ولكن حاولنا من خلال هذا اللقاء تسليط الضوء على بعض امجاد وتاريخ الخيالات العريق ، ونحن على يقين باذن الله ان هذا اللقاء ليس بالاخير وسيتبعه لقاءات اخرى ان شاء الله .

اجرى اللقاء وطرح الأسئلة كل من :

الأستاذ فهد بن هادي الغريري ، الأستاذ عبدالله بن سلمان آل مصلح الخييلات .

أجاب عن الأسئلة وحضر اللقاء كل من :

الأمير محمد بن زيد بن جريس (شيخ شمل قبيلة الخييلات) ،
والشيخ هايف بن زيد بن جريس،كما حضر اللقاء نايف بن ترحيب بن جريس الخييلات
و شبيب بن حليس بن طواري الخييلات و فلاح بن شامان الخييلات و عبيد بن محمد دغش الخييلات

http://www.alduwaser.org/meeting/ibnjress11.JPG
الأمير محمد بن زيد بن جريس

http://www.alduwaser.org/meeting/ibnjress5.JPG
الأمير محمد بن زيد بن جريس والى جانبه أخيه الشيخ هايف بن زيد بن جريس

http://www.alduwaser.org/meeting/ibnjress4.JPG
من اليمين : مع الأمير محمد بن زيد

http://www.alduwaser.org/meeting/ibnjress8.JPG
من اليمين الأستاذ فهد بن هادي الغريري وعلى اليسار شبيب بن حليس بن طواري الخييلات

http://www.alduwaser.org/meeting/ibnjress9.JPG
الأستاذ عبدالله بن سلمان آل مصلح الخييلات مع شيخ شمل الخييلات

س: ابوزيد في البداية نريد نبذة شخصية عنك ، الاسم الكامل ؟

ج :محمد بن زيد بن جريس شيخ شمل الخييلات من الدواسر

س : ابوزيد كم عدد أبناءك ؟

ج : اولادي سبعه
اكبرهم زيد ، ثم مدعث ، فلاح ، نايف ، معتز ، فيصل ، واخرهم هايف
والاخوان ثلاثه ، مدعث وهايف وفلاح .

س : متى انتقلت امارة الخييلات اليك شخصيا يا أبا زيد؟

ج : انتقلت الي بعد وفاة الوالد قبل حوالي 18 عاما ً .

س : ماهو تسلسل امارة الخييلات؟

ج : اول امارة الخييلات على الأمير محمد بن جريس
وعقبه فلاح بن جريس
وعقبه مدعث بن فلاح بن جريس ،
وعقبه نايف بن مدعث بن فلاح بن جريس ،
وعقبه زيد بن مدعث بن فلاح بن جريس ،
وعقبه أنا محمد بن زيد بن مدعث بن فلاح بن جريس .

http://www.alduwaser.org/meeting/zed1.jpg
وقد خص الأمير محمد بن جريس الموقع بصورة تاريخيه لوالده الأمير زيد بن مدعث بن جريس رحمه الله، تنشر لأول مره للعيان ترونها أعلاه

س : محمد بن جريس أول أمير لقبيلة الخييلات وفلاح بن جريس ثاني أمير للخييلات ، هل هم أخوان ؟

ج : نعم اخوان ، ومحمد بن جريس انقطعت ذريته ، حيث انه عقّب أبناء لكن أبناءه لم يعقبوا احد اً.

س : يسأل الكثيرون عن (وقعة الشيوخ) او (مصلّخ) حيث كثر الحديث والجدال حولها في الأونه الأخيره ، هل ممكن ان تحدثونا عن هذه الوقعة وتفصيلتها ؟

ج : وقعة مصلّخ ، غزوا مطير وخذوا حلال الخييلات ، وجو المستفزعه ، ولحقوا من الخييلات 21 رجلا ً ولحقوا الغزاه .فقال عقيد الخييلات اللي فزعوا (مطلق بن سلطان بن جريس) :لاتجون الرجاجيل الحين ، خل ننتظرهم لين (الشفق) ، وخلّونا (دعونا) ندبسهم (نهاجمهم) وهم غافلين .

وأمسوا ومع الصبح ، صبحوا الغزاه وذبحو منهم سبعة شيوخ موثقه بقصيد الخييلات وسميت وقعة الشيوخ لذلك ، كما تسمى وقعة مصلّخ ايضا ً نسبة لموقع المعركه وهي الأن عند (ثاج) ، واسترد الخييلات حلالهم .

وورد ذكر المعركة في اكثر من قصيده فيقول شافي بن بجران الخييلي :

جونا الجبلان يبغون حسكات الوبر = واستبقناهم بصمع ٍ يقصن العظام
شيخنا يقدع شبا الجمع لاثار القهر = وشيخهم من ضربنا طايح ٍ ماعاد قام
دبروا ربعي بربعه يوم الله ومر = مثل (بن ضلفان) يوم ضحي به اشمام
ضربنا في الراس ولا مع حبل الظهر = من سلم منهم فغاشيه من شيخه ملام
لحتزمنا ثم مشينا بسبرات النظر = نقطع العشيق من شوف مردوع الوشام

ويقول الشاعر : عبدالله بن حماد ابن عجلان

يـوم بـن( حـزّام) ظهـر مـن هدومـه=كــل مـدغـوش جـذبـه الـصـيـاح
نحـمـد الله لابـتــي فـــي الـلـقـا=مثـل( ابـو عبـد) وشـروى( ابــداح )
شــوف عيـنـي نـاصــر بالـلـقـا=يـوم بيـن البـيـرق نـهـار الصـبـاح
((ابــن شـبـلان)) أكلـتـه الضـرايـا=زقـفـه (مطـلـق) برمـحـه وطـــاح
(( ابن ضلفان )) .........................=جادله تجر عليه الـصـيـاح

وفيها ايضاً قال الشاعر عبيد بن حويل الخييلي

مركاض ربعي حـط للطيـر مسهـم=والظبعـة العرجـا لهـا الفضـايـل
تـرى طعنـا مـن قديـم مـجـرب=منه ((ابن شبـلان)) وزان النثايـل
خلـي طريـح مالقـى مـن يشيلـه=عليـه يبكـن ضافيـات الجـدايـل
مع(( ابن لامي ))و((المعرقب)) جنايز=عليـهـم والله هلـدمـن الحـلايـل
كم شيـخ قـومٍ لابتـي حولـوا بـه=مثل(( آل حلاف)) حولوا من الاصايل

س : ذكر البعض ان ان الخييلات عندما أُخذ حلالهم ذهبوا يستفزعون بابن حثلين فما صحة ذلك القول ؟ وهل صحيح انه اشترط عليهم مقابل ذلك ؟

ج : مهوب ابن حثلين ، انما هو ابن منيخر من آل سفران ، قال بنروح معكم مقابل نصف الحلال . وابن حثلين أكبر من الكلام هذا.

س : هل تعرف اسماء الخييلات اللي لحقوا القوم :

ج : منهم ، مطلق بن سلطان بن جريس ، وفيهم( ابوعبد ابن دخيل) من آل طينان من الخييلات من مارثة محمد بن دخيّل ، وبداح جد آل مطرف الخييلات .وقايدهم في المعركه مطلق بن سلطان بن جريس .

س : ماهي قصة او سالفة عيال( ابن حلاّف) شيخ الظفير وأسرهم عند الخييلات ؟

ج : غزوا الظفير على العجمان ، وكانوا الخييلات حلفا ً للعجمان واستفزعوا العجمان بالخييلات ، ولما تقابل الجمعين وكان الخييلات بقيادة فلاح بن جريس حيث كان في مكان أخوه محمد بن جريس ، ومحمد بن جريس هو الكبير وهو الأمير وكان وقت المعركه في وادي الدواسر وفلاح في محله .

قال فلاح بن جريس للخييلات كونوا على جنب ولا تختلطوا بالعجمان لكي يبين فعلكم بالمعركة .

ولما دارت المعركة أقفوا الخييلات بالظفير وقُتل من قُتل ، وحوّل فلاح بن جريس بعيال ابن حلاّف الاثنين واستأسرهم وهم (صيّاح ومطني) ، ولما انتهت المعركة قام فلاح بن جريس يحدى على فرسه ويقول :

لاد الخييلي لابتي ياسعد منّا فزعته = لصاح صياحا ٍ يستجير فينا ماتهج حلّته

المهم بعد أن عرف ابن جريس عيال ابن حلاّف أكرمهم ورد عليهم خيلهم وراحوا ، وارسل معهم واحد من الخييلات وقال بن جريس للخييلي المرافق لهم ، اذا وصلت للظفير فأكيد سوف يكرمونك ويهدوننا من خيلهم (أم زريّر وهي من مرابط الخيل المشهورة بالجزيرة ) فلاتقبلها أبدا ً ولا تاخذه منه الا سيفه (رحيّان) ، فإن أعطاءك اياه والا فلاتطلبه منه أبدا ً.

ووصلوا عيال ابن حلاف والخييلي لأمير الظفير ، فقال للخييلي : خذ أفراس عيالي الاثنتين (ام زريّر) ، مثل مارجعتوها لنا اخذوها
فقال الخييلي : لا ابن جريس مايبغيها .
قال أمير الظفير : اجل ويش يبغي ؟
قال الخييلي : يبغي سيفك
قال أمير الظفير : يفداه .
وأعطى السيف للخييلي هدية لابن جريس.

ثم قال امير الظفير لعياله : شلون لحقتكم هالفرس الجنوبيه وانت على (أم زريّر) أطيب خيل أهل الشمال .

فقال ولده :

قال يايبه حنا نعطي خيلنا التمّن ، وهم مايعطونها الا حليب الابل، ولحقتنا شقا ً بقّا مثل السقاي اذا قام يتلقّى ، حِجل الروامح طَلْق السوامح ، تشرب بسايله .

وهذا دليل على طيب خيل الخييلات ذاك الوقت .

س : بما انك عرجت على خيل الخييلات ، هل عندك معرفه عنها او عن اصولها ؟

ج : انّا ما لحقنا على خيل ، والخيل فنت مع اهلها ، ولم ننشد الشيبان الله يرحمهم عنها ،لكن كما ذكرت القصة السابقه ،دليل على طيب خيلهم ذاك الوقت حيث ان فرس فلاح بن جريس استطاعت ان تلحق بخيل أم زريّر وهي مظروب لها المثل بالشمال بسرعتها واصالتها وهي مربط خيل مشهور بالجزيرة العربية .

س : ابوزيد ، لقب الخييلات الصحيح هل هو (مخانيز الرماح) أم (مخاريز الرماح) ؟

ج : الصحيح مخانيز الرماح ، والذي أطلقه عليهم ابن ربيعان من شيوخ عتيبه المعروفين ، وسالفته يوم ضرب واحد من الخييلات عتيبي بالرمح في راسه ، ونشب الرمح في راس العتيبي ما عاد طلع ، ومن كثر مايضربون في الروس .

وهو اللي يقول في فرسه بعد معركه مع الخييلات :

ياسابقي تستاهلين البريره = لاجا نهار ٍ مثل نهار (الخييلات)
قوم ٍ ترد المنكسر للمغيره = وتحط في وجيه المناعير شارات
من فعلهم قامت تعبر امنيره = ليت الغزيه يا يبه مابعد جات

ودائما شعراء الخييلات يذكرون هذا المسمى في قصايدهم فيقول احدهم :

وحنا هل الشرفا إلي ثور الدخـان=خيالنا فـي القـا يسنـد سنودهـا
((مخانيز الرماح)) لابدى الشان بالشان=حتى دولة الـروم ذبحنـا جنودهـا

ويقول آخر :

عليها من(( مخانيز الرماح)) سربه=تداقر الهيجا مدارع أنحورهـا

س : يردد البعض القول الأتي (( أن قبيلة الخييلات زابنين على قبيلة العجمان ويستندون على قصيدة الخييلي اللي يقول في بيت منها :

عنزنا على العجمان دار ٍ وديره = حر ٍ تعلى في ديار احرار

ماصحة هذا القول ، وياليت تفيدنا ليبقى كلامك شهادة خالده امام التاريخ ؟

ج : مازبنّا عليهم وهذا غير صحيح ، قبيلة الخييلات نزحة من الوادي حيث شبة بيننا حرب وبين التغالبه من الدواسر وفنوا نصهم ، ونزحوا الخييلات ،نزحوا على حياة محمد بن جريس ، حيث قالوا انا اذا بقينا طالت الحرب وأفنينا بعضنا ، ونزحوا الخييلات وأول مانزلوا ، نزلوا على قبيلة مطير وجلسوا معهم كم سنه ، عقب ٍ رجعوا للوادي بعد ثمان سنين من نزوحهم ، ولمًا رجع محمد بن جريس للوادي وهو وورد على ذاك الماء ، ويوم وردت ذلوله ودنقت في الماء ، فيلطمها واحد ٍ من الحقبان مدري المصارير .
قال ابن جريس: عادكم بعد فيها الى الحين ؟ مانسيتوا ؟ والله ان نرجع ونموت ماشفتونا .

ويرجعون ويجون الخييلات ماهم زابنين على العجمان .

س : معنى كلامكم طال عمرك ان تواجد الخييلات مع العجمان ليس لأنهم زبنوا معهم وانما حلف ؟

ج : علاقتنا معهم علاقة حلف وحسن جوار وليست زبن، وغير ذا الكلام فهو عاري من الصحه تماماً .

س : ديار الخييلات في الجنوب وفي الوادي ماهي ؟

ج : أخر مابه من ديارهم فهي (الرويساء) في وادي الدواسر .

واما مرابيهم فكانت من الهضب الى الجخجوج الى الأصفر ، محادين عتيبه ومحادين قحطان وسبيع ، هذا قبل نزوحهم .

س : هل يوجد من الخييلات أسر متحضره في الجزيرة العربية ؟
ج : كل الخييلات باديه ، يوجد فقط الخييلات الذين في الامارات العربية المتحده وفي سوريا .

س: هل ممكن ان توضح لنا بالتحديد علاقة قبيلة الخييلات في الامارات العربية المتحده وبقبيلة الخييلات الدواسر والى أي الخييلات يرجعون؟

ج : هذولا خييلات ، قد جاء منهم واحد من مدينة ( العين) بالإمارات العربيه قبل ستين سنه عند جماعته من الرداهين من آل حجاج ، وعقبن جاؤا بيزوجونه وحجر عليهم ولد عم قفى ، وقالوا انقلع منا انت منتب منا .

وراح منهم الى يومك ذا ماعاد جاهم ، ورجع لجماعته (بالعين) .

وقبل فترة جوني ثلاثة مندوبين من ديوان الرئاسه في ابو ظبي ، على اساس يقولون نبي نصدر كتاب لعرب الامارات ، وطلبوا مني الخييلات اللي بالامارات منكم ، قلت ايه بالله منّا ، قالوا فيه خييلات في سوريا يدريك ان عندهم خبر بعد فيهم ، وقالوا وقع لنّا، ووقعت لهم .

س: هل تعرفون احد من الخييلات جلوا منذ زمن ، وعاشوا بعيدا ً منكم؟

ج : فيه خييلات اللي ذكرت لكم في سوريا من جماعتنا ، جدهم ربيّع ، ورابين مع عنزه ، وصارت مشكله بينهم وبين عنزه ، حيث قام واحد من عيال الخييلات وضرب واحد من عيال عنزه ،و قال العنزي للخييلي : لعنبوك يالصلبي ياللي مالك أصل .
وراحي يبكي الولد الخييلي وعلم أبوه ، ولين هناك ذاك الحين هايف أبو شقره من آل سفران من العجمان وكان جلاوي في الشمال هناك وقتها في بداية حكم الملك عبدالعزيز .
وجاء ابو الخييلي والعنزي وقالوا بنروح نتحاكم عند هذا الجنوبي (يقصدون أبوشقره) .

جاؤوا عند ابو شقره ، وسأل ابو شقره الخييلي اللي مع عنزه وقاله : ويش انت منه ؟
قال الخييلي : انا من الخييلات.
قال هايف ابو شقره : ويش وسمكم ؟
قام الخييلي ويعلمه بوسمهم اللي هو وسم (العضادين من الخييلات) وهو المغزل .
فالتفت هايف ابو شقره العجمي لعنزه ، وقال : ويش تقولون ياعنزه فيني؟
قالوا : والله ونعم ، عجمي واصيل .
قال هايف أبو شقره : هم خوالي وآصل مني .

فاقتنعوا براي ابوشقره واعتذروا للخييلي .

وابوشقره بكلمته( وهم آصل مني) اراد ان يثبت طيب اصل الخييلات لا أكثر ولا أقل ولا فقبيلة العجمان من يام وكلن في حقه من الأصل الطيب .

س : الفارس عبيد بن مصلح يسمى (أبا الروس) ، ماسبب تسميته بهذا الاسم ؟

ج : يقولون انه مايضرب الا مع الراس وضربه دايم فالراس مايخطي وبواردي وسموه ابا الروس .

س : المعروف ان قبيلة الخييلات باديه ، فما هو اغلب انواع الابل التي يمتلكونها ؟

ج : هم نصفين ، مجاهيم ومغاتير .

س : ماهو وسم الخييلات ؟

ج : وسم الخييلات وسمين ،(الرويكب) لآل حجاج وآل طينان ، و(المغزل) للعضادين والخماسين .

والعضادين ياسمون المغزل على الخد اليمين وشاهده مطرقٍ على الرقبه .
الخماسين ياسمون نفسه على الخد اليسار ،.
آل طينان ياسمون الرويكب مثل المغزل على نص الرقبه من يسار ، والشاهد المطرق راكب ٍ عليه فسموه الرويكب.
الحجاج ياسمون الرويكب على الفخذ اول والحين ياسمون على الرقبه .

س : ماهي سالفة الفارس الحديبي الغييثات مع الخييلات؟

ج : اعتقد انك تقصد وقعة يوم اخذت ابل الخييلات بالصفري حول الخرج ويوم أخذت ابل الخييلات ، ولحقها مشبب ، ولحقوا فزعة الغييثات ورجعوا الابل.
حنّا في الشتاء أخذت ابل ابن وقيان والغييثات غايبين ورديناها ، فقال ابن وقيان : يالله جعلها توخذ ابلكم يالخييلات حتى انا يالغييثات نردها لكم.

وفعلا بالصفري ، غزوا الخييلات وكان الابل ماعندها احد ، وجوك آل مره وغزوا على ابل الخييلات ماعندها الا مشبب وكان بزر( صغير بالسن) ، ويزهمه (ينخاه) خاله مطلق بن جريس وكان مكسوره رجله يوم معركة السيالي ، ومطلق هو نفسه اللي كان مع الخييلات يوم (مصلّخ) .
المهم زهم (نخى) مطلق بن جريس ابن اخته( مشبب) وقال : تكفى يامشبّب !!
قال ياعيناك كان ضرب السيف يسر والله ان ترجع .
ويلحقهم ويحاول يرجعها ويرجع بعض الحلال وبقى 25 ناقه وفيهن (القروى) وهي تسوى الحلال كله ولحقة بفزعة الغياثات وليا لاحق مشبب الفارس المعروف الحديبي آل عيد الغييثات وكان قصيّر وسبيب الفرس مغطيه .
قال مطلق بن جريس : تكفى يالحديبي !!ياخيال العشاير !! القروى لا تروح !!

قال الحديبي : والله ان ترجع القروى بلا مشيّه .
أي انها سوف ترجع غصب بلا مشيئة الله (وهذا من جهل الأولين الله يتجاوز عنهم)
.
وعقب ٍ يعرض اكثر من واحد من الغييثات ويزهمهم مطلق بن جريس ويقولون نفس كلام الحديبي والله ان ترجع بلا مشيّه .

ويلحق الفزع واحد آخر من الغييثات ، قال مطلق بن جريس : تكفى يا فلان ،ياخيال القروى ، قال الفارس : ترجع ان شاء الله
قال مطلق بن جريس : جعلك السلال ماقلت بدون مشيّه مثل ربعك .

المهم لحقوا الغييثات ابل الخييلات وردوها .

ولما رجعوا الخييلات من الغزوا وعرفوا الخبر قال هجاج بن جريس هذه القصيده :

حنت القروى ومن دونها طابور يام = ليت منهو حاضرا ً يوم عطت بالحنين
نفدى اللي وردوها على العايل اشمام = يوم عيران الفشق والهبوج ألها رنين
لابتي لاد الخييلي تضيم ولا تضام = صلب جدي نومسونا وحنا غايبين
نعم بمشبب خيال العشاير بالزحام= راعي الطولات والطيب فعله من سنين
رد ذيدان الخييلات بضرب الحسام = فارسا ً منا يساوي من القوم أربعين

س :الخييلات هل هو لقب ام اسم ؟

ج : جد الخييلات اسمه عبدالله ، بس يحب الخيل ، وكان يومه صغير كل مانشدوا عنه وين عبدالله وين عبدالله ، قالوا مع الخيل ، قالوا هذا خييلي خييلي وراحوا الخييلات .

س : أين يتواجد الأن أبناء قبيلة الخييلات ؟

ج : أكثر الخييلات يتواجدون في الكويت ، حوالي ثلاث أرباعهم في الكويت ، والباقي في السعوديه .ويوجد حوالي عائلتين في قطر .

س : هل يوجد خييلات حاليا ً في وادي العجمان ؟

ج : ايه واجد ، في الكهفه ومليجه .

وفيه خييلات واجد بالاحساء وابقيق .

س : منهو من الخييلات اللي جلى مع آل مرّه ؟

ج: حليس بن شتوي بن هجاج بن جريس ، راح مع آل مره ، وكان يصيحون منه سبيع والناس كلهم حيث جننهم بمغازيه ، وعقبن جو عند الملك عبدالعزيز ولين حياة جدي مدعث بن جريس عنده جالس ، قالوا : هذا عمه القايم نسجنه لين يجي .
قال عبدالعزيز : والله مايسجن مدعث في بزر من بزران الدواسر مجننكم اذبحوه الله يلعنكم ، انتوا عجزانين منه ؟

س : ويش قصته مع ابن شريم وابن سيحوب ؟

ج : كانوا طالعين غزوا وجاء حليس بن هجاج الى الشيخ طالب بن شريم وقال له : قال اني طالبك يابن شريم تجنّب ابل الخييلات لاشفتها .
قال ابن شريم : ماعندي مانع اذا وافق ابن سيحوب رح له ، يوم جاء حليس عند فيصل ابن سيحوب الزعبي وطلبه نفس الطلب ، قال ابن سيحوب ، انا ماغزينا الا نبغي ابل الخييلات .

قال حليس : اجل قول يالله .
قال ابن سيحوب : يالله
قال حليس : جعلك لامنك جيتها لين اهلها حاضرين عندها .

ويغزون فعلا على ابل الخييلات ويلحقونهم الخييلات ويردونها منهم ، سيف ابن حلاّف اللي اسمه (رحيّان) قده قديم يقولون عكل ماعاد يقطعون به الخشب.
وليا طليفيح ٍ نايم ويوم صاح المصيح قام من نومه ويخطف السيف الأمحق سيف ابن حلاف ، ويلحق ، ويضرب طالب ابن شريم في علباه ، ولاذبحه حاكره ماغير يضربه كذا ، وليا طالب بن شريم عنده (متزوج) بنت هايف بن شقره آل سفران العجمي وخوالها آل جريس ، ويوم شافت زوجها ابن شريم لين علباه متقطع .
قالت شفيك؟ ، قال ابن شريم : ذبحني ماكل حمامته ، والله لو ان سيفه مهوب حكر اني مانيب حي ٍ الى الحين .

المهم انكسروا القوم وهرب فيصل بن سيحوب ، فأخذ حليس بن هجاج يصيح بعالي الصوت لابن سيحوب (( دونك الابل يابن سيحوب )) وابن سيحوب هارب ، وكان حاضر الوقعة من فريس الخييلات:

طليفيح بن مغصب الخييلي، محمد بن علوش الخييلي، مشبب بن راشد الخييلي
مشعان بن مصيريع الخييلي

ويقول شاعرهم بعد المعركه :

حنا هل الشرفا سعد كل مشعافي = فرسان صفر ٍ حنجها صوب مقهورها
ترعى الوسامي في ذرانا وضفنا = يامن بنا الخايف موارق اشرورها
وللخيل مرخين المصارع ربعي = محذات المواطي مرج ٍ اضهورها
عليها من مخانيز الرماح سربه =تداقر الهيجا موادع انحورها
وان ركبوا العيطا طويل ٍ عاصف = هلوا حصاها من عوالي قورها

وبعد السالفة بفتره كانوا الخييلات غزوا ويجيهم واحد من الشواوله العجمان ، وكانوا يسولفون وقالهم الشولاني : طليفيح ٍ ذل يوم غزوا آل مره وزعب .
قالوا : طليفح ذل ؟
قال الشولاني : اي بالله ذل .

سكتوا .

وعقبن يوم رجع الغزوا وقدهم حول الاحساء ، ويلقون آل مره ويقلطون عليهم ، يتقهوون ، ويتعايوون اثنين من آل مره بينهم في موضوع بينهم ، قال واحد ٍ منهم : والله اني صادق .
قال الثاني :جعل الكاذب مني ومنك يحتده (مشبب ٍ) على (طليفيح).
قال واحد من الخييلات للمري : طليفيح ٍ هذا ذل يوم جيتوه .
قالوا : والله اللي ماحوله ذل ، ماطلعنا من الابل الا مشبب ٍ وطليفيح .

ويقوم واحد من الخييلات ويمسك لحية الشولاني ويهلسها.

س : كم توقع عدد الخييلات بشكل عام ؟

ج : أكثر من خمسة الاف رجال .العائله اللي قبل نخبرهم خمسة رجاجيل او اربعة رجاجيل ،الحين لو تعد عيالهم وعيال عيالهم فوق المية وخمسين .وانا خابرينهم اول اربعة ثلاثه .

كثرت الناس .

س : من عاصر محمد بن جريس من شيوخ العجمان آل حثلين ؟

ج : محمد بن جريس عاصر مانع و حزام بن مانع بن حثلين ، مرّه صارت معركه ، وقال حزام بن حثلين : وين محمد وين محمد يقصد محمد بن جريس وكان بالوادي وقتها ، قال فلاح بن جريس : له كافي ، قال : والله ماله كافي ابغي محمد مع محمد .يقصد محمد الطويل آل حبيش الفارس المعروف .

س : ماهي قلبان (آبار) الخييلات في وادي العجمان ؟

ج: رزحان للآل مصلح ، والهليسيه في حنيذ آل مطلق آل جريس .

س : ماقصة تسمية الخييلات بخيالة الشرفا ؟

ج : الخييلات ماعندهم شرفا ولا شي اغلى ماعندهم القروى ، أما قصة التسمية فهو انه أخذت ابل المصارير (الشُرف) على حياة محمد بن جريس ولحقوا الخييلات ، وقال محمد بن جريس لهم ترا عزوتكم اليوم الشرفاء لاتعتزوون الى بها ، وتعزووا بها الخييلات الا يومك هذا .

س: ماهي عزوة الخييلات العامه الأن ؟ وهي فيه عزاوي خاصه ؟

ج : عزوة الخييلات العامه ،خيالة الشرفا ، عقب مافكوا ذود المصارير ثم شاركنا المصارير في شرفاهم ، هم اهل الشرفا وحنا اهل الشرفا .

وعزوتهم قبل يعتزون بالشرفا ، هي خيال السبلا
وسبلا ناقة للخييلات ، وتعزوا الخييلات بالسبلا ، وثم صارت عزوتهم الى الأن الشرفا .

س : منهو من شيوخ مطير الذي تهدد الخييلات ثم وقع في ايديهم ؟

ج : شيخ من الدوشان ، قال مافيه منع بينا وبين الخييلات ، ويطرحون مطير لهم اثنين واحد حقباني قال انا خييلي ، وخويه قال انا عجمي ، ويذبحون الحقباني .
وبعدها بفتره طرحوا الخييلات الدويش وهو ضاعن ٍ بزوجته ، قال لهم : خلاص والله مابينا وبينكم مقاطع .
ويخلف بوعده ، ثم مسكوه مره ثانيه ويحلف لهم وبعدها ماصار مقاطع بينهم .

س : أقيم قبل كم سنة مزاين ابل لقبيلة الخييلات ، هل سيتكرر هذا المزاين ؟

ج : ان شاء الله سيتكرر مره اخرى .

س : في ختام هذا اللقاء الطيب هل من كلمه توجهها لأبناءك واخوانك من أبناء قبيلة الدواسر

ج : كلمتي ، الوحده والتكاتف قوه ، ونبذ احقاد الماضي وعليهم بالطريق الصحيح القويم ومحبة بني عمهم ، واما آل فلان ، واما آل فلان ، كلنا قبيلة ٍ وحده وابشرك حميتنا ولله الحمد طيبه وأكبر دليل عليها تكاتفهم مع قبيلة الصخابره في قضيتهم ابنهم الأخيره . وهاذي صارت اكبر مفخرة للقبيلة الذين اجمعوا فوق الخمسة وعشرين مليون ريال خلال ايام معدودة .وصارت عظه للأجيال .

س : ما رأيك في فكرة انشاء موقع الدواسر الرسمي وماهي نصيحتك للقائمين عليه ولأعضاء الموقع؟

ج : هاذي فكرة طيبه وزينه والله يبيض وجهكم ، ونحن معكم قلباً وقالباً، ونقول شكرا ً لكم والى الأمام .
ونصيحتي لكم اي واحد يجيكم ويعطيكم قصيد حتى انا عطيتكم قصيد ، اخذوا من القصيد الجزل واتركوا الهزل ،لأني لو اجي واعطيكم قصيد هزيل ونحطه بموقعنا ويش بيقولون القبايل الاخرى ، لذلك القصيد الزين اخذوه والهزل ارموه .وبيض الله وجيهكم على كل حال وماقصرتوا .

http://www.alduwaser.org/meeting/ibnjress6.JPG
لقطة للحضور

http://www.alduwaser.org/meeting/ibnjress7.JPG
الأمير محمد بن زيد متوسطاً أنجاله

http://www.alduwaser.org/meeting/ibnjress12.JPG
جانب من حضور ديوان ابن جريس العامر, الاول من اليمن فلاح بن شامان الخييلات وبجانبه
عبيد بن محمد بن دغش الخييلات

http://www.alduwasser.org/meeting/ibnjress10.JPG
لقطة جماعيه

http://www.alduwaser.org/meeting/ibnjress13.JPG
لقطة جماعية أخرى

وفي ختام هذا اللقاء الشيّق نتقدم بالشكر الجزيل والعرفان لشيخ شمل الخييلات الأمير محمد بن زيد بن جريس (حفظه الله) سائلين المولى عز وجل ان يطيل بعمره على طاعته وان يمتعه بالصحه والعافيه ويجعله ذخرا ً لأبناء القبيله كافه .

موقع قبيلة الدواسر الرسمي
www.alduwaser.org/vb